ESMO 2023: საკვერცხის, საშვილოსნოს ყელისა და საშვილოსნოს კიბოს მკურნალობის შეცვლის პოტენციალის მქონე მნიშვნელოვანი კვლევები

ESMO 2023 კონგრესზე, გინეკოლოგიური კიბოს მკურნალობის ახლავე ან უახლოეს მომავალში შეცვლის პოტენციალის მქონე მე-3 ფაზის მნიშვნელოვანი კლინიკური კვლევების შედეგები წარადგინეს.

INTERLACE კვლევის შედეგები მიუთითებს, რომ კემო-რადიოთერაპიის (KRT) დაწყებამდე ინდუქციური ქიმიოთერაპიის ჩატარება ადგილობრივად გავრცელებული საშვილოსნოს ყელის კიბოს მქონე პაციენტებისთვის მკურნალობის ახალი სტანდარტული მიდგომა უნდა იყოს. ეს მიდგომა KRT-ზე გადასვლამდე ინდუქციური ქიმიოთერაპიის ჩატარებას გულისხმობს.

KEYNOTE-A18 კვლევის შედეგები საშვილოსნოს ყელის კიბოს პირველი ხაზის მკურნალობის ალტერნატიულ სტანდარტს გვთავაზობს: პემბროლიზუმაბით იმუნოთერაპიას და KRT-ს.

innovaTV 301 კვლევის შედეგები მორეციდივე ან მეტასტაზური საშვილოსნოს ყელის კიბოს მქონე პაციენტებისთვის ახალ სტანდარტად ტისოტუმაბ ვედოტინს გვთავაზობს, რომელსაც მანამდე FDA-ის დაჩქარებული დამტკიცება ჰქონდა მიღებული.

FLAMES კვლევის მონაცემები პირველი ხაზის ქიმიოთერაპიაზე პასუხის მქონე, გავრცელებული საკვერცხის კიბოს მქონე პაციენტებში სენაპარიბით შემანარჩუნებელი მკურნალობისას „უპრეცედენტო“ პროგრესირების გარეშე გადარჩენის (PFS) გაუმჯობესებას აჩვენებს.

AtTEnd კვლევაში ქიმიოთერაპიაზე ატეზოლიზუმაბის დამატებამ ახლად დიაგნოსტირებული ან მორეციდივე, გავრცელებული ენდომეტრიუმის, ანუ საშვილოსნოს კიბოს მქონე პაციენტებში PFS გააუმჯობესა.

DUO-E კვლევაში ქიმიოთერაპიაზე დურვალუმაბის დამატებამ და შემდეგ მხოლოდ დურვალუმაბით ან ოლაპარიბით შემანარჩუნებელმა მკურნალობამ გავრცელებული ან მორეციდივე ენდომეტრიუმის, ანუ საშვილოსნოს კიბოს მქონე პაციენტებში PFS გააუმჯობესა.

ახლა კვლევები სათითაოდ განვიხილოთ:

INTERLACE: ადგილობრივად გავრცელებული საშვილოსნოს ყელის კიბოს დროს ინდუქციური ქიმიოთერაპია და KRT

მე-3 ფაზის INTERLACE კვლევაში ჩაერთო საშვილოსნოს ყელის ახლად დიაგნოსტირებული კიბოს მქონე 500 პაციენტი, რომელთა სიმსივნეც ადგილობრივი გავრცელების გამო ოპერაციულად ვერ ამოიკვეთებოდა. პაციენტები შემთხვევითი წესით ორ ჯგუფში განაწილდნენ: ინდუქციური ქიმიოთერაპია, ანუ 6 კვირის განმავლობაში კარბოპლატინი და პაკლიტაქსელი, და სტანდარტული KRT (250 პაციენტი), ან მხოლოდ სტანდარტული KRT (250 პაციენტი). დაკვირვების მედიანური ხანგრძლივობა 64 თვე იყო.

• აღმოჩნდა, რომ ინდუქციურმა ქიმიოთერაპიამ კიბოს პროგრესირების რისკი მნიშვნელოვნად, 35%-ით შეამცირა (რისკების თანაფარდობა [HR], 0,65; 95% სანდოობის ინტერვალი [CI], 0,46-0,91; P =0,013).
• ხუთწლიანი PFS, ანუ პროგრესირების გარეშე გადარჩენა, რაც მკურნალობით დაავადების კონტროლის მაჩვენებელს გულისხმობს, ინდუქციურ ჯგუფში 73%, ხოლო მხოლოდ KRT-ის ჯგუფში 64% იყო.
• ინდუქციურ ჯგუფში საერთო გადარჩენა მნიშვნელოვნად გაუმჯობესდა: ინდუქციური ქიმიოთერაპიის ჩატარებამ სიკვდილის რისკი 39%-ით შეამცირა (HR, 0,61; 95% CI, 0,40-0,91; P =0,04).
• ხუთწლიანი საერთო გადარჩენის მაჩვენებელი ინდუქციურ ჯგუფში 80%, ხოლო მხოლოდ CRT-ის ჯგუფში 72% იყო.

ეს ბოლო 20 წელზე მეტი ხნის განმავლობაში მე-3 ფაზის პირველი რანდომიზებული კვლევაა, რომელმაც ადგილობრივად გავრცელებული საშვილოსნოს ყელის კიბოს დროს გადარჩენის სარგებელი აჩვენა.

მძიმე, 3-4 ხარისხის გვერდითი ეფექტები ინდუქციური ქიმიოთერაპიის ჯგუფის პაციენტების 59%-სა და მხოლოდ KRT-ის ჯგუფის 48%-ში გამოვლინდა.

ეს შედეგები აჩვენებს, რომ ადგილობრივად გავრცელებული საშვილოსნოს ყელის კიბოს დროს KRT-მდე ინდუქციური ქიმიოთერაპია ახალ სტანდარტად უნდა განიხილებოდეს.

KEYNOTE-A18: ადგილობრივად გავრცელებული საშვილოსნოს ყელის კიბოს დროს პემბროლიზუმაბი და KRT

მე-3 ფაზის KEYNOTE-A18 კვლევაში ჩაერთო საშვილოსნოს ყელის ადგილობრივად გავრცელებული, მაღალი რისკის კიბოს მქონე 1060 პაციენტი, რომლებსაც მანამდე მკურნალობა არ ჩატარებიათ. პაციენტები შემთხვევითი წესით განაწილდნენ პემბროლიზუმაბისა და KRT-ის მიმღებ ჯგუფში (529 პაციენტი), ან პლაცებოსა და KRT-ის მიმღებ ჯგუფში (531 პაციენტი). დაკვირვების მედიანური ხანგრძლივობა 17,9 თვე იყო.

• არცერთი მკურნალობის ჯგუფში მედიანური PFS არ მიღწეულა, თუმცა პემბროლიზუმაბით PFS 30%-ით გაუმჯობესდა (HR, 0,70; 95% CI, 0,55-0,89; P =0,0020). პემბროლიზუმაბის ჯგუფში საერთო გადარჩენის გაუმჯობესების ტენდენციაც აღინიშნა: სიკვდილის რისკი 27%-ით შემცირდა (HR, 0,73; 95% CI, 0,49-1,07).

მკურნალობასთან დაკავშირებული 3 ან უფრო მაღალი ხარისხის გვერდითი ეფექტები პემბროლიზუმაბის ჯგუფის პაციენტების 67%-სა და პლაცებოს ჯგუფის 60,6%-ში გამოვლინდა.

ეს მონაცემები მხარს უჭერს პემბროლიზუმაბისა და კემო-რადიოთერაპიის კომბინაციას, როგორც შესაძლო ახალ სტანდარტულ მკურნალობას საშვილოსნოს ყელის ახლად დიაგნოსტირებული, მანამდე არანამკურნალები, ადგილობრივად გავრცელებული, მაღალი რისკის კიბოს მქონე პაციენტებისთვის.

innovaTV 301: მორეციდივე, მეტასტაზური საშვილოსნოს ყელის კიბოს დროს ტისოტუმაბ ვედოტინი

მე-3 ფაზის innovaTV 301 კვლევაში ჩართულია მანამდე მაქსიმუმ ორი ხაზის მკურნალობის მიმღები, საშვილოსნოს ყელის მორეციდივე ან მეტასტაზური კიბოს მქონე 502 პაციენტი.

პაციენტები შემთხვევითი წესით განაწილდნენ ტისოტუმაბ ვედოტინის (253 პაციენტი) ან მკვლევრის მიერ შერჩეული ქიმიოთერაპიის (249 პაციენტი) მიმღებ ჯგუფებში. ქიმიოთერაპიული არჩევანი მოიცავდა გემციტაბინს, ირინოტეკანს, პემეტრექსედს, ტოპოტეკანსა და ვინორელბინს. დაკვირვების მედიანური ხანგრძლივობა 10,8 თვე იყო.

• მედიანური PFS ტისოტუმაბ ვედოტინის ჯგუფში 4,2 თვე, ხოლო ქიმიოთერაპიის ჯგუფში 2,9 თვე იყო (HR, 0,67; 95% CI, 0,54-0,82; P <0,0001).
• მედიანური საერთო გადარჩენა ტისოტუმაბ ვედოტინის ჯგუფში 11,5 თვე, ხოლო ქიმიოთერაპიის ჯგუფში 9,5 თვე იყო (HR, 0,70; 95% CI, 0,54-0,89; P =0,0038).

მკურნალობასთან დაკავშირებული 3 ან უფრო მაღალი ხარისხის გვერდითი ეფექტები ტისოტუმაბ ვედოტინის ჯგუფის პაციენტების 29,2%-სა და ქიმიოთერაპიის ჯგუფის 45,2%-ში გამოვლინდა.

ამ მონაცემების საფუძველზე, ტისოტუმაბ ვედოტინი შეიძლება პირველი ხაზის სისტემური მკურნალობის შემდეგ პროგრესირების მქონე პაციენტებისთვის შესაძლო ახალ სტანდარტულ მკურნალობად განიხილებოდეს.

ამ კვლევის მონაცემებმა შეიძლება ტისოტუმაბ ვედოტინისთვის 2021 წლის 20 სექტემბერს მიღებული FDA-ის დაჩქარებული დამტკიცება სრულ დამტკიცებად აქციოს.

FLAMES: გავრცელებული საკვერცხის კიბოს დროს სენაპარიბით შემანარჩუნებელი მკურნალობა

მე-3 ფაზის FLAMES კვლევაში ჩაერთო III/IV სტადიის, მაღალი ხარისხის სეროზული ან ენდომეტრიოიდული საკვერცხის, ფალოპის მილის ან პირველადი პერიტონეული კიბოს მქონე პაციენტები, რომლებსაც პირველი ხაზის პლატინაზე დაფუძნებულ ქიმიოთერაპიაზე პასუხი ჰქონდათ.

პაციენტები შემთხვევითი წესით სენაპარიბით (271 პაციენტი) ან პლაცებოთი (133 პაციენტი) შემანარჩუნებელი მკურნალობის მიმღებ ჯგუფებში განაწილდნენ. დაკვირვების მედიანური ხანგრძლივობა 22,3 თვე იყო.

• სენაპარიბის ჯგუფში მედიანური PFS არ მიღწეულა, ხოლო პლაცებოს ჯგუფში ის 13,6 თვე იყო. პლატინაზე დაფუძნებული ქიმიოთერაპიის შემდეგ სენაპარიბით შემანარჩუნებელმა მკურნალობამ კიბოს პროგრესირების რისკი 57%-ით შეამცირა (HR, 0,43; 95% CI 0,32-0,58, P <0,0001).

BRCA მუტაციის სტატუსის მიუხედავად, სენაპარიბით პაციენტებმა PFS-ის სარგებელი მიიღეს.

მკურნალობასთან დაკავშირებული 3 ან უფრო მაღალი ხარისხის გვერდითი ეფექტების სიხშირე სენაპარიბის ჯგუფში 66,3%, ხოლო პლაცებოს ჯგუფში 20,3% იყო.

ეს შედეგები პაციენტთა ამ ჯგუფში სენაპარიბით შემანარჩუნებელი მკურნალობის გამოყენებას უჭერს მხარს. შეიძლება ითქვას, რომ სენაპარიბით მიღებული PFS-ის გაუმჯობესება PARP-ის ინჰიბიტორებით მიღებულ შედეგებს შორის აქამდე აღწერილთაგან საუკეთესო არის.

AtTEnd: გავრცელებული ენდომეტრიუმის კიბოს დროს ატეზოლიზუმაბი და ქიმიოთერაპია

მე-3 ფაზის AtTEnd კვლევაში ჩაერთო III-IV სტადიის ენდომეტრიუმის კიბოს მქონე 549 პაციენტი. დაავადება შეიძლებოდა ახლად დიაგნოსტირებული ან მორეციდივე ყოფილიყო, თუმცა მორეციდივე კიბოს გამო პაციენტებს მანამდე მკურნალობა არ უნდა ჰქონოდათ მიღებული.

პაციენტები შემთხვევითი წესით ატეზოლიზუმაბის (360 პაციენტი) ან პლაცებოს (189 პაციენტი) მიმღებ ჯგუფებში განაწილდნენ. ორივე პრეპარატი პაკლიტაქსელთან და კარბოპლატინთან ერთად ყოველ 21 დღეში, 6-დან 8 ციკლამდე გამოიყენებოდა. ამას დაავადების პროგრესირებამდე ატეზოლიზუმაბით ან პლაცებოთი შემანარჩუნებელი მკურნალობა მოჰყვებოდა.

• მედიანური PFS ატეზოლიზუმაბის ჯგუფში 10,1 თვე, ხოლო პლაცებოს ჯგუფში 8,9 თვე იყო (HR, 0,74; 95% CI, 0,61-0,91; P =0,0219).
• მიუხედავად იმისა, რომ საერთო მონაცემები ჯერ არ იყო მომწიფებული, მედიანური საერთო გადარჩენა ატეზოლიზუმაბის ჯგუფში 38,7 თვე, ხოლო პლაცებოს ჯგუფში 30,2 თვე იყო (HR, 0,82; 95% CI, 0,63-1,07; P =0,0483).

PFS-ის გაუმჯობესება განსაკუთრებით დნმ-ის შეუსაბამობების რეპარაციის დეფიციტის (dMMR) მქონე პაციენტებში ატეზოლიზუმაბით მიღებულ სარგებელს უკავშირდებოდა.

dMMR კოჰორტაში მედიანური PFS ატეზოლიზუმაბის ჯგუფში არ მიღწეულა, ხოლო პლაცებოს ჯგუფში 6,9 თვე იყო (HR, 0,36; 95% CI, 0,23-0,57; P =0,0005). პაციენტთა ამ ქვეჯგუფში მედიანური საერთო გადარჩენაც ატეზოლიზუმაბის ჯგუფში არ მიღწეულა, ხოლო პლაცებოს ჯგუფში 25,7 თვე იყო (HR, 0,41; 95% CI, 0,22-0,76).

ყველა პაციენტის განხილვისას, ატეზოლიზუმაბთან ან პლაცებოსთან დაკავშირებული 3 ან უფრო მაღალი ხარისხის გვერდითი ეფექტები ატეზოლიზუმაბის ჯგუფის პაციენტების 25,8%-სა და პლაცებოს ჯგუფის 14,1%-ში გამოვლინდა.

AtTEnd ადასტურებს, რომ ქიმიოთერაპიასთან ერთად იმუნური საკონტროლო წერტილების ინჰიბიტორები ძალიან კარგ ეფექტიანობას აჩვენებს გავრცელებული ან მორეციდივე ენდომეტრიუმის კარცინომის მქონე პაციენტებში, განსაკუთრებით dMMR სტატუსის შემთხვევაში.

ეს შედეგები ადასტურებს, რომ dMMR ენდომეტრიუმის კიბოს მქონე პაციენტებში იმუნოთერაპიისა და ქიმიოთერაპიის კომბინაცია „ნამდვილად მოქმედებს“. ამიტომ ისინი ხაზს უსვამს გავრცელებული საშვილოსნოს კიბოს მქონე ყველა პაციენტში სიმსივნის dMMR სტატუსის ტესტირების მნიშვნელობას.

DUO-E: ენდომეტრიუმის კიბოს დროს ქიმიოთერაპიაზე დურვალუმაბისა და ოლაპარიბის დამატება

მე-3 ფაზის DUO-E კვლევაში ჩართულია III/IV სტადიის ენდომეტრიუმის ახლად დიაგნოსტირებული ან მორეციდივე კიბოს მქონე 718 პაციენტი, რომლებსაც მანამდე PARP-ის ინჰიბიტორები, იმუნოთერაპია ან გავრცელებული დაავადებისთვის რაიმე სისტემური მკურნალობა არ მიუღიათ.

პაციენტები შემთხვევითი წესით განაწილდნენ:

• პლაცებო და ქიმიოთერაპია, შემდეგ პლაცებოთი შემანარჩუნებელი მკურნალობა (241 პაციენტი);
• დურვალუმაბი და ქიმიოთერაპია, შემდეგ დურვალუმაბით შემანარჩუნებელი მკურნალობა (238 პაციენტი); ან
• დურვალუმაბი და ქიმიოთერაპია, შემდეგ დურვალუმაბითა და ოლაპარიბით შემანარჩუნებელი მკურნალობა (239 პაციენტი).

შედეგები

• მედიანური PFS პლაცებოსა და ქიმიოთერაპიის ჯგუფში 9,6 თვე, დურვალუმაბისა და ქიმიოთერაპიის ჯგუფში 10,2 თვე (HR, 0,71; 95% CI, 0,57-0,89; P =0,003), ხოლო დურვალუმაბის, ოლაპარიბისა და ქიმიოთერაპიის ჯგუფში 15,1 თვე იყო (HR, 0,55; 95% CI, 0,43-0,69; P <0,0001).
• მედიანური საერთო გადარჩენა პლაცებოსა და ქიმიოთერაპიის ჯგუფში 25,9 თვე იყო; დურვალუმაბისა და ქიმიოთერაპიის ჯგუფში ის ჯერ არ იყო მიღწეული (HR, 0,77; 95% CI, 0,56-1,07; P =0,120), ისევე როგორც დურვალუმაბის, ოლაპარიბისა და ქიმიოთერაპიის ჯგუფში (HR, 0,59; 95% CI, 0,42-0,83; P =0,003).

ექსპერიმენტულ შედარებაში დურვალუმაბისა და ოლაპარიბის კომბინაციით PFS მნიშვნელოვნად უფრო ხანგრძლივი იყო, ვიდრე მხოლოდ დურვალუმაბით (HR, 0,78; 95% CI, 0,61-0,99); ამავე კომბინაციით საერთო გადარჩენის გაუმჯობესების ტენდენციაც აღინიშნა (HR, 0,77; 95% CI, 0,53-1,10).

3 ან უფრო მაღალი ხარისხის გვერდითი ეფექტები პლაცებოსა და ქიმიოთერაპიის ჯგუფის პაციენტების 56,4%-ში, დურვალუმაბისა და ქიმიოთერაპიის ჯგუფის 54,9%-ში, ხოლო დურვალუმაბის, ოლაპარიბისა და ქიმიოთერაპიის ჯგუფის 67,2%-ში გამოვლინდა. სიკვდილის გამომწვევი გვერდითი ეფექტების რაოდენობა პლაცებოს ჯგუფში 8 იყო, დურვალუმაბის ჯგუფში 4, ხოლო დურვალუმაბისა და ოლაპარიბის ჯგუფში 5.

ეს მონაცემები გავრცელებული ენდომეტრიუმის კიბოს პირველი ხაზის ქიმიოთერაპიაში იმუნოთერაპიის ჩართვის კლინიკური სარგებლის დამადასტურებელი და ამ პირობებში PARP-ის ინჰიბიტორის დამატებით უფრო დიდი სარგებლის მიღების შესაძლებლობის მაჩვენებელი პირველი ყოვლისმომცველი კლინიკური კვლევის შედეგებია.

*

გამოსახულებების განმარტება: სტატიის მთავარი გამოსახულება და კვლევის მონაცემების გრაფიკები ChatGPT 4.0-ით შეიქმნა.