BRAF V600E მუტაციის მქონე ფილტვის კიბოსთვის Encorafenib-მა და Binimetinib-მა FDA-ს დამტკიცება მიიღო

2023 წლის 11 ოქტომბერს აშშ-ის სურსათისა და მედიკამენტების ადმინისტრაციამ (FDA) BRAF V600E მუტაციის მქონე მეტასტაზური ფილტვის არაწვრილუჯრედოვანი კიბოს (KHDAK) მქონე ზრდასრული პაციენტებისთვის encorafenib-ის (Braftovi, Array BioPharma, Pfizer-ის სრულ მფლობელობაში არსებული შვილობილი კომპანია) და binimetinib-ის (Mektovi, Array BioPharma) სახელწოდების პრეპარატების კომბინაცია დაამტკიცა.

ეს ახალი დამტკიცება ფილტვის კიბოს მკურნალობის მნიშვნელოვან წინსვლას წარმოადგენს და BRAF V600E მუტაციის მქონე პაციენტებისთვის მკურნალობის ახალ არჩევანს ქმნის. FDA-ს ეს დამტკიცება კიდევ ერთხელ უსვამს ხაზს კიბოს მკურნალობაში პერსონალიზებული მიდგომებისა და გენეტიკური ინფორმაციის მნიშვნელობას.

FDA-მ მანამდე, 2017 წელს, BRAF V600E მუტაციის მქონე ფილტვის კიბოს სამკურნალოდ dabrafenib-ისა და trametinib-ის კომბინაცია (სავაჭრო სახელებით Tafinlar და Mekinist) დაამტკიცა. ახლანდელი დამტკიცება ამ მდგომარეობის მქონე პაციენტებისთვის FDA-ს მე-2 დამტკიცებაა.

ამასთან, BRAF მუტაციის მქონე ყველა სოლიდური (ორგანოებიდან და ქსოვილებიდან წარმოშობილი) კიბოსთვის babrafenib + trametinib-ის კომბინაციამ 2022 წლის ივნისში FDA-ს დაჩქარებული დამტკიცება მიიღო.

რა არის BRAF გენი და მისი მუტაცია?

BRAF გენი აკოდირებს სერინ/თრეონინკინაზური აქტივობის მქონე ცილას, რომელიც მიტოგენაქტივირებული პროტეინკინაზის უჯრედშიდა სასიგნალო გზაში (MAPKs) მონაწილეობს. ის Kras-ის საშუალებით მოქმედებს და უჯრედის გაყოფას აკონტროლებს. სომატური BRAF გენური მუტაციები ყველაზე ხშირად ვლინდება კანის კიბოს — ავთვისებიანი მელანომის, კოლორექტალური კიბოებისა და ფარისებრი ჯირკვლის პაპილარული კიბოსას. პაციენტებში ყველაზე ხშირია V600E მუტაცია.

KHDAK-ის მქონე პაციენტების დაახლოებით 2% ატარებს BRAF V600E მუტაციას, რომელიც სიმსივნური უჯრედების ზრდასა და გამრავლებას ასტიმულირებს.

PHAROS კვლევით მიღებული FDA-ს დამტკიცება

ეფექტიანობა PHAROS-ის სახელწოდების ღია, მრავალცენტრიან, ერთჯგუფიან კვლევაში ჩართულ BRAF V600E მუტაციის მქონე მეტასტაზური KHDAK-ის 98 პაციენტში შეფასდა. მათ მანამდე BRAF ან MEK ინჰიბიტორები არ ჰქონდათ გამოყენებული. პაციენტები encorafenib-სა და binimetinib-ს დაავადების პროგრესირებამდე ან მიუღებელ ტოქსიკურობამდე იღებდნენ.

ეფექტიანობის ძირითადი შედეგის საზომები იყო დამოუკიდებელი შემფასებელი კომიტეტის მიერ შეფასებული ობიექტური პასუხის მაჩვენებელი (ORR) და პასუხის ხანგრძლივობა (DoR).

შედეგები

• მანამდე არანამკურნალებ 59 პაციენტში ობიექტური პასუხის მაჩვენებელი 75% იყო (სანდოობის ინტერვალი: 62, 85). მკურნალობაზე მოპასუხე პაციენტებში პასუხის ხანგრძლივობის მედიანა ჯერ მიღწეული არ იყო.
• მანამდე ნამკურნალებ 39 პაციენტში ობიექტური პასუხის მაჩვენებელი 46% იყო (სანდოობის ინტერვალი: 30, 63), ხოლო პასუხის ხანგრძლივობის მედიანა 16,7 თვეს შეადგენდა.

თუ არაპირდაპირ შედარებას გავაკეთებთ, ამ მდგომარეობის მქონე პაციენტების სამკურნალოდ 2017 წელს FDA-ს მიერ დამტკიცებული dabrafenib-ისა და trametinib-ის ობიექტური პასუხის მაჩვენებლები ასეთი იყო:

• მანამდე არანამკურნალებ ჯგუფში მკურნალობაზე პასუხის მაჩვენებელი 61% იყო.
• მანამდე მხოლოდ dabrafenib-ის მიმღებებში პასუხის მაჩვენებელი 27% იყო, ხოლო პასუხის ხანგრძლივობის მედიანა 9,9 თვე.

Encorafenib-ისა და binimetinib-ის ყველაზე ხშირად (პაციენტების 25%-სა და მეტში) აღწერილი არასასურველი რეაქციები იყო დაღლილობა, გულისრევა, დიარეა, კუნთოვან-ჩონჩხოვანი ტკივილი, ღებინება, მუცლის ტკივილი, მხედველობის დარღვევა, ყაბზობა, ქოშინი, გამონაყარი და ხველა.

BRAF V600E მუტაციადადებითი KHDAK-ისთვის რეკომენდებული დოზებია 450 mg encorafenib პერორალურად დღეში ერთხელ და 45 mg binimetinib პერორალურად დღეში ორჯერ.

ამ განვითარებამ KHDAK-ის მქონე პაციენტებს უფრო პერსონალიზებული მკურნალობისკენ შეიძლება გაუხსნას გზა და უკეთესი და ხანგრძლივი სიცოცხლის იმედი მისცეს. ეს მნიშვნელოვანი დამტკიცება ზოგადად ონკოლოგიაში ინოვაციური მკურნალობის არჩევანის უწყვეტ განვითარებას უსვამს ხაზს.