Elacestrant-მა ESR1 მუტაციის მქონე მკერდის კიბოსთვის FDA-ის ნებართვა მიიღო
ამ სტატიაში
ჰორმონდადებითი, HER2-უარყოფითი, ESR1-მუტაციის მქონე შორსწასული ან მეტასტაზური მკერდის კიბოს მქონე მენოპაუზის შემდგომი ქალებისა და ზრდასრული მამაკაცებისთვის, რომელთა დაავადება სულ მცირე ერთი ხაზის ჰორმონული მკურნალობის შემდეგ პროგრესირდა, elacestrant-მა (Orserdu, Stemline Therapeutics) 2023 წლის 27 იანვარს FDA-ის (ამერიკის შეერთებული შტატების სურსათისა და წამლების ადმინისტრაციის) ნებართვა მიიღო.
Elacestrant არის პერორალური ტაბლეტის ფორმის SERD (ესტროგენის რეცეპტორის სელექტიური დამშლელი) კლასის პრეპარატი. ეს პერორალური SERD პრეპარატის პირველი FDA-ის ნებართვაა. ამ კლასის კიდევ ერთი ხშირად გამოყენებული პრეპარატი, ფულვესტრანტი (Faslodex), დუნდულაში ინტრამუსკულარულად (კუნთში) შეჰყავთ.
FDA-მ ასევე დაუშვა Guardant360 CDx ტესტი მკერდის კიბოს მქონე პაციენტებში ESR1 მუტაციის დასადგენად. ამგვარად, პირველად ESR1 -ზე მიმართული მკურნალობა FDA-ის ნებართვის მქონე გახდა.
რა არის ESR1 მუტაცია?
ESR1 ესტროგენის რეცეპტორის მაკოდირებელი გენია. მეტასტაზურ ჰორმონრეცეპტორ-დადებით მკერდის კიბოში ჰორმონულ მკურნალობებთან დაკავშირებით ხშირად ESR1 გენში მუტაციები ვითარდება. ESR1 მუტაციები ყველაზე ხშირად არომატაზის ინჰიბიტორების ფონზე პროგრესირებულ მკერდის კიბოში გვხვდება.
FDA-ის ნებართვა EMERALD კვლევის საფუძველზე
Elecestrant დამტკიცდა EMERALD კვლევის საფუძველზე, რომელშიც მონაწილეთა დაახლოებით ნახევარს ESR1 მუტაციები ჰქონდა. მე-3 ფაზის კვლევაში ჩართული იყო ჰორმონდადებითი, HER2-უარყოფითი შორსწასული ან მეტასტაზური მკერდის კიბოს მქონე 478 მენოპაუზის შემდგომი ქალი და მამაკაცი.
ESR1 სტატუსი განისაზღვრა სისხლში მოცირკულირე სიმსივნური DNA-ით (ctDNA) და შემოიფარგლებოდა ლიგანდთან შეკავშირების უბნის ESR1 მისენს (არასწორი მნიშვნელობის) მუტაციებით.
პაციენტებს ადრე ერთი ან ორი ხაზის ჰორმონული მკურნალობა ჰქონდათ მიღებული, მათ შორის CDK4/6 ინჰიბიტორი. მონაწილეებს შორსწასული ან მეტასტაზური დაავადებისთვის ადრე ერთი ხაზის ქიმიოთერაპიაც შეიძლებოდა ჰქონოდათ მიღებული.
ექსპერიმენტულ ჯგუფში 239 მონაწილე დღეში ერთხელ 345 mg პერორალურ elacestrant-ზე, საკონტროლო ჯგუფში კი 239 მონაწილე მკვლევრის მიერ არჩეულ, ფულვესტრანტის ან არომატაზის ინჰიბიტორის შემცველ ჰორმონულ მკურნალობაზე შემთხვევითად 1:1 თანაფარდობით განაწილდა.
შედეგები
პაციენტთა 62%-ს 1 ხაზის ჰორმონული მკურნალობა ჰქონდა მიღებული. ყველა ადრე CDK4/6 ინჰიბიტორით იყო ნამკურნალები; 24%-ს ადრე ფულვესტრანტი და 25%-ს ქიმიოთერაპია ჰქონდა მიღებული.
- ESR1 მუტაციების მქონე 228 პაციენტში (48%) მედიანური პროგრესირების გარეშე გადარჩენა elacestrant-ით 3,8 თვე იყო, ფულვესტრანტის ან არომატაზის ინჰიბიტორის ჯგუფში კი 1,9 თვე (რისკების თანაფარდობა, 0,55; P = 0,0005).
მკვლევრებმა მუტაციის არმქონე პაციენტებში მკურნალობის ჯგუფებს შორის პროგრესირების გარეშე გადარჩენის სტატისტიკურად მნიშვნელოვანი განსხვავება ვერ შენიშნეს.
მნიშვნელოვანი შენიშვნა: დღეს ჰორმონული მკურნალობა ხშირად მარტო არ გამოიყენება, მაგრამ ამ კვლევის მიზანი იყო არა მკერდის კიბოს საუკეთესო ჰორმონული კომბინაციის პოვნა, არამედ „ახალი ჰორმონული მკურნალობის ამჟამად არსებულ ჰორმონულ მკურნალობებთან შედარება“. ამ კვლევაში elecestrant-ის ფულვესტრანტსა და სხვა არომატაზის ინჰიბიტორებზე მეტი ეფექტიანობა მიანიშნებს, რომ მომავალ კვლევებში elacestrant შეიძლება უფრო ადრეულ ხაზებში, სავარაუდოდ CDK4/6 ინჰიბიტორთან კომბინაციაში გამოიყენონ.
აუცილებელია სისხლის ლიპიდების მონიტორინგი
Elacestrant-ით პაციენტთა 10%-ში ან მეტში გამოვლენილი ყველაზე ხშირი გვერდითი ეფექტებია კუნთ-ძვლოვანი ტკივილი, გულისრევა, ქოლესტერინის მომატება, AST-ის მატება, ტრიგლიცერიდების მატება, დაღლილობა, ჰემოგლობინის შემცირება, ღებინება, ALT-ის მატება, ნატრიუმის შემცირება, კრეატინინის მატება, მადის დაქვეითება, დიარეა, თავის ტკივილი, ყაბზობა, მუცლის ტკივილი, ალები და დისპეფსია (კუჭში დისკომფორტი).
პრეპარატის ეტიკეტი გვაფრთხილებს, რომ elacetsrant-მა შეიძლება სისხლში ცხიმების მატება — „ჰიპერქოლესტერინემია და ჰიპერტრიგლიცერიდემია“ — გამოიწვიოს. სისხლის ლიპიდური (ცხიმოვანი) პროფილი მკურნალობის დაწყებამდე და შემდეგ რეგულარულად უნდა შემოწმდეს.
Elacestrant-ის რეკომენდებული დოზა არის ერთი 345 mg-იანი ტაბლეტი პერორალურად დღეში ერთხელ საკვებთან ერთად, დაავადების პროგრესირებამდე ან მიუღებელ გვერდით ეფექტამდე.
როგორ მოქმედებს Elacestrant?
Elacestrant ჰორმონის დამთრგუნველი SERD (Selective Estrogen Receptor Degrader) კლასის პრეპარატია; იგი ესტროგენის რეცეპტორს უკავშირდება და მის დაშლას ისახავს მიზნად. ეს რეცეპტორით კონტროლირებულ უჯრედულ პროცესებს ამცირებს და ამით კიბოს უჯრედების ზრდისა და განვითარების შეჩერებას ცდილობს.
Elacestrant-ს ფულვესტრანტთან შედარებით პერორალურად მიღებისა და ესტროგენის რეცეპტორის უფრო ძლიერი დათრგუნვის უპირატესობები აქვს. ასევე უფრო ადვილად გადის ჰემატოენცეფალურ ბარიერს, რაც მიანიშნებს, რომ თავის ტვინის მეტასტაზების მქონე მკერდის კიბოს პაციენტებისთვის შესაფერისი მკურნალობა შეიძლება იყოს.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.