Hərəkətsiz həyat xərçəng riskini artırır

Oxford jurnalında dərc olunan araşdırmaya görə, hərəkətsiz həyat bəzi xərçəng növlərində riski əhəmiyyətli dərəcədə artırır.

Oxford jurnalında dərc olunan genişmiqyaslı araşdırma hərəkətsiz həyatın yoğun bağırsaq xərçəngi (kolon xərçəngi), uşaqlıq xərçəngi və ağciyər xərçəngi riskini əhəmiyyətli dərəcədə artırdığını göstərmişdir. Xüsusilə televizor qarşısında keçirilən vaxtın bunda ciddi payı vardır.

Hərəkətsiz həyat tərzinin ürək xəstəlikləri, diabet və piylənmə kimi ciddi sağlamlıq problemlərinə zəmin yaratdığı məlumdur. Bundan əlavə, hərəkətsizlik skelet, əzələ, qan dövranı, tənəffüs, həzm, ifrazat sistemi və endokrin sistem kimi orqanizmdəki bir çox mexanizm və sistemə mənfi təsir göstərir. Bununla yanaşı, hərəkətsiz həyat bəzi xərçəng növləri ilə də yaxından əlaqəlidir. Belə ki, ötən günlərdə dərc olunan bir araşdırmada hərəkətsiz həyatla əlaqəli xərçəng növləri üzrə bu günədək aparılmış tədqiqatlar qiymətləndirilmiş və əldə edilən məlumatlar hərəkətsiz həyatın xüsusilə yoğun bağırsaq xərçəngi, uşaqlıq xərçəngi və ağciyər xərçəngi ilə əlaqəsinin kifayət qədər güclü olduğunu ortaya qoymuşdur.

Aparılan araşdırma bu mövzuda indiyədək dərc olunmuş 43 tədqiqatın meta-analizidir. Meta-analiz müəyyən bir mövzuda aparılmış bir-birindən müstəqil çoxsaylı tədqiqatların nəticələrini birləşdirmək və əldə edilmiş tədqiqat nəticələrinin statistik təhlilini aparmaq üsuludur və sübut dəyəri ən yüksək olan tədqiqat metodudur. Bu araşdırmada 4 milyondan çox insana aid məlumatlar təhlil edilmiş və aparılan analizlər nəticəsində hərəkətsiz həyatın yoğun bağırsaq xərçəngi, uşaqlıq xərçəngi və ağciyər xərçəngi riskini artırdığı ortaya qoyulmuşdur. Bundan əlavə, hər gün hərəkətsiz keçirilən hər 2 saatın (televizor qarşısında, iş yerində, masa arxasında və ya digər hərəkətsiz fəaliyyətlər zamanı) yoğun bağırsaq xərçəngi riskini təxminən % 8, uşaqlıq xərçəngi riskini təxminən %10, ağciyər xərçəngi riskini isə təxminən %6 artırdığı bildirilmişdir. Bu vəziyyətdə xüsusilə ən böyük pay sahibi kimi televizor qarşısında keçirilən vaxt göstərilir. Çünki insanlar televizora baxarkən yüksək dərəcədə hərəkətsiz olmaqla yanaşı, daha çox zərərli qida və içki qəbul edir, bu da piylənməyə əhəmiyyətli dərəcədə töhfə verir. Bundan əlavə, televizorun, xüsusilə ağciyər xərçəngi başda olmaqla bir çox xərçəng növünə yol açan siqaretə başlama meylini də artırdığı məlumdur.

Əziz oxucularımız, insan sahib olduqlarının dəyərini yalnız onları itirdikdə anlayır və təəssüf ki, bunların başında sağlamlıq gəlir. Əksər insanlar özlərinin də bir gün xərçəng kimi ciddi xəstəliklərə tutula biləcəyini başlarına gələnə qədər heç düşünmürlər. Lakin hər il milyonlarla insan xərçəng səbəbindən həyatını itirir və bu xəstəlik həm onların özləri, həm də ətrafları üçün ciddi fəsadlara səbəb olur. Hər il dünyada xərçəngə tutulan təxminən 14 milyon insanın təxminən 8 milyonu bu xəstəlik səbəbindən həyatını itirir. Halbuki xərçəngin qarşısı alına bilən xəstəlikdir. Sağlam qidalanma, siqareti tərgitmək və idman etmək kimi gündəlik həyatda edilən kiçik dəyişikliklərlə bir çox xərçəng növünün qarşısını almaq mümkündür. Xahiş edirik, sağlamlığımızın dəyərini onu itirməzdən əvvəl bilək və lazımi tədbirləri görək. Bu istiqamətdə bir qədər daha hərəkətli həyat tərzini mənimsəməyə çalışaq. Əgər televizor və kompüter qarşısında keçirdiyimiz bütün bu vaxtı sevdiklərimizlə daha keyfiyyətli şəkildə keçirərək dəyərləndirsək, əmin olun ki, bu, həm sosial həyatımız, həm də fiziki və ruhi sağlamlığımız baxımından son dərəcə faydalı addım olacaqdır.

Sevdiklərinizlə birlikdə sağlam və xoşbəxt qalın..