ASCO 2020 პედიატრიული ონკოლოგიის ჯილდო ნეირობლასტომის მკურნალობის ახალი მიდგომის პიონერს, დოქტორ Alice Yu-ს გადაეცა
ამ სტატიაში
მედიცინაში 40-ზე მეტი ხნის კარიერის მქონე დოქტორი Alice Yuხელმძღვანელობს აშშ-ის სან-დიეგოში მდებარე Rady ბავშვთა საავადმყოფოს პედიატრიულ განყოფილებას. აქ ჩატარებული კვლევებით მან არაცილოვანი ანტიგენისკენ მიმართული პირველი წარმატებული იმუნოთერაპიის შემუშავებას ჩაუყარა საფუძველი . დოქტორი Yu ასევე ბავშვთა ონკოლოგიური ჯგუფის (COG) ნეირობლასტომის მმართველი კომიტეტის წევრია და ნეირობლასტომის კვლევებს მიმართულებას აძლევს.
კალიფორნიის უნივერსიტეტის სან-დიეგოს სამედიცინო სკოლის ექიმმა Alice Yu-მ (MD, PhD) პედიატრიულ ონკოლოგიაში შეტანილი წვლილისთვის ASCO 2020 პედიატრიული ონკოლოგიის ჯილდო მიიღო. ეს ჯილდო პირველად 2002 წელს გადაეცა დოქტორ Alfred G. Knudson-ს (MD, PhD) ბავშვთა ონკოლოგიაში გამორჩეული ლიდერობისა და მიღწევებისთვის. დოქტორი Yu ამბობს, რომ კარიერის დასაწყისში, მედიცინის სტუდენტობისას, პედიატრიულ ონკოლოგიას არ გეგმავდა. გავეცნოთ მის ინტერვიუს ამერიკის კლინიკური ონკოლოგიის საზოგადოებასთან (ASCO-Daily News).
შენიშვნა: ნეირობლასტომა ნერვული სისტემიდან წარმოშობილი კიბოა; ეს სისტემა ტვინიდან მთელ სხეულს გადასცემს შეტყობინებებს. ის ჩვეულებრივ თირკმელზედა ჯირკვლების ნერვულ უჯრედებში იწყება. თირკმელზედა ჯირკვლები გამოყოფს მნიშვნელოვან ჰორმონებს, რომლებიც გულისცემას, წნევასა და სისხლში შაქარს არეგულირებს. ნეირობლასტომა ხშირად ადრეულ ბავშვობაში გვხვდება.
„იმ დროს ნეირობლასტომის მქონე ბავშვების დიდი უმრავლესობა იღუპებოდა და ვფიქრობდი, რომ ამ სფეროში მუშაობა არ მომეწონებოდა. თუმცა რეზიდენტურისას ლეიკემიის მქონე მრავალი ბავშვის სიცოცხლის გახანგრძლივებამ იმედი მომცა, რომ იგივე წარმატება პედიატრიულ ონკოლოგიაშიც იქნებოდა შესაძლებელი.“ სიცოცხლის გახანგრძლივებისა და ნეირობლასტომისა და სხვა ბავშვთა კიბოების მკურნალობის განვითარების ფონზე დოქტორი Yu კარიერის არჩევანით ბედნიერია. მან დაამატა: „ეს ამაღელვებელი სფეროა. მიუხედავად იმისა, რომ პროფესიული ცხოვრების დასაწყისში მის მიმართ დიდი ინტერესი არ მქონდა, ჩემი არჩევანით ძალიან კმაყოფილი ვარ“. რომელი კვლევა გახდა მის კარიერაში მნიშვნელოვანი გარდამტეხი მომენტი?
გადაწყვეტილებითა და შეუპოვრობით შექმნილი კიბოს ახალი პრეპარატი
უჯრედის მემბრანის გარე ზედაპირზე არსებული გლიკოსფინგოლიპიდებისგან შემდგარი განგლიოზიდები მნიშვნელოვან როლს ასრულებს უჯრედშორის კომუნიკაციაში, ზრდასა და დიფერენცირებაში. განგლიოზიდების ჯგუფის დისიალოგანგლიოზიდი GD2 მრავალი სიმსივნის, მათ შორის ნეირობლასტომის, ზედაპირზეა წარმოდგენილი. დოქტორმა Yu-მ შეამჩნია, რომ ის მკურნალობისთვის კარგი ბიომარკერი იყო და შექმნა დღეს დინუტუქსიმაბის სახელით ცნობილი anti-GD2 ანტისხეული (კოდური სახელი ch14.18). ანტისხეული კიბოს უჯრედების ზედაპირზე არსებულ GD2-ს უკავშირდება, იმუნური უჯრედების ამ უბანში მიზიდვას იწვევს და სიმსივნური უჯრედების განადგურებას უზრუნველყოფს. კლინიკურ კვლევებში მაღალი რისკის ნეირობლასტომის მქონე პაციენტების სიცოცხლის გახანგრძლივება დაფიქსირდა და პრეპარატი 2015 წელს აშშ-ის სურსათისა და წამლის ადმინისტრაციამ (FDA) დაამტკიცა. GD2-თან დასაკავშირებლად შექმნილი მონოკლონური ანტისხეული დინუტუქსიმაბი მაღალი რისკის პედიატრიული ნეირობლასტომის დროს გრანულოციტ-მაკროფაგული კოლონიის მასტიმულირებელ ფაქტორთან (GM-CSF), ინტერლეიკინ-2-სა და 13-cis-რეტინოის მჟავასთან ერთად გამოიყენება.
კლინიკური კვლევების დადებითმა შედეგებმა ანტისხეულის გამოცდა II ფაზის კლინიკურ კვლევებამდემიიყვანა, თუმცა, სამწუხაროდ, მკვლევრებს მხარდამჭერი ფარმაცევტული კომპანიის პოვნა უჭირდათ. რადგან ნეირობლასტომა ბავშვობაში ყველაზე ხშირი კიბოა, კომპანიებს რისკზე წასვლა არ სურდათ და ინვესტიციაზე უარს ამბობდნენ. ამ სირთულეების შემდეგ დოქტორმა Yu-მ გადაწყვიტა ვაშინგტონში გაფრენილიყო ჩანთით, რომელშიც პაციენტების რენტგენოლოგიური და პათოლოგიური შედეგები ეწყო. მისი შეუპოვრობის შედეგად კიბოს ეროვნულმა ინსტიტუტმა III ფაზის მხარდაჭერა გადაწყვიტა.
200-ზე მეტ პაციენტზე ჩატარებულ კვლევაში მკურნალობის შემდეგ გართულებების არმქონე პაციენტების სიცოცხლის ხანგრძლივობა და საერთო გადარჩენა მნიშვნელოვნად გაიზარდა. სხვა კვლევებითაც დადასტურდა პრეპარატის უსაფრთხოება; მისი ტოქსიკური / საზიანო ეფექტი გამოვლინდა, თუმცა აღინიშნა, რომ მისი კონტროლი შესაძლებელი იყო. დადებითი შედეგების შემდეგ დოქტორმა Yu-მ განაცხადა: „ჩვენ მიერ გამოცდილი იმუნოთერაპია მაღალი რისკის ნეირობლასტომის მქონე პაციენტების ახალ სტანდარტულ მკურნალობად იქცა“, და ასე შეაფასა ხანგრძლივი შრომის შედეგი. კვლევებისას ახალი შესაძლო ბიომარკერებიც გამოიკვეთა. დოქტორმა Yu-მ აღნიშნა, რომ მათი ახალი მიზანი ტოქსიკური ეფექტების მაქსიმალურად შემცირებით იმუნოთერაპიის ეფექტიანობის გაზრდაა.
დინუტუქსიმაბის დამტკიცებით პირველად დამტკიცდა გლიკოლიპიდური მოლეკულისკენ მიმართული ახალი იმუნოთერაპია, რამაც შესაძლო მიზნობრივი პრეპარატების არეალი გააფართოვა. დოქტორი Yu-სა და მისი გუნდის კვლევებმა და პიონერულმა სიახლეებმა გზა გაუხსნა სხვა გლიკოლიპიდების, მაგალითად Globo-H ცერამიდის, კვლევას, რომლებიც ბავშვთა კიბოს გარდა მოზრდილთა კიბოშიც, მაგალითად ძუძუს კიბოში, მკურნალობის სამიზნედ შეიძლება გამოიყენონ.
წყაროები
Anti-GD2 antibody with GM-CSF, interleukin-2, and isotretinoin for neuroblastoma.
N Engl J Med . 2010
2. Dr. Alice Yu, Pioneer in Immunotherapy for Neuroblastoma, to Receive Pediatric Oncology Award.
dailynews.ascopubs.org - 20 May 2020
3. Ozkaynak MF, Gilman AL, London WB, et al.
A comprehensive safety trial of chimeric antibody 14.18 with GM-CSF, IL-2, and isotretinoin in high-risk neuroblastoma patients following myeloablative therapy: Children's Oncology Group Study ANBL0931.
Front Immunol . 2018 Jun 18;9:1355.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.