CRP დონესა და ტვინის ფუნქციას შორის კავშირი ძუძუს კიბოს გადატანილ 60 წელს გადაცილებულ ადამიანებში
ამ სტატიაში
ცნობილია, რომ კიბოს მკურნალობამ და ზოგჯერ თვით კიბომაც შეიძლება ტვინის „კოგნიტიურ“ ფუნქციებზე უარყოფითად იმოქმედოს; ამ მდგომარეობას ქიმიოტვინი ეწოდება. Journal of Clinical Oncology-ში 2022 წლის 30 სექტემბერს გამოქვეყნებულ კვლევაში, 60 წლისა და უფროს ასაკში დიაგნოსტირებული 0-დან III სტადიამდე ძუძუს კიბოს მქონე ქალებს შორის დაფიქსირდა, რომ საწყის ეტაპზე და შემდგომი დაკვირვებისას C-რეაქტიული ცილის (CRP) უფრო მაღალი დონის მქონე ქალებს საკონტროლო პირებთან შედარებით უფრო სუსტი კოგნიტიური შესრულება ჰქონდათ.
რა არის CRP?
CRP ღვიძლის მიერ წარმოქმნილი ცილაა, ხოლო C-რეაქტიული ცილის (CRP) ტესტი სისხლის ნიმუშში CRP-ის დონეს ზომავს. ჩვეულებრივ, ჩვენს სისხლში C-რეაქტიული ცილა ისედაც მცირე რაოდენობით არის. თუ სხეულში მწვავე ან ქრონიკული ანთება არსებობს, ღვიძლი სისხლის მიმოქცევაში მეტ CRP-ს გამოყოფს.
კვლევის დეტალები
კვლევაში ჩაერთო ძუძუს კიბოს გადატანილი 400 და კიბოს დიაგნოზის არმქონე 329 ადამიანი, რომლებიც 2010 წლის სექტემბრიდან 2020 წლის მარტამდე აშშ-ის საავადმყოფოებში ირიცხებოდნენ.
ყოველ კვლევით ცენტრში რეგისტრაციისას საკონტროლო ჯგუფის კიბოს დიაგნოზის არმქონე პირები ასაკის, განათლების დონისა და რასის სიხშირით შეუთანადეს კიბოს გადატანილებს. დემენციის (Alzheimer), ნევროლოგიური დარღვევებისა და სხვა კიბოების მქონე ქალები კვლევიდან გამოირიცხნენ.
მონაწილეთა კოგნიტიური ფუნქციები შეფასდა კიბოს თერაპიის ფუნქციური შეფასების — კოგნიტიური ფუნქციის (FACT-Cog) კითხვარით და ნეიროფსიქოლოგიური ტესტებით. CRP ყოველ სამკურნალო ცენტრში ვიზიტზე იზომებოდა. ანალიზები კორექტირებული იყო ასაკის, რასის, კვლევითი ცენტრის, კოგნიტიური რეზერვის, სიმსუქნისა და თანმხლები დაავადებების მიხედვით.
მნიშვნელოვანი მიგნებები
ძუძუს კიბოს გადატანილი პაციენტების უმეტესობას 1 სტადიის ძუძუს კიბო (60,9%) და ესტროგენის რეცეპტორის დადებითი სიმსივნეები (87,6%) ჰქონდა.
საწყისი ნიმუშების მქონე მონაწილეებში CRP-ის ≥ 3 mg/L დონე აღმოაჩნდა კიბოს გადატანილების 42,4%-ს და საკონტროლო პირების 26,1%-ს (P < 0,001).
კიბოს გადატანილებს საკონტროლო პირებთან შედარებით საწყის ეტაპზეც და 12, 24 და 60 თვის ვიზიტებზეც CRP-ის მნიშვნელოვნად უფრო მაღალი დონე ჰქონდათ (ყველა P < 0,05). უფრო მაღალი CRP კიბოს გადატანილებში კოგნიტიური ფუნქციის ტესტში უფრო სუსტ კოგნიტიურ ფუნქციას პროგნოზირებდა ( P = 0,040), თუმცა საკონტროლო პირებში ასეთი კავშირი არ დაფიქსირდა. ეს ეფექტები არ შეცვლილა დეპრესიისა და შფოთვის გათვალისწინებით ჩატარებულ ანალიზებში.
ზოგადად, როდესაც კიბოს გადატანილებში CRP-ის დონე 1-დან 3,0 mg/L-მდე იზრდებოდა, კოგნიტიური ფუნქციის ქულები საკონტროლო პირებთან შედარებით, შესაბამისად, 5,2, 9,5 და 14,2 ქულით დაბალი იყო.
რატომ არის ეს კვლევა მნიშვნელოვანი?
CRP-სა და კოგნიტიურ ფუნქციას შორის აღმოჩენილი ეს კავშირი გვაფიქრებინებს, რომ 60 წლისა და უფროსი ასაკის ძუძუს კიბოს გადატანილ ადამიანებში ქრონიკულ ანთებას კოგნიტიური პრობლემების განვითარებაში შესაძლოა როლი ჰქონდეს. ამ მხრივ, CRP ტესტი შეიძლება კლინიკურად სასარგებლო იყოს ქიმიოტვინის რისკის ქვეშ მყოფი პაციენტების პროგნოზირებისთვის.
*
ქვემოთ მოცემულ ვიდეოში შეგიძლიათ გაიგოთ, როგორ და რატომ ვითარდება ძუძუს კიბო, რა ტიპები აქვს და როგორია მკურნალობის უახლესი მეთოდები სტადიების მიხედვით.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.