Erkən mərhələ süd vəzi xərçəngində qoltuqaltı əməliyyatlarını təhlükəsiz azalda bilərik

2018 San Antonio Süd Vəzi Xərçəngi Simpoziumunda təqdim edilən AMAROS tədqiqatının 10 illik nəticələri erkən mərhələ süd vəzi xərçəngində aksillaya (qoltuqaltına) tətbiq edilən minimal cərrahiyyə üstəgəl radioterapiyanın kifayət etdiyini, geniş limfa düyünü təmizlənməsinin əlavə töhfə vermədiyini göstərdi.

Son illərdə süd vəzi xərçənginin müalicəsində həddindən artıq cərrahiyyəyerini minimal invaziv cərrahi üsullara verir. Süd vəzisində cərrahi üsulların getdikcə yumşaldığı, aqressiv əməliyyatlardan uzaq durmağın əlavə təkrarlanma riski yaratmadığı kimi həyat keyfiyyəti baxımından da üstünlük təmin etdiyi məlumdur.

Qoltuqaltı kimi tanınan aksillyar sahədəki limfa düyünlərinə həddindən artıq cərrahiyyə xəstələrdə çiyin məhdudluğu, limfödem riskinin artması və həyat keyfiyyətinin pozulması kimi arzuolunmaz hallara səbəb olur. İndiyədək bu əməliyyatlar təkrarlanma riskini minimuma endirmək üçün edilirdi. Lakin tədqiqatlar bu yanaşmadan artıq imtina edilməli olduğunu göstərir.

AMAROS adlı faza-3 klinik tədqiqatın təfərrüatları

Tədqiqata klinik olaraq düyün-mənfi (müayinə və ya onkoloji görüntüləmə ilə qoltuqaltında xərçəng aşkarlanmayan) süd vəzi xərçəngli 4806 xəstə daxil edildi. Sonra 1425 xəstədə qoltuqaltı sentinel (gözətçi) limfa düyünü biopsiyası xərçəng baxımından müsbət oldu və bu alt qrupla davam edildi. Xəstələr təsadüfi 2 qola bölündü; 744 xəstəyə aksillyar limfa düyünü disseksiyası (geniş qoltuqaltı əməliyyatı), 681 xəstəyə isə aksillyar radioterapiya tətbiq edildi.

Tədqiqatın nəticələri 10 il sonra;

• Aksillyar radioterapiya alanların % 1.8 hissəsində (681 xəstənin 11-ində) və limfa düyünü disseksiyası edilənlərin % 0.9 hissəsində (744 xəstənin 7-sində) qoltuqaltı nahiyədə xərçəngin təkrarı aşkarlandı.
• Əlavə olaraq, uzaq metastazolmadan sağqalım və ümumi sağqalım iki müalicə qolu arasında fərqlənmirdi. Uzaq metastazsız sağqalım aksillyar radioterapiya alanlarda % 78.2, disseksiya qrupunda % 81.7 idi; ümumi sağqalım isə iki qolda müvafiq olaraq % 81.4 və % 84.6 idi.
• Radioterapiya alanlarda geniş qoltuqaltı əməliyyatı edilənlərə nisbətən ikincili süd vəzi xərçəngi daha çox görüldü (% 11-ə qarşı % 7.7). Bunun əsasən köhnə radioterapiya cihazlarının hədəflənmiş şüalandırma imkanının azlığı və qarşı süd vəzinin də istəmədən şüalanması ilə bağlı ola biləcəyi düşünüldü. Müasir radioterapiya üsulları ilə bu gözlənilməz halın görülməməsi və ya daha az görülməsi gözlənilir.

Nəticə olaraq qoltuqaltına radioterapiya bu xəstələrdə geniş limfa düyünü təmizlənməsi qədər yaxşı və daha az yan təsir yaradan seçim kimi görünür.