ადრეული ძუძუს კიბოს დროს იღლიის ოპერაციების უსაფრთხოდ შემცირება შეგვიძლია
ამ სტატიაში
2018 წლის San Antonio-ს ძუძუს კიბოს სიმპოზიუმზე წარდგენილი AMAROS კვლევის 10-წლიანმა შედეგებმა ადრეული ძუძუს კიბოს დროს იღლიაში ჩასატარებელი მინიმალური ქირურგიის პლუს რადიოთერაპიის საკმარისობა და ლიმფური კვანძების ფართო გაწმენდის დამატებითი სარგებლის არარსებობა აჩვენა.
ბოლო წლებში ძუძუს კიბოს მკურნალობაში გადაჭარბებულ ქირურგიასმინიმალურად ინვაზიური მეთოდები ანაცვლებს. ცნობილია, რომ ძუძუს ქირურგიული ტექნიკა დღითიდღე მსუბუქდება და აგრესიული ოპერაციებისგან თავის შეკავება დამატებით რეციდივის რისკს კი არ ქმნის, არამედ ცხოვრების ხარისხის მხრივაც უპირატესობას იძლევა.
იღლიად ცნობილი აქსილარული უბნის ლიმფური კვანძების გადაჭარბებული ქირურგია იწვევს არასასურველ მდგომარეობებს, როგორიცაა მხრის მოძრაობის შეზღუდვა, ლიმფედემის რისკის მატება და ცხოვრების ხარისხის გაუარესება. ასეთი ოპერაციები აქამდე განმეორების რისკის მინიმიზაციისთვის ტარდებოდა. თუმცა კვლევები აჩვენებს, რომ ეს მიდგომა უკვე უნდა მივატოვოთ.
AMAROS სახელწოდების ფაზა-3 კლინიკური კვლევის დეტალები
კვლევაში კლინიკურად კვანძ-უარყოფითი (გასინჯვით ან ონკოლოგიური გამოსახვით იღლიაში კიბოს არმქონე) ძუძუს კიბოს მქონე 4806 პაციენტი ჩაერთო. შემდეგ 1425 პაციენტში იღლიის სენტინელური (მცველი) ლიმფური კვანძის ბიოფსია დადებითი აღმოჩნდა და კვლევა ამ ქვეჯგუფით გაგრძელდა. ისინი შემთხვევითად 2 ჯგუფში განაწილდნენ: 744-ს აქსილარული კვანძების დისექცია (ფართო იღლიის ოპერაცია), 681-ს კი აქსილარული რადიოთერაპია ჩაუტარდა.
კვლევის შედეგები 10 წლის შემდეგ:
- აქსილარული რადიოთერაპიის მიმღებთა % 1.8-ში (681-დან 11) და ლიმფური კვანძების დისექციის მიმღებთა % 0.9-ში (744-დან 7) იღლიის უბანში კიბოს განმეორება გამოვლინდა.
- ამასთან, შორეული მეტასტაზებისგარეშე გადარჩენა და საერთო გადარჩენა ორ სამკურნალო ჯგუფში არ განსხვავდებოდა. შორეული მეტასტაზების გარეშე გადარჩენა რადიოთერაპიის ჯგუფში % 78.2, დისექციის ჯგუფში % 81.7 იყო; საერთო გადარჩენა შესაბამისად % 81.4 და % 84.6.
- რადიოთერაპიის მიმღებებში ფართო იღლიის ოპერაციასთან შედარებით უფრო ხშირი იყო მეორეული ძუძუს კიბო (% 11 შედარებით % 7.7). ვარაუდობდნენ, რომ განსხვავება ძირითადად ძველი რადიოთერაპიული მოწყობილობების დამიზნების დაბალ უნარსა და მეორე ძუძუს უნებლიე დასხივებას შეიძლება უკავშირდებოდა. თანამედროვე რადიოთერაპიის ტექნიკით მოსალოდნელია ამ მოულოდნელი მოვლენის არარსებობა ან შემცირება.
დასკვნის სახით ამ ჯგუფში იღლიის რადიოთერაპია ფართო ლიმფური გაწმენდის მსგავსად კარგ და ნაკლები გვერდითი ეფექტების მქონე არჩევანად ჩანს.
წყაროები
Radiotherapy or surgery of the axilla after a positive sentinel node in breast cancer patients: 10 year follow up results of the EORTC AMAROS trial (EORTC 10981/22023).
SABCS 2018, Abstract GS4-01
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.