Gündə yalnız bir qədəh alkoqol belə süd vəzi xərçəngi riskini artırır

Dünyada 12 milyondan çox qadını və 260 mindən çox süd vəzi xərçəngi xəstəsini əhatə edən tədqiqata görə gün ərzində hətta kiçik stəkan şərab və ya pivə içmək (təxminən 10 g alkoqol) süd vəzi xərçəngi riskini reproduktiv yaşdakı qadınlarda %5, menopauzadan sonrakı dövrdə %9 artırır.

Əvvəlki tədqiqatlarda alkoqolla süd vəzi xərçəngi riski arasındakı əlaqə məlum idi, lakin riski artıran alkoqol miqdarı bilinmirdi. Bu tədqiqata görə bu miqdar bir stəkan və ya 1 qədəh alkoqoldur.

Eyni tədqiqatda qaçış və velosiped kimi ağır məşqlərin reproduktiv yaşdakı qadınlarda %17, menopauzadan sonrakı dövrdə %10 nisbətində süd vəzi xərçəngi riskini azaltdığı tapılıb.

Yerimək və bağ işləri ilə məşğul olmaq kimi orta səviyyəli məşqlərin də qadınlarda menopauzadan sonrakı dövrdə süd vəzi xərçəngi riskini azaltdığına dair tapıntılar əldə edilib. Bunlardan əlavə ümumən fiziki aktivlik qadınlarda menopauzadan sonrakı dövrdə süd vəzi xərçəngi riskini %13 azaldır.

Xülasə, fiziki baxımdan aktiv həyat tərzi, həyat boyu sağlam çəkidə qalmaq və alkoqol istehlakını məhdudlaşdırmaq qadınlarda süd vəzi xərçəngi riskini azaldır.

Süd vəzi xərçəngi riskini artıran və azaldan amillər

Tədqiqatçılar fiziki aktivlik və alkoqol istehlakı ilə yanaşı süd vəzi xərçəngi riskinə təsir edən başqa amillər də aşkarlayıblar. Bunlardan biri piylənmədir. Tədqiqata görə yetkinlik dövründə artıq çəkili olmaq və ya çox çəki almaq menopauzadan sonrakı süd vəzi xərçəngi riskini artırır.

Süd vəzi xərçəngi riskinə təsir edən digər amillər arasında əmizdirmə və inkişaf amilləri var. Tədqiqata görə əmizdirmə süd vəzi xərçəngi riskini azaldır, lakin uzunboylu olmaq bu riski artırır kimi görünür.

Riski azaltmaq üçün tövsiyələr

Ümumən xərçəngin qarşısını almaq üçün müəlliflər sağlam çəkidə qalmağı, gündə ən azı 30 dəqiqə fiziki aktivliyi, yüksək kalorili içki və qidalardan qaçmağı tövsiyə edir. Həmçinin tam taxıllar, tərəvəz və paxlalılarla zəngin qidalanma, qırmızı ət istehlakının azaldılması və emal edilmiş ətin tam dayandırılması tövsiyə edilir. Alkoqolu heç istehlak etməmək ən yaxşısıdır, lakin istehlak edilirsə, miqdarı məhdudlaşdırılmalıdır.

Tədqiqat Amerika Xərçəng Araşdırmaları İnstitutu (AICR) və Dünya Xərçəng Araşdırmaları Fondu (WCRF) tərəfindən aparılıb.