Plevral mezoteliomanın birinci sıra müalicəsində pembrolizumab ümumi sağqalımı uzadır

Plevral mezotelioma adətən asbestə məruz qalma ilə əlaqələndirilən və ağciyər qişasını təsirləndirən aqressiv xərçəng növüdür. Son araşdırmalar irəli mərhələli plevral mezotelioma xəstələri üçün yeni müalicə seçimi təqdim edir. The Lancet jurnalında yayımlanan araşdırmaya görə, təsiredici maddəsi pembrolizumab olan immunoterapiya dərmanının platin-pemetreksed əsaslı kimyaterapiya ilə birləşdirilməsi bu ciddi xəstəliyi olan insanların sağqalım müddətini əhəmiyyətli dərəcədə yaxşılaşdıra bilər.

Faza 3 çərçivəsindəki bu çoxmərkəzli, açıq etiketli tədqiqatda cərrahi müdaxilə üçün uyğun olmayan, əvvəllər müalicə almamış irəli mərhələli plevral mezotelioma xəstələri araşdırıldı. Tədqiqata qatılan 440 xəstənin 218-nə yalnız kimyaterapiya, 222-nə isə pembrolizumab əlavə olunmaqla kimyaterapiya tətbiq edildi.

Nəticələr

Araşdırmanın nəticələrinə görə;

• Pembrolizumab əlavə edilmiş kimyaterapiya alan xəstələrdə median ümumi sağqalım müddəti 17,3 ay olduğu halda, yalnız kimyaterapiya alanlarda bu müddət 16,1 ay idi (HR 0,79; 95% CI 0,64–0,98, p=0·0324).
• Bundan əlavə, pembrolizumab əlavə olunmaqla müalicə edilən xəstələrdə ikiillik ümumi sağqalım göstəricisi 39%, üçillik göstərici isə 25% olaraq müşahidə edildiyi halda, yalnız kimyaterapiya alan xəstələrdə bu göstəricilər müvafiq olaraq 33% və 17% olaraq müəyyənləşdirildi.
• Pembrolizumab əlavə edilən müalicə qrupunda median proqressiyasız (irəliləməsiz) sağqalım müddəti 7,13 ay olduğu halda, yalnız kimyaterapiya alan qrupda bu müddət 7,16 aydır.
• Müalicəyə obyektiv cavab göstəricilərinə baxıldıqda isə pembrolizumab alan qrupda 62%, yalnız kimyaterapiya alan qrupda isə 38% olduğu müəyyən edildi.

Müalicə ilə əlaqəli istənilən dərəcəli yan təsirlər hər iki qrupda da yüksək nisbətdə müşahidə edildi: 98%-ə qarşı 95%. Ən çox rast gəlinən yan təsirlər yorğunluq və ürəkbulanma olaraq sıralanmışdır. Pembrolizumab alan xəstələrdə ishal, dəri təsirləri və mielosupressiya daha çox görülmüşdür. Dərəcə (ciddi) 3-4 yan təsirlər pembrolizumab alan xəstələrin 27%-də, yalnız kimyaterapiya alanların isə 15%-də meydana gəldi.

Yekun

Bu nəticələrin işığında platin-pemetreksed kimyaterapiyasına pembrolizumab əlavə edilməsinin PD-L1 ifadəsindən asılı olmayaraq ümumi sağqalımı, proqressiyasız sağqalımı və obyektiv cavab göstəricilərini yaxşılaşdırdığı görünür. Kiçik hüceyrəli olmayan ağciyər xərçənginin müalicəsindən yaxşı tanıdığımız bu rejim əməliyyat edilə bilməyən plevral mezoteliomanın birinci sıra müalicəsi üçün yeni müalicə seçimi kimi qarşımızda durur.

*

Şəklin izahı: Yazının şəkli ChatGPT 4.0 tərəfindən bu əmrlə yaradılmışdır: "Ağciyər qişasının abstrakt bədii təsviri"

*

Xarici məzmunu görmək üçün seçimləri tənzimləyin