Hunterin hamiləlikdə uşaqlığın anatomiyası 1774

Glasgow Universitetində tibb təhsili almış şotlandiyalı anatom və mama-ginekoloq William Hunter qeydlərində: "Anatomiya tibbin yeganə möhkəm təməlidir; astronom üçün həndəsə nədirsə, həkim və cərrah üçün də anatomiya odur. Həqiqəti kəşf edir və müəyyənləşdirir, xurafatı və geniş yayılmış səhvləri təkzib edir."

1764-cü ildə Hunter III. Georgeun həyat yoldaşı Kraliça Charlottenin həkimi oldu. III. George və Charlottenin 15 uşağı var idi və onlardan 13-ü yetkinlik yaşına qədər sağ qaldı. Hunterin həkimlik fəaliyyəti qısa müddətdə Londonda ən hörmətli və tanınmış praktikaya çevrildi. Onun ən böyük işi olan və 1774-cü ildə nəşr edilmiş Anatomia Uteri Umani Gravidi (Şəkillərlə insanın hamiləlikdə uşaqlığının anatomiyası), əsərində hollandiyalı tibbi rəssam Jan van Rymsdyklə işləyən Hunter hamilə qadının və dölün inkişafının müxtəlif mərhələlərində anatomiyanı izah etmişdir.

Hunter işinin başlanğıcını belə təsvir edir: 

“İlk qadın meyitim 1751-ci ildə hamiləliyinin sonuna çox az qalmış qəfil ölmüş bir qadın idi. Meyit nəzərəçarpacaq çürümə başlamazdan əvvəl əldə edilmişdi; fəsil disseksiya üçün uyğun idi. Hər hissə incəliklə və cəmiyyətin qəbul edə biləcəyi şəkildə öyrənildi və həqiqət beləliklə təsdiqləndi.”

Kosmosda üzən kiçik yetkin insan

Əvvəlki əsrdə bəziləri dölü kosmosda üzən kiçik yetkin insan formasında təsvir etsələr də, Hunterin təsvirləri insan inkişafına xüsusi və doğru baxış verən "universal dil"in yaranmasına öncüllük etdi.

Hunter anatomik disseksiyaların (meyit müayinələrinin) ictimaiyyəti şoka sala və narahat edə biləcəyini anladı və 1783-cü ildə anatomiya tələbələrinə belə yazdı:

"Ölü bədənlərin qanuni şəkildə əldə edilə bilmədiyi ölkədə anatomlar ictimaiyyətin narazılığını çəkməmək üçün xüsusilə kənarda nə baş verdiyinə diqqət yetirməlidirlər. Buna görə burada baş verənlər barədə, xüsusilə ölü bədənlərlə bağlı kənarda ehtiyatla danışılmasının vacibliyi unudulmamalıdır."

Məqalə şəklinin təsviri: William Hunterin The Anatomy of the Human Gravid Uterus Exhibited in Figures adlı əsərindən bir şəkil (1774).

Məqalədə adı çəkilən tarixi şəxslər: William Hunter (1718–1783), Jan van Rymsdyk (1730–1790), Charlotte of Mecklenburg-Strelitz (1744–1818)

• Əvvəlki mövzu: Labirinti kəşf etmək 1772 – Qulağın mürəkkəb labirinti 
• Növbəti mövzu: Xəstəxanalar 1784 - Xəyallarla dolu tikililər