აუცრელმა პაციენტებმა COVID-19-ის შემდეგ არაგადაუდებელ ოპერაციამდე 7 კვირა უნდა მოიცადონ

ამერიკის ანესთეზიოლოგთა საზოგადოების (ASA) და ანესთეზიის პაციენტთა უსაფრთხოების ფონდის (APSF) ახალი ერთობლივი განცხადების თანახმად, აუცრელ პაციენტებში COVID-19 ინფექციის შემდეგ არჩევითი (არაგადაუდებელი, გეგმური) ქირურგიული ჩარევები სულ მცირე 7 კვირით უნდა გადაიდოს.

იმ პირებისთვის, რომლებიც COVID-19-ის წინააღმდეგ სრულად იყვნენ აცრილი, მაგრამ მაინც დაავადდნენ COVID-19-ით, არ არსებობს კონსენსუსი, როგორ განისაზღვროს ინფექციასა და არჩევით ოპერაციას შორის ინტერვალი. ამერიკის ანესთეზიოლოგთა საზოგადოების (ASA) პრეზიდენტმა, დოქტორმა Randall M. Clark-მა, თქვა, რომ ოპერაციების დასაგეგმად ექიმებმა კლინიკური განსჯა უნდა გამოიყენონ. ყველა ექიმმა, ანესთეზიოლოგმა, ქირურგმა და სხვამ არჩევითი ოპერაციის ჩატარების გადაწყვეტილება პაციენტის ჩივილებს, ოპერაციის საჭიროებასა და იმას უნდა დააფუძნოს, გამოიწვევს თუ არა გადადება ჯანმრთელობის სხვა პრობლემებს.

რამდენ ხანს უნდა მოვიცადოთ COVID-19-ის შემდეგ ოპერაციამდე?

2022 წლის 22 თებერვალს გამოქვეყნებული ეს განახლებული რეკომენდაციების გამოქვეყნებამდე ASA და APSF, პაციენტის აცრის სტატუსის მიუხედავად, უსიმპტომო ან მსუბუქი შემთხვევებისთვის COVID-19-ის დიაგნოზსა და არჩევით ოპერაციას შორის 4-კვირიან ინტერვალს ურჩევდნენ.

ლოდინის პერიოდის 4 კვირიდან 7 კვირამდე გაზრდა ეფუძნებოდა 2020 წლის ოქტომბერში 140000-ზე მეტი ქირურგიული პაციენტის მეთვალყურეობის მომცველ მრავალეროვნულ კვლევას. პაციენტებს, რომლებსაც მანამდე COVID-19 ინფექცია ჰქონდათ, COVID-19-ის არმქონე პაციენტებთან შედარებით, დიაგნოზიდან 6 კვირამდე პერიოდში არჩევითი ოპერაციისას გართულებისა და სიკვდილის გაზრდილი რისკი ჰქონდათ. აშშ-ში ჩატარებულმა დამატებითმა კვლევებმა აჩვენა, რომ ოპერაციამდე COVID-ის დიაგნოზის მქონე პაციენტებს დიაგნოზიდან 4 კვირამდე ოპერაციის შემდგომი სუნთქვის უკმარისობის გართულებების, ხოლო დიაგნოზიდან 8 კვირამდე ოპერაციის შემდგომი პნევმონიის (ფილტვების ანთების) გართულებების უფრო მაღალი რისკი ჰქონდათ.

რადგან ეს კვლევები აუცრელ ან აცრის დაბალი მაჩვენებლის მქონე პოპულაციებში ჩატარდა და წინასწარი მონაცემები მიუთითებდა, რომ აცრილ პაციენტებში ინფექციის შემდეგ გართულებისა და სიკვდილის რისკი შესაძლოა ნაკლები ყოფილიყო, „მივიჩნიეთ, რომ სიფრთხილის თვალსაზრისით მიზანშეწონილი იყო კონკრეტული რეკომენდაციების მხოლოდ აუცრელი პაციენტებისთვის გაცემა.“ — დასძინა Clark-მა.

მიუხედავად იმისა, რომ ეს სახელმძღვანელო „ძალიან სასარგებლოა“, რადგან მტკიცებულებებზე დაფუძნებული რეკომენდაციების გასაცემად არსებულ კვლევებს აჯამებს, 7-კვირიანი ლოდინი „ძალიან კონსერვატიულ შეფასებად“ მიიჩნევა. დღეს ბევრ სამედიცინო ცენტრში ოპერაციას პაციენტის აცრის სტატუსის მიუხედავად, სულ მცირე 3 კვირის შემდეგ გეგმავენ.

უნდა გვახსოვდეს, რომ ეს კვლევა ჩატარდა ნაკლებად მძიმე დაავადების გამომწვევი ომიკრონის ვარიანტის გავრცელებამდე. ამჟამად ომიკრონი COVID-19-ის ყველაზე გავრცელებული ვარიანტია და ვირუსის წინა ვარიანტებთან შედარებით ნაკლებად ლეტალურია. ამიტომ მათთვის, ვინც COVID-19-ით ომიკრონის ვარიანტის გამო დაავადდა, შესაძლოა აუცილებელი არ იყოს ზუსტად 7 კვირის ლოდინი.

შედეგად, პაციენტის აცრილობის მიუხედავად, COVID-19-ის დიაგნოზიდან არჩევით ოპერაციამდე სულ მცირე 4 კვირის ლოდინის რეკომენდაცია კვლავ ძალაში რჩება. ამასთან, განსაკუთრებით თანმხლები დაავადებების მქონე პირებისთვის, აუცრელებისთვის, რომლებიც COVID-19-ით დაავადდნენ, და აცრილებისთვის, რომლებმაც COVID-19 მძიმედ გადაიტანეს, მნიშვნელოვანია 7-კვირიანი პერიოდის დაცდა.