კიბოსთვის შექმნილი პრეპარატი COVID-19-ით სიკვდილის რისკს ნახევრით ამცირებს

აღმოჩნდა, რომ კიბოს სამკურნალოდ შექმნილმა საბიზაბულინის შემცველმა, აბის სახით მისაღებმა საკვლევმა პრეპარატმა ჰოსპიტალიზებულ COVID-19 პაციენტებში სიკვდილის რისკი 55%-ზე მეტით შეამცირა.

კვლევის მკვლევარმა და Veru Pharmaceuticals-ის გენერალურმა დირექტორმა, დოქტორმა მიტჩელ შტაინერმა, ფაზა-3 პლაცებოკონტროლირებადი კვლევის შუალედური ანალიზი საინფორმაციო განცხადებაში წარადგინა. კვლევის სამეცნიერო ტექსტი 6 ივლისს NEJM Evidence ჟურნალში გამოქვეყნდა.

კომპანია Veru-მ COVID-19-ის სამკურნალოდ საბიზაბულინის გამოყენებისთვის FDA-ს (აშშ-ის სურსათისა და წამლის ადმინისტრაციას) გადაუდებელი გამოყენების ნებართვის მოთხოვნა წარუდგინა.

პროსტატის კიბოს დამიზნება და COVID-19-ზე დარტყმა

4. სტადიის ჰორმონების დათრგუნვისადმი რეზისტენტული პროსტატის კიბოს სამკურნალოდ შექმნილი საბიზაბულინი პერორალური, მიკროტუბულების დამრღვევი პრეპარატია, რომელსაც ანტივირუსული და ანთების საწინააღმდეგო მოქმედება აქვს. პროსტატის კიბოს სამკურნალოდ მას FDA-ის ნებართვა ჯერ არ მიუღია.

მიკროტუბულები ცილოვანი მოლეკულებია, რომლებიც უჯრედის ჩონჩხს ქმნის. მათი ერთ-ერთი ფუნქციაა უჯრედის გაყოფისას თითოეული ახალი უჯრედისთვის განკუთვნილი გენეტიკური ინფორმაციის ახლად წარმოქმნილ უჯრედებში გადატანა. საბიზაბულინი მიკროტუბულების მუშაობას არღვევს და უჯრედების გაყოფას აფერხებს.

პრეპარატის მოქმედების მექანიზმის გათვალისწინებით, Veru-ს მკვლევრებმა ივარაუდეს, რომ საბიზაბულინი COVID-19 პაციენტებში ფილტვის ანთების მკურნალობასაც შეიძლება დახმარებოდა (პრეპარატის მოქმედების მექანიზმი სტატიის ბოლოს უფრო დაწვრილებითაა ახსნილი).

NEJM Evidence ჟურნალში გამოქვეყნებული კვლევის მიგნებები ეფუძნება მწვავე რესპირატორული დისტრესის სინდრომისა (SARS) და სიკვდილის მაღალი რისკის მქონე, ზომიერი ან მძიმე COVID-19-ის გამო ჰოსპიტალიზებულ 150 ზრდასრულს. პაციენტები შემთხვევითი განაწილებით 21 დღემდე დღეში ერთხელ 9 mg პერორალური საბიზაბულინის (98 პაციენტი) ან პლაცებოს (52 პაციენტი) მისაღებად დაყვეს.

საერთო ჯამში, COVID-19-ის გამო ჰოსპიტალიზებულ პაციენტებში სიკვდილიანობა საბიზაბულინის ჯგუფში 20,2% იყო, პლაცებოს ჯგუფში კი – 45,1%. პლაცებოსთან შედარებით საბიზაბულინით მკურნალობამ პროცენტულად სიკვდილიანობის 55,2%-ით შეფარდებითი შემცირება გამოიწვია.

პლაცებოსთან შედარებით საბიზაბულინმა ინტენსიური თერაპიის დღეების 43%-ით მნიშვნელოვანი შეფარდებითი შემცირება, მექანიკურ ვენტილაციაზე ყოფნის დღეების 49%-ით და საავადმყოფოში გატარებული დღეების 26%-ით შეფარდებითი შემცირება გამოიწვია.

არასასურველი და სერიოზული გვერდითი ეფექტებიც საბიზაბულინის ჯგუფში (61,5%) უფრო ნაკლები იყო, ვიდრე პლაცებოს ჯგუფში (78,3%).

საბოლოოდ, ეს მონაცემები საკმაოდ შთამბეჭდავია მძიმე COVID-19 პაციენტებისთვის, რომელთათვისაც ჭეშმარიტად ეფექტიანი მკურნალობის შესაძლებლობა ძალიან ცოტა გვაქვს. თუმცა ეს შუალედური ანალიზია და მარეგულირებელ უწყებებს აშკარად მეტი მონაცემის ნახვა მოუნდებათ. ამასთან, კიბოსთვის შექმნილი პრეპარატის ეფექტიანობა ნამდვილად ახალი და საკმაოდ საინტერესო მოვლენაა.

*

დამატებითი საკითხავი საბიზაბულინის შესახებ