BRAF V600E mutasiyalı ağciyər xərçəngi üçün encorafenib və binimetinib FDA təsdiqi aldı

11 oktyabr 2023-cü ildə ABŞ Qida və Dərman İdarəsi (FDA) BRAF V600E mutasiyası daşıyan metastatik kiçik hüceyrəli olmayan ağciyər xərçəngi (KHDAK) olan yetkin xəstələr üçün encorafenib (Braftovi, Array BioPharma, Pfizer-in tam mülkiyyətində olan törəmə şirkəti) və binimetinib (Mektovi, Array BioPharma) adlı dərmanların kombinasiyasını təsdiqlədi.

Bu yeni təsdiq ağciyər xərçənginin müalicəsində mühüm irəliləyişdir və BRAF V600E mutasiyası daşıyan xəstələr üçün yeni müalicə seçimi təqdim edir. FDA-nın bu təsdiqi xərçəng müalicəsində fərdiləşdirilmiş yanaşmaların və genetik məlumatların əhəmiyyətini bir daha vurğulayır.

FDA əvvəllər, 2017-ci ildə BRAF V600E mutasiyalı ağciyər xərçənginin müalicəsi üçün dabrafenib və trametinib (ticarət adları Tafinlar və Mekinist) kombinasiyasını təsdiqləmişdi. Yeni təsdiq bu vəziyyətdəki xəstələrin müalicəsi üçün verilən 2-ci FDA təsdiqidir.

Bundan əlavə, BRAF mutasiyalı bütün solid (orqan və toxumalardan qaynaqlanan) xərçənglər üçün babrafenib + trametinib kombinasiyası 2022-ci ilin iyununda sürətləndirilmiş FDA təsdiqi almışdı.

BRAF geni və mutasiyası nədir?

BRAF geni mitogenlə aktivləşən protein kinaza hüceyrədaxili siqnal yolunda (MAPKs) rol oynayan serin/treonin kinaza aktivliyinə malik zülalı kodlaşdırır. Kras vasitəsilə təsir göstərərək hüceyrə bölünməsinə nəzarət edir. Somatik BRAF gen mutasiyaları ən çox bədxassəli dəri melanomasında, kolorektal xərçənglərdə və papillyar qalxanabənzər vəz xərçəngində aşkarlanır. Xəstələrdə ən çox V600E mutasiyası müşahidə olunur.

KHDAK xəstələrinin təxminən 2%-i şiş hüceyrələrinin böyüməsini və çoxalmasını stimullaşdıran BRAF V600E mutasiyası daşıyır.

PHAROS tədqiqatı ilə alınan FDA təsdiqi

Effektivlik PHAROS adlı açıq etiketli, çoxmərkəzli, təkqollu tədqiqata daxil edilmiş BRAF V600E mutasiyalı 98 metastatik KHDAK xəstəsində qiymətləndirildi. Xəstələr əvvəllər BRAF və ya MEK inhibitorları istifadə etməmişdilər. Xəstələr xəstəlik irəliləyənədək və ya qəbuledilməz toksiklik yarananadək encorafenib və binimetinib aldılar.

Əsas effektivlik nəticələri müstəqil qiymətləndirmə komitəsinin dəyərləndirdiyi obyektiv cavab nisbəti (ORR) və cavab müddəti (DoR) idi.

Nəticələr

• Müalicəyə yeni başlayan 59 xəstədə obyektiv cavab nisbəti 75% (Etibar intervalı (GA): 62, 85) idi. Müalicəyə cavab verən xəstələrdə median cavab müddətinə hələ çatılmayıb.
• Əvvəllər müalicə almış 39 xəstədə obyektiv cavab nisbəti 46% (GA: 30, 63), median cavab müddəti isə 16,7 ay idi.

Bir dolayı müqayisə aparsaq, 2017-ci ildə bu vəziyyətdəki xəstələrin müalicəsi üçün FDA təsdiqi alan dabrafenib və trametinib üçün obyektiv cavab nisbətləri belə idi:

• Əvvəllər müalicə almamış qrupda müalicəyə cavab nisbəti 61% idi.
• Əvvəllər tək dabrafenib alanlarda müalicəyə cavab nisbəti 27%, median cavab müddəti isə 9,9 ay olub.

Encorafenib və binimetinib ilə bildirilən ən çox rast gəlinən (25% və daha çox) mənfi reaksiyalar yorğunluq, ürəkbulanma, ishal, əzələ-skelet ağrısı, qusma, qarın ağrısı, görmə pozuntusu, qəbizlik, təngnəfəslik, səpgi və öskürək idi.

BRAF V600E mutasiyası müsbət KHDAK üçün tövsiyə olunan dozalar gündə bir dəfə ağızdan 450 mg encorafenib və gündə iki dəfə ağızdan 45 mg binimetinibdir.

Bu inkişaf KHDAK xəstələri üçün daha fərdiləşdirilmiş müalicə yanaşmalarına yol aça və onlara daha yaxşı, daha uzun həyat ümidi verə bilər. Bu mühüm təsdiq ümumilikdə onkologiya sahəsində yenilikçi müalicə seçimlərinin davamlı inkişafını vurğulayır.