ადელის საოცარი ცვლილება წონის დაკლებით და პოპულარული SIRTFOOD დიეტა!
ამ სტატიაში
ბრიტანელი მუსიკოსის, ხმით მსმენელების მომნუსხველი და მსოფლიოში მრავალი თაყვანისმცემლის მქონე ადელის საოცარმა ცვლილებამ სოციალურ მედიაში დიდი გამოხმაურება გამოიწვია. გავრცელებული ცნობების შემდეგ, რომ ადელმა Sirtfood დიეტით მნიშვნელოვნად დაიკლო, კვების ეს მოდელი პოპულარული გახდა. SirtFood ჩვენს ცხოვრებაში პირველად 2016 წელს ფარმაცევტ Aidan Goggins-ისა და კვების სპეციალისტ Glen Matten-ის წიგნით „Sirtfood Diet“ შემოვიდა.
რა არის SIRTFOOD დიეტა?
SirtFood დიეტის მთავარი მიზანია კალორიების შეზღუდვასთან ერთად, სირტუინის სახელწოდების ცილის გამააქტიურებელი საკვების მიღება. სირტუინი ცილაა, რომელიც უჯრედებს დაავადებით გამოწვეული სიკვდილისა თუ ანთებისგან იცავს. მოცვი, მარწყვი, წითელი ღვინო და შავი შოკოლადი sirt საკვების კატეგორიის სათავეშია, ხოლო სირტუინის აქტივაციის გამზრდელი სხვა პროდუქტებია; მწვანე ჩაი, ხახვი, ნიახური, ოხრახუში, რუკოლა, მედინის ფინიკი, კაპარი, კურკუმა, კომბოსტო, ნიგოზი, წიწიბურა და ციტრუსები. წითელი ხორცის, რძისა და რძის პროდუქტების, თევზისა და ფრინველის მიღება შეზღუდული რაოდენობით არის ნებადართული.
მტკიცდება, რომ პოლიფენოლებით მდიდარი საკვებისგან შემდგარ Sirtfood დიეტას აგრეთვე ანთების საწინააღმდეგო და და ანტიოქსიდანტური მოქმედება შეიძლება ჰქონდეს. მასში შემავალი პროდუქტები ხშირად მიიღება მსოფლიოს Blue Zone/ ლურჯ ზონებად წოდებულ ყველაზე ხანგრძლივი სიცოცხლის მქონე რეგიონებშიც. ზოგი კვლევის მიხედვით, სირტუინის გამააქტიურებელი საკვები მეტაბოლიზმს აჩქარებს და სიცოცხლეს შეიძლება ახანგრძლივებდეს. თუმცა პროდუქტების სიჯანსაღის მიუხედავად, SirtFood კალორიაშეზღუდული დიეტაა, რაც სხვა საფრთხეებს ქმნის. ამიტომ მისი ეფექტების განსახილველად უფრო ფართო სამეცნიერო კვლევებია საჭირო. Sirtfood დღეში 1000-დან 1500 კალორიამდე შეზღუდულ კვებას გვთავაზობს. იგი ორ ეტაპს მოიცავს.
- 1. ეტაპი (7 დღე); პირველ 3 დღეს 1,000 კალორიის შეზღუდვით sirt საკვების შემცველი ერთი კვება და 3 ულუფა მწვანე სასმელი უნდა მიიღონ; კვირის დარჩენილ დღეებში კი 1,500 კალორიის შეზღუდვით 2 კვება და 2 მწვანე სასმელი.
- 2. ეტაპი (14 დღე); ცნობილია დიეტის შენარჩუნებისა და გაგრძელების ეტაპად. დღეში Sirtfood რეცეპტით მომზადებული 3 ძირითადი კვება და 1 მწვანე სასმელი უნდა მიიღონ.
ავტორები ამტკიცებენ, რომ Sirtfood დიეტა ერთჯერადი კურსი კი არა, ცხოვრების წესია. ამბობენ, რომ მსურველებს შემდგომი წონის დასაკლებად ამ ორი ეტაპის გამეორება შეუძლიათ. პირველი 3 კვირის შემდეგ Sirtfoods-ით მდიდარი რაციონისა და ყოველდღიურად მომზადებული მწვანე წვენის გაგრძელებას ურჩევენ.
SirtFood ჯანსაღი და მდგრადი დიეტა არ არის!
მართალია, მასში შემავალი საკვები სასარგებლოდ ჩანს, მაგრამ რაციონის მრავალფეროვნება მცირეა. არ არსებობს მტკიცებულება, რომ მხოლოდ კონკრეტული ტიპის საკვები ორგანიზმს სარგებელს მოუტანს. განსაკუთრებით sirt საკვების სიაში არმყოფი ცილით მდიდარი ცხოველური და მცენარეული პროდუქტები — ქათამი, თევზი, პარკოსნები, ჯანსაღი ცხიმები და მთლიანი მარცვლეული ძალიან შეზღუდულად ან საერთოდ არ გამოიყენება.
„Harvard Health“-ის მოსაზრებით, 1,500 კალორიაზე ნაკლები დიეტები ჯანსაღი ან მდგრადი არ არის და მალნუტრიციის / არასრულფასოვანი კვების რისკს შეიძლება ქმნიდეს.
კალორიების ეს ოდენობა ბავშვისთვისაც არასაკმარისია და, რა თქმა უნდა, მოზრდილის საქმიანობის ენერგეტიკულ მოთხოვნილებასაც ვერ დააკმაყოფილებს. SirtFood-ის მსგავსი მკაცრი კალორიული/ენერგეტიკული შეზღუდვის დიეტებისას ორგანიზმი ცხიმსა და კუნთებთან ერთად გლიკოგენსაც ხარჯავს. გლიკოგენის თითო მოლეკულა წყლის 3-4 მოლეკულის შენახვას საჭიროებს. ენერგიის ნაკლებობისას გლიკოგენის მოხმარებასთან ერთად ორგანიზმი წყალს კარგავს. მკაცრად კალორიაშეზღუდული დიეტების პირველ კვირაში დაკარგული წონის მხოლოდ მესამედია ცხიმი; დანარჩენი ორი მესამედი წყალი, კუნთი და გლიკოგენია.
ამასთანავე, წიგნში Sirtfood Diet მოცემულია პილოტური კვლევის შედეგები, რომელიც, ავტორების მტკიცებით, თავად ჩაატარეს ფიტნესცენტრების 39 მონაწილეზე. კვლევის მიხედვით, მონაწილეები ერთი კვირა დიეტას იცავდნენ და ყოველდღე ვარჯიშობდნენ. კვირის ბოლოს საშუალოდ 7 კილო დაიკლეს და კუნთოვანი მასა შეინარჩუნეს ან გაზარდეს კიდეც.
თუმცა ეს შედეგები გასაკვირი არ უნდა იყოს. ყოველდღიური მიღების 1000 კალორიამდე შეზღუდვა და ერთდროული ვარჯიში თითქმის ყოველთვის წონის კლებას გამოიწვევს. კალორიების გაზრდისას კი ორგანიზმი გლიკოგენის მარაგს აღადგენს და დაკარგული წონა დაბრუნდება.
ექსპერტები აფრთხილებენ, რომ SirtFood-ის დაბალკალორიულობამ თავიდან შეიძლება თავის ტკივილი, თავბრუსხვევა და სისუსტე გამოიწვიოს. აგრეთვე ამბობენ, რომ მისი გამოყენება ჯანმრთელობისთვის სახიფათო შეიძლება იყოს დიაბეტის მქონე პირებისთვის, მანამდე კვებითი აშლილობის დიაგნოზის მქონე პაციენტებისა და ენერგომოთხოვნად სამუშაოზე დასაქმებული აქტიური ადამიანებისთვის.
დასკვნა
მიუხედავად იმისა, რომ Sirtfood თითქოს ჯანსაღი საკვებისგან შედგება, არჩევანის ძალიან ვიწრო ფარგლებით შეზღუდვა პრობლემაა. მკაცრი კალორიული შეზღუდვისა და მნიშვნელოვანი საკვები ჯგუფების გამორიცხვის გამო გრძელვადიანად ორგანიზმზე საზიანო გავლენაა მოსალოდნელი. აქტიური ცხოვრების წესის, ქრონიკული დაავადებისა თუ კვებითი აშლილობის ისტორიის მქონე პირებში იგი განსაკუთრებით სახიფათოც შეიძლება იყოს.
ამიტომ, მართალია, მწვანე ჩაით, მარწყვით, შოკოლადითა და ცოტა ღვინით წონის კლება სასიამოვნოდ ჟღერს, მაგრამ მსგავს მოდურ დიეტაზე გადასვლამდე ექიმთან და კვების სპეციალისტთან კონსულტაცია სწორი იქნება. ხანმოკლე პოპულარობის დიეტებით მოტყუების ნაცვლად წლების განმავლობაში დამტკიცებული ჯანმრთელობის სარგებლის მქონე მოდელები უნდა ავირჩიოთ. ხმელთაშუაზღვის დიეტის მსგავსი, ყველა საკვები ჯგუფის დაბალანსებულად შემცველი მოდელით შეგვიძლია ჯანსაღად დავიკლოთ და ჯანმრთელობა გავიუმჯობესოთ. *
წყაროები
Demand is rising for Adele's rumored weight-loss plan, the sirtfood diet. Here's how it works.
insider.com - 27 Mayıs 2020.
2. Taylor Jones.
The Sirtfood Diet: A Detailed Beginner's Guide.
healthline.com/nutrition/sirtfood-diet - 13 Ağustos 2017.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.