ESMO 2023: Yumurtalıq, uşaqlıq boynu və uşaqlıq xərçənglərində müalicələri dəyişə biləcək mühüm tədqiqatlar

ESMO 2023 Konqresində ginekoloji xərçənglərin müalicə üsulunu dərhal və ya yaxın gələcəkdə dəyişə biləcək mühüm faza-3 klinik tədqiqat nəticələri təqdim edildi.

INTERLACE sınağının nəticələri kimya-radioterapiyadan (KRT) əvvəl induksiya kimyaterapiyası tətbiqinin yerli irəliləmiş mərhələli servikal (uşaqlıq boynu) xərçəngi olan xəstələr üçün yeni standart müalicə yanaşması olmalı olduğunu irəli sürür. Bu yanaşma KRT-yə keçməzdən əvvəl induksiya kimyaterapiyasının tətbiqini əhatə edir.

KEYNOTE-A18 tədqiqatının nəticələri servikal xərçəng üçün alternativ birinci xətt standartı təklif edir: pembrolizumab immunoterapiyası ilə KRT.

innovaTV 301 sınağının nəticələri residivləşən və ya metastatik servikal xərçəngi olan xəstələr üçün əvvəllər sürətləndirilmiş FDA təsdiqi almış tisotumab vedotini yeni standart kimi təklif edir.

FLAMES sınağının məlumatları birinci xətt kimyaterapiyasına cavab verən, irəliləmiş yumurtalıq xərçəngi olan xəstələrdə senaparib saxlayıcı müalicəsi ilə "görünməmiş" proqressiyasız sağqalım (PFS) yaxşılaşması göstərdi.

AtTEnd sınağında kimyaterapiyaya atezolizumab əlavə edilməsi yeni diaqnoz qoyulmuş və ya təkrarlayan irəliləmiş endometrial (uşaqlıq) xərçəngi olan xəstələrdə PFS-ni yaxşılaşdırıb.

DUO-E sınağında kimyaterapiyaya durvalumab əlavə edilməsi və sonra yalnız durvalumab və ya olaparib ilə saxlayıcı müalicənin aparılması irəliləmiş və ya residivləşən endometrial (uşaqlıq) xərçəngi olan xəstələrdə PFS-ni yaxşılaşdırıb.

İndi tədqiqatları bir-bir nəzərdən keçirək:

INTERLACE: Yerli irəliləmiş servikal xərçəngdə induksiya kimyaterapiyası üstəgəl KRT

Faza 3 INTERLACE sınağı yeni diaqnoz qoyulmuş, yerli irəliləmiş mərhələdə olduğu üçün əməliyyatla çıxarıla bilməyən servikal xərçəngli 500 xəstəni əhatə etdi. Xəstələr təsadüfi olaraq induksiya kimyaterapiyası (6 həftə karboplatin və paklitaksel) üstəgəl standart KRT (250 xəstə) və ya yalnız standart KRT (250 xəstə) almaq üçün iki tədqiqat qolundan birinə bölündülər. Median izləmə müddəti 64 ay idi.

• İnduksiya kimyaterapiyasının xərçəngin irəliləmə riskini əhəmiyyətli dərəcədə, 35% azaltdığı aşkar edildi (təhlükə nisbəti [HR], 0,65; 95% etibar intervalı [CI], 0,46-0,91; P =0,013).
• Beşillik PFS (proqressiyasız sağqalım, yəni müalicə ilə xəstəliyi nəzarətdə saxlama göstəricisi) induksiya qolunda 73%, yalnız KRT qolunda isə 64% idi.
• İnduksiya qolundakı xəstələrdə ümumi sağqalım əhəmiyyətli yaxşılaşdı; induksiya kimyaterapiyasının verilməsinin ölüm riskini 39% azaltdığı aşkar edildi (HR, 0,61; 95% CI, 0,40-0,91; P =0,04).
• Beşillik ümumi sağqalım göstəricisi induksiya qolunda 80%, yalnız CRT qolunda isə 72% idi.

Bu, son 20 ildən artıq müddətdə yerli irəliləmiş servikal xərçəngdə sağqalım faydası göstərən ilk faza 3 randomizə edilmiş tədqiqatdır.

Ağır (3-4-cü dərəcəli) yan təsirlər induksiya kimyaterapiyası qolundakı xəstələrin 59%-unda və yalnız KRT qolundakıların 48%-ində müşahidə edildi.

Bu nəticələr yerli irəliləmiş servikal xərçəngdə KRT-dən əvvəl induksiya kimyaterapiyasının yeni standart kimi nəzərdən keçirilməli olduğunu göstərir.

KEYNOTE-A18: Yerli irəliləmiş servikal xərçəngdə pembrolizumab üstəgəl KRT

Faza 3 KEYNOTE-A18 sınağı əvvəllər müalicə almamış, yüksək riskli, yerli irəliləmiş servikal xərçəngi olan 1060 xəstəni əhatə etdi. Xəstələr təsadüfi olaraq pembrolizumab və KRT (529 xəstə) və ya plasebo və KRT (531 xəstə) almaq üçün bölündülər. Median izləmə müddəti 17,9 ay idi.

• Hər iki müalicədə median PFS-yə çatılmadı, lakin pembrolizumab ilə PFS 30% yaxşılaşdı (HR, 0,70; 95% CI, 0,55-0,89; P =0,0020). Pembrolizumab ilə ümumi sağqalımda da yaxşılaşma meyli var idi; ölüm riski 27% azaldı (HR, 0,73; 95% CI, 0,49-1,07).

3-cü dərəcəli və ya daha ağır müalicə ilə əlaqəli yan təsirlər pembrolizumab qolundakı xəstələrin 67%-sində və plasebo qolundakıların 60,6%-sında baş verdi.

Bu məlumatlar yeni diaqnoz qoyulmuş, əvvəllər müalicə edilməmiş, yüksək riskli, yerli irəliləmiş servikal xərçəngli xəstələr üçün pembrolizumab üstəgəl kimya-radioterapiyanın potensial yeni standart müalicə ola biləcəyini dəstəkləyir.

innovaTV 301: Residivləşən, metastatik servikal xərçəngdə tisotumab vedotin

Faza 3 innovaTV 301 sınağı əvvəllər ən çox iki xətt müalicə almış residivləşən və ya metastatik servikal xərçəngi olan 502 xəstəni əhatə edir.

Xəstələr təsadüfi olaraq tisotumab vedotin (253 xəstə) və ya tədqiqatçının seçdiyi kimyaterapiya (249 xəstə) almaq üçün bölündülər. Kimyaterapiya seçimlərinə gemsitabin, irinotekan, pemetreksed, topotekan və ya vinorelbin daxil idi. Median izləmə müddəti 10,8 ay idi.

• Median PFS tisotumab vedotin qolunda 4,2 ay, kimyaterapiya qolunda isə 2,9 ay idi (HR, 0,67; 95% CI, 0,54-0,82; P <0,0001).
• Median ümumi sağqalım tisotumab vedotin qolunda 11,5 ay, kimyaterapiya qolunda isə 9,5 ay idi (HR, 0,70; 95% CI, 0,54-0,89; P =0,0038).

3-cü dərəcəli və ya daha ağır müalicə ilə əlaqəli yan təsirlər tisotumab vedotin qolundakı xəstələrin 29,2%-sində və kimyaterapiya qolundakıların 45,2%-sində baş verdi.

Bu məlumatlara əsasən, tisotumab vedotin birinci xətt sistemik müalicədən sonra xəstəliyi irəliləyən xəstələr üçün potensial yeni standart müalicə kimi nəzərdən keçirilə bilər.

Bu tədqiqatın məlumatları tisotumab vedotinin əvvəllər 20 sentyabr 2021-ci ildə aldığı sürətləndirilmiş FDA təsdiqini tam təsdiqə çevirə bilər.

FLAMES: İrəliləmiş yumurtalıq xərçəngində senaparib saxlayıcı müalicəsi

Faza 3 FLAMES sınağı birinci xətt platin əsaslı kimyaterapiyaya cavab verən, III/IV mərhələli, yüksək dərəcəli seroz və ya endometrioid yumurtalıq, fallop borusu və ya birincili peritoneal xərçəngi olan xəstələri əhatə etdi.

Xəstələr təsadüfi olaraq senaparib (271 xəstə) və ya plasebo (133 xəstə) saxlayıcı müalicəsi almaq üçün bölündülər. Median izləmə müddəti 22,3 ay idi.

• Senaparib qolunda median PFS-yə çatılmadı, plasebo qolunda isə 13,6 ay idi; platin əsaslı kimyaterapiyadan sonra saxlayıcı müalicə kimi senaparib istifadəsi xərçəngin irəliləmə riskini 57% azaltdı (HR, 0,43; 95% CI 0,32-0,58, P <0,0001).

BRCA mutasiya vəziyyətindən asılı olmayaraq xəstələr senaparib ilə PFS faydası gördülər.

3-cü dərəcəli və ya daha ağır müalicə ilə əlaqəli yan təsirlərin göstəricisi senaparib qolunda 66,3%, plasebo qolunda isə 20,3% idi.

Bu nəticələr həmin xəstə qrupunda senaparib saxlayıcı müalicəsinin istifadəsini dəstəkləyir. Senaparib ilə PFS-də müşahidə olunan bu yaxşılaşmanın PARP inhibitorları ilə indiyədək bildirilənlərin ən yaxşısı olduğunu deyə bilərik.

AtTEnd: İrəliləmiş endometrial xərçəngdə atezolizumab üstəgəl kimyaterapiya

Faza 3 AtTEnd sınağı III-IV mərhələli endometrial xərçəngi olan 549 xəstəni əhatə edib. Xəstələr yeni diaqnoz qoyulmuş və ya residivləşən xəstəliyə malik ola bilərdilər, lakin residivləşən xərçəng üçün əvvəllər müalicə almamaları tələb olunurdu.

Xəstələr təsadüfi olaraq atezolizumab (360 xəstə) və ya plasebo (189 xəstə) almaq üçün bölündülər; hər ikisi 21 gündən bir 6 ilə 8 dövr ərzində paklitaksel və karboplatinlə kombinasiyada verildi. Sonra xəstəlik irəliləyənədək atezolizumab və ya plasebo saxlayıcı müalicəsi davam etdirildi.

• Median PFS atezolizumab qolunda 10,1 ay, plasebo qolunda isə 8,9 ay idi (HR, 0,74; 95% CI, 0,61-0,91; P =0,0219).
• Ümumi məlumatlar hələ tam yetişməsə də, median ümumi sağqalım atezolizumab qolunda 38,7 ay, plasebo qolunda isə 30,2 ay idi (HR, 0,82; 95% CI, 0,63-1,07; P =0,0483).

PFS-də yaxşılaşma xüsusilə DNA uyğunsuzluqlarının təmiri çatışmazlığı (dMMR) olan xəstələrdə atezolizumab ilə müşahidə edilən faydaya bağlı idi.

dMMR kohortunda atezolizumab qolunda median PFS-yə çatılmadı, plasebo qolunda isə 6,9 ay idi (HR, 0,36; 95% CI, 0,23-0,57; P =0,0005). Bu alt qrupda median ümumi sağqalım atezolizumab qolunda əldə edilmədi, plasebo qolunda isə 25,7 ay idi (HR, 0,41; 95% CI, 0,22-0,76).

Bütün xəstələr üzrə atezolizumab və ya plasebo ilə əlaqəli 3-cü dərəcəli və ya daha ağır yan təsirlər atezolizumab qolundakı xəstələrin 25,8%-ində və plasebo qolundakıların 14,1%-ində müşahidə edildi.

AtTEnd irəliləmiş və ya residivləşən endometrial karsinoması olan xəstələrdə, xüsusilə dMMR hallarında kimyaterapiya ilə birlikdə immun nəzarət nöqtəsi inhibitorlarının çox yaxşı effektivliyini təsdiqləyir.

Bu nəticələr dMMR endometrial xərçəngi olan xəstələrdə immunoterapiya üstəgəl kimyaterapiyanın "həqiqətən işlədiyini" təsdiqləyir. Buna görə irəliləmiş uşaqlıq xərçəngi olan bütün xəstələrdə şişin dMMR statusunu test etməyin əhəmiyyətini vurğulayır.

DUO-E: Endometrial xərçəngdə kimyaterapiyaya durvalumab və olaparib əlavə edilməsi

Faza 3 DUO-E sınağı əvvəllər PARP inhibitoru, immunoterapiya və ya irəliləmiş xəstəlik üçün hər hansı sistemik müalicə almamış, residivləşən və ya yeni diaqnoz qoyulmuş III/IV mərhələli endometrial xərçəngli 718 xəstəni əhatə edir.

Xəstələr təsadüfi olaraq

• plasebo üstəgəl kimyaterapiya, sonra plasebo saxlayıcı müalicəsi (241 xəstə),
• durvalumab üstəgəl kimyaterapiya, sonra durvalumab saxlayıcı müalicəsi (238 xəstə) və ya
• durvalumab üstəgəl kimyaterapiya, sonra durvalumab və olaparib saxlayıcı müalicəsi (239 xəstə) almaq üçün bölündülər.

Nəticələr

• Median PFS plasebo-kimyaterapiya qolunda 9,6 ay, durvalumab-kimyaterapiya qolunda 10,2 ay (HR, 0,71; 95% CI, 0,57-0,89; P =0,003) və durvalumab-olaparib-kimyaterapiya qolunda 15,1 ay idi (HR, 0,55; 95% CI, 0,43-0,69; P <0,0001).
• Median ümumi sağqalım plasebo-kimyaterapiya qolunda 25,9 ay idi, durvalumab-kimyaterapiya qolunda isə hələ əldə edilməmişdi (HR, 0,77; 95% CI, 0,56-1,07; P =0,120); durvalumab-olaparib-kimyaterapiya qolunda da əldə edilməmişdi (HR, 0,59; 95% CI, 0,42-0,83; P =0,003).

Eksperimental müqayisədə durvalumab-olaparib ilə PFS durvalumaba nisbətən əhəmiyyətli dərəcədə daha uzun idi (HR, 0,78; 95% CI, 0,61-0,99) və durvalumab-olaparib ilə ümumi sağqalımda yaxşılaşma meyli var idi (HR, 0,77; 95% CI, 0,53-1,10).

3-cü dərəcəli və ya daha ağır yan təsirlər plasebo-kimyaterapiya qolundakı xəstələrin 56,4%-ündə, durvalumab-kimyaterapiya qolundakıların 54,9%-unda və durvalumab-olaparib-kimyaterapiya qolundakıların 67,2%-sində baş verdi. Plasebo qolunda ölümlə nəticələnən 8 yan təsir, durvalumab qolunda 4, durvalumab-olaparib qolunda isə 5 yan təsir var idi.

Bu məlumatlar irəliləmiş endometrial xərçəngdə birinci xətt kimyaterapiyasına immunoterapiyanın inteqrasiyasının klinik faydasını təsdiqləyən və bu şəraitdə PARP inhibitorunun əlavə edilməsinin daha çox fayda verə biləcəyini göstərən ilk əhatəli klinik tədqiqat nəticələridir.

*

Vizualların izahı: Yazının əsas vizualı və tədqiqat məlumatlarının qrafikləri ChatGPT 4.0 ilə yaradılıb.