Tenosinovial nəhəng hüceyrəli şişin müalicəsində vimseltinib FDA təsdiqi aldı

14 fevral 2025 tarixində ABŞ Qida və Dərman İdarəsi (FDA) yetkin xəstələrdə simptom verən tenosinovial nəhəng hüceyrəli şişin (TGCT: tenosynovial giant cell tumor) müalicəsi üçün  vimseltinib (Romvimza, Deciphera Pharmaceuticals, LLC) adlı kinaza inhibitorunu təsdiqlədi. Preparat şişin cərrahi çıxarılmasının funksional məhdudiyyəti artıra və ya ciddi əlavə problemlərə səbəb ola biləcəyi hallar üçün hazırlanıb.

Vimseltinib: TGCT müalicəsində ikinci FDA təsdiqi

Koloniya stimullaşdırıcı faktor 1 reseptorunun (CSF1R) inhibitoru olan vimseltinib 2019 ilində təsdiqlənən pexidartinibdən (Turalio, Daiichi) sonra ABŞ bazarında bu göstəriş üçün təsdiqlənən ikinci preparat oldu. Bundan əlavə, Merck tərəfindən hazırlanan üçüncü CSF1R inhibitoru da klinik inkişaf mərhələsindədir.

TGCT nədir və niyə əhəmiyyətlidir?

Tenosinovial nəhəng hüceyrəli şiş (TGCT) oynaqları, bursaları və vətərləri əhatə edən sinovial membranda yaranan, bədxassəli olmayan (xoşxassəli) şişdir. ABŞ-da illik rastgəlmə tezliyi hər milyon nəfərə 1 ilə 2 hal kimi hesablanır. TGCT müalicəsində cərrahiyyə adətən ilk seçimdir.

Bu xəstəlik CSF1 geninin tənzimlənməsinin pozulması nəticəsində həddindən artıq CSF1 istehsalı ilə yaranır. Bu isə sinovial qişada CSF1-müsbət makrofaqların toplanmasına səbəb olur. Həm vimseltinib, həm də pexidartinib CSF1 siqnal yolunu bloklayaraq bu prosesin qarşısını almağı hədəfləyir.

MOTION araşdırması ilə gələn FDA təsdiqi

Vimseltinibin təsiri MOTION (NCT05059262) adlı ikiqat kor, çoxmərkəzli, randomizə edilmiş (2:1 nisbətində), plasebo nəzarətli klinik araşdırmada qiymətləndirilib.

Araşdırmaya cərrahi rezeksiyanın funksional məhdudiyyəti artıra və ya ciddi xəstələnməyə səbəb ola biləcəyi TGCT xəstələri daxil edilib.

İştirakçıların şişləri RECIST v1,1 meyarlarına görə ölçülə bilən olmalı, ən azı bir ocağın ölçüsü 2 cm və ya daha böyük olmalı idi.

Xəstələr 24 həftə ərzində həftədə iki dəfə 30 mg vimseltinib və ya plasebo almaq üçün randomizə ediliblər.

Araşdırma iki mərhələdən ibarət olub:

1. İkiqat kor dövr və
2. Açıq etiketli dövr

Açıq etiketli dövrdə vimseltinib qəbulunu davam etdirən xəstələrlə yanaşı, plasebo alan xəstələr də vimseltinib müalicəsinə keçə biliblər.

Randomizasiya şişin yerləşməsinə (aşağı ətraf və ya digər nahiyələr) və coğrafi mövqeyə (ABŞ və digər ölkələr) görə aparılıb.

Ümumilikdə 123 xəstə araşdırmaya daxil edilib: 83 xəstə vimseltinib, 40 xəstə isə plasebo qoluna ayrılıb.

Araşdırmanın nəticələri

Əsas təsirlilik meyarı 25-ci həftədə müstəqil kor radioloji baxışla qiymətləndirilən ümumi cavab tezliyi olub. Nəticələr belədir:

• Vimseltinib qolunda ümumi cavab tezliyi 40% (95% CI: 29%, 51%)
• Plasebo qolunda 0% (95% CI: 0%, 9%) (p<0,0001)

Vimseltinib qolunda median cavab müddətinə hələ çatılmayıb. Əlavə 6 aylıq izləmə zamanı cavab verən 28 xəstədə (85%) cavab müddəti ən azı 6 ay davam edib, 19 xəstədə (58%) isə 9 ayı keçib.

Həmçinin vimseltinib alan xəstələrdə 25-ci həftədə plasebo ilə müqayisədə aktiv hərəkət amplitudasında, xəstənin bildirdiyi fiziki funksiyalarda və ağrı göstəricilərində statistik əhəmiyyətli yaxşılaşmalar müşahidə olunub.

Yan təsirlər və istifadə qaydaları

Ən çox rast gəlinən yan təsirlər (20% və daha çox) bunlardır:

• Laborator göstəricilərdə pozğunluqlar: Aspartat aminotransferazanın (AST), alanin aminotransferazanın (ALT) və xolesterinin artması, neytrofillərin və leykositlərin azalması
• Klinik simptomlar: Göz ətrafında ödem, yorğunluq, səpgi, periferik ödem, üzün ödemi və qaşınma

Vimseltinib üçün tövsiyə olunan doza, 72 saatlıq fasilələrlə həftədə iki dəfə ağızdan qəbul edilən 30 mg tablet kimi müəyyən edilib.

Nəticə və klinik əhəmiyyəti

Vimseltinib tenosinovial nəhəng hüceyrəli şişin (TGCT) müalicəsində cərrahiyyəyə uyğun olmayan və ya cərrahiyyənin ciddi ağırlaşmalara səbəb ola biləcəyi xəstələr üçün mühüm seçim kimi təsdiqlənib. Klinik araşdırmalardakı məlumatlar preparatın xəstələrdə obyektiv cavab tezliyini artırdığını və həyat keyfiyyətini nəzərəçarpacaq dərəcədə yaxşılaşdırdığını göstərib.

Bununla yanaşı, preparatın uzunmüddətli təsiri və təhlükəsizlik profili barədə daha çox məlumat əldə etmək üçün sonrakı izləmə araşdırmaları vacibdir. Vimseltinib CSF1R inhibitorları arasında cərrahiyyəyə alternativ müalicə kimi yeni seçim təqdim edir.