Onkologiyada yeni dövr qeyd olunur – ESMO Konqresi 2022

Son illərdə xərçəng xəstələrinin diaqnostikası və müalicəsindəki böyük irəliləyiş xəstəlik mexanizmlərinin dərindən anlaşılmasını təmin edib. Bunda molekulyar və rəqəmsal alətlərdən istifadənin sürətlənməsinin rolu böyükdür.

Yeni dövr

"Müasir onkologiyada dərman məlumatlarının dəqiq tibb, biomarkerlər, rəqəmsal alətlər və süni intellekt ilə inteqrasiya edilməli olduğu dövrə daxil oluruq; buna görə onkoloqlar olaraq bu irəliləyişlərin tətbiqini necə optimallaşdıracağımız barədə müzakirələrimiz çox vacibdir." deyir konqresin həmsədrləri Fransadan Prof. Fabrice André və Böyük Britaniyadan Prof. Charles Swanton ESMO Konqresi 2022-nin elmi proqramını təqdim edərkən.

COVID-19 pandemiyası səbəbindən iki illik virtual görüşlər və məsafəli təqdimatlardan sonra illik ESMO toplantısı 9-13 Sentyabr 2022 tarixlərində Fransanın Paris şəhərində keçirilən üzbəüz təcrübə ilə qayıtdı. Paris Expo Porte de Versailles dünyanın hər yerindən gələn minlərlə nümayəndəyə qapılarını açacaq, şəxsən qatıla bilməyənlər isə tədbiri onlayn izləyə biləcəklər: 2021-də sınaqdan keçirilmiş yenilikçi LIVE Plus formatı bütün qeydiyyatlı iştirakçıların istifadə edə biləcəyi tamfunksiyalı virtual platformada canlı sessiyalar və onlayn ünsiyyət imkanı verir.

"Xəstəliyi anlamaq, xərçəng xəstələrinə daha yaxşı qayğı göstərmək"

Konqresə 3400 elmi tədqiqat təqdim edilib; bunların 1913-ü xülasə, 76-sı isə late breaking abstract (son anda təqdim edilən diqqətçəkən tədqiqat) olmaqla elmi proqram builki "Xəstəliyi anlamaq, xərçəng xəstələrinə daha yaxşı qayğı göstərmək üçün" şüarını sadəcə şüar olmaqdan çıxarır. Xüsusilə solid (qan və sümük iliyi mənşəli olmayan) xərçənglər üçün yeni dərmanlar, süni intellektlə idarə edilən alətlər, maye biopsiya və CAR T hüceyrə müalicəsi daxil olmaqla gələcək xərçəng müalicəsini yaxşılaşdırmağı vəd edən yeniliklər qarşımızdadır. Prof. Dr. Swanton "ESMO Konqresi 2022 aparıcı fikir sahibləri ilə ünsiyyət qurmaq və onkologiyanın bu aktual mövzularını müzakirə etmək üçün əla fürsət olacaq" deyir.

Onkologiyanın dayanıqlılığı da bu il tədbirin mərkəzində olacaq. Səhiyyə resurslarının tükənməsinin qarşısını almağa yönəlmiş tədbirlər resursların uzunmüddətli mövcudluğunu və xərçəng müalicəsinə ehtiyacı olan hər kəs üçün əlçatanlığını təmin edəcək.

ESMO prezidenti Prof. Solange Peters, "ESMO-nun ümumi səhiyyə sisteminin dayanıqlılığına töhfə verə biləcəyi və artıq verdiyi ilk mühüm yol onkoloqların peşəkar inkişafını dəstəkləmək və gündəlik praktikalarında onlara kömək etməkdir" deyir və əlavə edir: "Lakin müəyyən səhiyyə sistemində onkoloqların sayı xidmət etdikləri xəstələrin ehtiyaclarına uyğun deyilsə, həkimləri işlərində dəstəkləmək səyləri təkbaşına peşəmizin dayanıqlılığını təmin edə bilməz. Buna görə ESMO profilaktika və xərçəng skrininqinə konkret öhdəlik götürərək, hər onkoloqun fəaliyyət göstərdiyi mühitə qayğı ilə yanaşaraq xərçəngin səhiyyə resurslarına ümumi təsirini minimuma endirmək üçün çalışır." Bu istiqamətdə Cəmiyyət bir neçə ildir Ümumdünya Səhiyyə Təşkilatının (ÜST) 2023-də istifadəyə veriləcək WHO-IARC Milli Xərçəngə Nəzarət Prioritetlərinin Müəyyənləşdirilməsi və Xərc Hesablama Alətinin hazırlanması və pilot tətbiqində əsas strateji tərəfdaşıdır. Alət hökumətlərə dünyada COVID-19 pandemiyasından təsirlənmiş xərçəng xidmətlərinin əsasını təşkil edən milli xərçəngə nəzarət planlarını genişləndirməyə kömək edəcək. Pandemiyadan öyrənilən çətinliklər və dərslər barədə 12 Sentyabr bazar ertəsi ÜST ilə əməkdaşlıqda tədris sessiyası keçiriləcək.

Onkologiyanın dayanıqlılığına töhfə verə biləcək təcili və asan addımlar arasında ESMO-nun əsas jurnalı Annals of Oncology nəşrinin rəqəmsallaşdırılması və üzbəüz tədbirlərdə kağız və plastik istifadəsinin məhdudlaşdırılması var.

9 Sentyabr cümə axşamı açılış sessiyası ilə başlayan ESMO Konqresi 2022 təklif olunan məruzələr və qısa şifahi sessiyalar, açılış çıxışları və onkologiyanın aktual mövzularında müzakirə sessiyaları ilə beş gün ərzində elmi yenilikləri dərindən araşdıracaq.

Qeydiyyatlı istifadəçilər interaktiv söhbət və sual-cavab sessiyalarına, təqdimatların yayımına canlı qoşula biləcəklər. Elmi sessiyalar, ePoster-lər, peyk simpoziumları və tədbirdən sonrakı materiallar isə sorğu üzrə OncologyPRO platformasında təqdim ediləcək. Qeydiyyat sistemi konqres boyu açıq qalacaq.