İmmunoterapiya ilə 4-cü mərhələ ağciyər xərçəngində yaşam müddəti nə qədər artıb?

4-cü mərhələ kiçik hüceyrəli olmayan ağciyər xərçəngi (KHDAK) olan xəstələrin sağqalım göstəriciləri ABŞ-da bu xəstə qrupunda ilk immunoterapiya dərmanının 2015-ci ildə istifadəyə verilməsindən bəri artıb. Wang və həmkarlarının Cancer jurnalında 10 iyul 2024-cü ildə dərc etdikləri yeni tədqiqata görə, KHDAK bütün ağciyər xərçəngi hallarının 90%-nı təşkil edir və ABŞ-da həm kişilərdə, həm də qadınlarda xərçənglə əlaqəli həyat itkilərinin əsas səbəbidir.

190 min xəstənin nəticələri

Real həyat məlumatlarına əsaslanan bu tədqiqatda araşdırmaçılar ABŞ əhalisinin təxminən 48%-ni əhatə edən və xərçənglə bağlı məlumatları toplayan Milli Xərçəng İnstitutunun Müşahidə, Epidemiologiya və Nəticələr Məlumat Bazasından (SEER) istifadə ediblər. Tədqiqatda immunoterapiyanın standart müalicə kimi qəbul edilməsindən sonra, 2015–2020-ci illərdə müalicə almış 100995 metastatik KHDAK xəstəsi ilə immunoterapiyadan əvvəlki dövrdə, 2010-2014-cü illərdə müalicə almış 90807 xəstənin sağqalım göstəriciləri müqayisə edilib.

Qrafik: 4-cü mərhələ KHDAK diaqnozlu xəstələrdə immunoterapiyadan əvvəl və sonra sağqalım göstəriciləri

İmmunoterapiya dövründə müalicə olunan xəstələrdə əvvəlki dövrdə müalicə olunanlarla müqayisədə xərçəngə bağlı həyat itkisi riski daha az olub. 1, 3 və 5 illik xərçəngə spesifik sağqalım göstəriciləri müvafiq olaraq 44% və 36,8%, 21,7% və 14,4%, 14,3% və 9% kimi hesablanıb. Median sağqalım immunoterapiyadan sonrakı dövrdə 10 ay, əvvəlki dövrdə isə 8 ay olub.

Tədqiqatçılar yaş, cins, irq, gəlir və coğrafi bölgə kimi amillər nəzərə alındıqdan sonra da immunoterapiya dövründə sağqalım göstəricilərinin əhəmiyyətli dərəcədə yüksək qaldığını bildiriblər.

Şərh

Bu tədqiqat böyük milli məlumat bazasından istifadə edərək immunoterapiyanın ağciyər xərçəngi xəstələrinə müsbət təsirini göstərən güclü real dünya sübutları təqdim edir.

İmmunoterapiya müəyyən xəstə qrupunda uzunmüddətli fayda təmin edir. Lakin bu faydanın daha geniş xəstə qrupuna çatması üçün gələcək tədqiqatlar immunoterapiyanın effektivliyini artıra biləcək yeni preparatların hazırlanmasına yönəlməlidir.

Bu tədqiqat immunoterapiyanın KHDAK xəstələrinin sağqalım göstəricilərini necə yaxşılaşdırdığını ortaya qoyur və bu müalicənin daha geniş xəstə qrupuna çatması üçün atılmalı addımları vurğulayır.