დღეში მხოლოდ ერთი ჭიქა ალკოჰოლიც კი ძუძუს კიბოს რისკს ზრდის

მსოფლიოში ჩატარებული კვლევის თანახმად, რომელიც 12 მილიონზე მეტ ქალსა და ძუძუს კიბოთი დაავადებულ 260 ათასზე მეტ პაციენტს მოიცავს, დღის განმავლობაში თუნდაც პატარა ჭიქა ღვინის ან ლუდის დალევა (დაახლოებით 10 g ალკოჰოლი) რეპროდუქციული ასაკის ქალებში ძუძუს კიბოს რისკს %5-ით, ხოლო მენოპაუზის შემდეგ %9-ით ზრდის.

წინა კვლევებით ალკოჰოლსა და ძუძუს კიბოს რისკს შორის კავშირი ცნობილი იყო, თუმცა უცნობი რჩებოდა ალკოჰოლის რა რაოდენობა ზრდიდა რისკს. ამ კვლევის მიხედვით, ეს რაოდენობა ერთი ჭიქა ან 1 ბოკალი ალკოჰოლია.

იმავე კვლევაში დადგინდა, რომ ინტენსიური ვარჯიში, მაგალითად სირბილი და ველოსიპედით სიარული, რეპროდუქციული ასაკის ქალებში ძუძუს კიბოს რისკს %17-ით, ხოლო მენოპაუზის შემდეგ %10-ით ამცირებს.

ზომიერი ინტენსივობის ისეთი აქტივობები, როგორიცაა სიარული და ბაღში მუშაობა, ვარჯიშები ასევე ამცირებს ქალებში მენოპაუზის შემდეგ ძუძუს კიბოს რისკს, რაზეც მონაცემებიც იქნა მიღებული. ამ ყველაფერთან ერთად, ზოგადად ფიზიკური აქტივობა ქალებში მენოპაუზის შემდეგ ძუძუს კიბოს რისკს %13-ით ამცირებს.

შეჯამების სახით, ფიზიკურად აქტიური ცხოვრების წესი, მთელი სიცოცხლის განმავლობაში ჯანსაღი წონის შენარჩუნება და ალკოჰოლის მოხმარების შეზღუდვა ქალებში ძუძუს კიბოს რისკსამცირებს.

ძუძუს კიბოს რისკის გამზრდელი და შემამცირებელი ფაქტორები

ფიზიკურ აქტივობასა და ალკოჰოლის მოხმარებასთან ერთად მკვლევრებმა ძუძუს კიბოს რისკზე მოქმედი სხვა ფაქტორებიც გამოავლინეს. ერთ-ერთი ასეთი ფაქტორია სიმსუქნე. კვლევის თანახმად, ზრდასრულ ასაკში ჭარბი წონა ან წონის მნიშვნელოვნად მომატება მენოპაუზის შემდეგ ძუძუს კიბოს რისკს ზრდის.

ძუძუს კიბოს რისკზე მოქმედ სხვა ფაქტორებს შორისაა ძუძუთი კვება და განვითარების ფაქტორები. კვლევის თანახმად, ძუძუთი კვება ძუძუს კიბოს რისკს ამცირებს, ხოლო მაღალი სიმაღლე, როგორც ჩანს, ამ რისკს ზრდის.

რეკომენდაციები რისკის შესამცირებლად

ზოგადად კიბოს პრევენციისთვის ავტორები გვირჩევენ ჯანსაღი წონის შენარჩუნებას, დღეში სულ მცირე 30 წუთის ფიზიკურ აქტივობას და მაღალკალორიული სასმელებისა და საკვებისგან თავის შეკავებას. ამასთან ერთად რეკომენდებულია მთლიანი მარცვლეულით, ბოსტნეულითა და პარკოსნებით მდიდარი კვება, წითელი ხორცის მოხმარების შემცირება და გადამუშავებული ხორცის სრულად ამოღება რეკომენდებულია. უმჯობესია ალკოჰოლი საერთოდ არ მივიღოთ, ხოლო თუ მაინც ვსვამთ, მისი რაოდენობა უნდა შეიზღუდოს.

კვლევა ამერიკის კიბოს კვლევის ინსტიტუტმა (AICR) და კიბოს კვლევის მსოფლიო ფონდმა (WCRF) ჩაატარეს.