ფილტვის კიბოს ოპერაციამდე ნივოლუმაბით პათოლოგიური სრული პასუხი 40%-ზე მეტია!

ბოლო 1 წლის განმავლობაში ადრეული სტადიის, ანუ ოპერაბელური არაწვრილუჯრედოვანი ფილტვის კიბოს მკურნალობა იმუნოთერაპიის წარმატებამ მთლიანად შეცვალა. ასეთ პაციენტებში ოპერაციამდე მკურნალობაზე იმუნოთერაპიის დამატების ძალიან ძლიერი მტკიცებულებები ASCO 2022 შეხვედრაზე წარმოდგენილმა NADIM II კვლევამ მოგვცა.

• NADIM II კვლევამ აჩვენა, რომ ნეოადიუვანტური (ოპერაციამდე სიმსივნის შესამცირებელი) მიზნით მიცემული ნივოლუმაბი და კარბოპლატინზე დაფუძნებული ქიმიოთერაპია, IIIA სტადიის არაწვრილუჯრედოვანი ფილტვის კიბოთი (KHDAK) დაავადებულ პაციენტებში, მხოლოდ ქიმიოთერაპიასთან შედარებით, მნიშვნელოვნად აუმჯობესებდა პათოლოგიურ სრულ პასუხს.
• ეს კვლევა ადასტურებს CheckMate-816 კვლევის შედეგებს, რომელთა საფუძველზეც ეს მკურნალობა მანამდე FDA-მ (აშშ-ის სურსათისა და მედიკამენტების ადმინისტრაციამ) დაამტკიცა.
• ქიმიოთერაპიაზე ნეოადიუვანტური ნივოლუმაბის დამატებამ, მხოლოდ ქიმიოთერაპიის ჯგუფთან შედარებით, მაღალი ხარისხის გვერდითი მოვლენების სიხშირე არ გაზარდა და ქირურგიული ჩარევის მაჩვენებელი გაზარდა.

FDA-მ 2022 წლის 4 მარტს, რანდომიზებული, ღია, III ფაზის CheckMate-816 კვლევის შედეგების საფუძველზე, ნეოადიუვანტური ნივოლუმაბი და ქიმიოთერაპია დაამტკიცა ოპერაბელური IB, II და IIIA სტადიის (სიმსივნე ≥ 4 cm ან ლიმფური კვანძები დადებითია) KHDAK-ის მქონე 358 პაციენტისთვის. კვლევაში კომბინირებული მკურნალობის მიმღებ მონაწილეებში, მხოლოდ ქიმიოთერაპიასთან შედარებით, პათოლოგიური სრული პასუხისა (pTY) და მოვლენების გარეშე გადარჩენადობის გაუმჯობესება დაფიქსირდა. საერთო გადარჩენადობის მედიანისთვის ჯერ არ მიუღწევიათ.

ფილტვის კიბოს ოპერაციამდე იმუნოთერაპია დიდ ინტერესს იწვევს

NADIM II კვლევის ერთ-ერთი ძლიერი მხარეა IIIA სტადიის დაავადებაზე ფოკუსირება. ამ პაციენტებში დაავადების შედეგები არცთუ კარგია და ამ ჯგუფისთვის სტანდარტული მიდგომა არ გვაქვს. ეს მონაცემები ოპერაბელური III სტადიის KHDAK-ისთვის აქამდე მიღებულ საუკეთესო შედეგებს აჩვენებს.

NADIM II კვლევაში მონაწილეობდა 86 პაციენტი, რომლებიც ესპანეთის კლინიკებში შემთხვევითი წესით, 2:1 თანაფარდობით, ნივოლუმაბისა და კარბოპლატინზე დაფუძნებული ქიმიოთერაპიის (57 პაციენტი) ან მხოლოდ ქიმიოთერაპიის (29 პაციენტი) მისაღებად განაწილდნენ. პაციენტების ECOG ფუნქციური სტატუსი უნდა ყოფილიყო 0 ან 1 და მათ არ უნდა ჰქონოდათ არცერთი ცნობილი EGFR ან ALK მუტაცია.

კვლევის პირველადი საბოლოო წერტილი იყო pTY, რომელიც ბრმა, დამოუკიდებელი პათოლოგიური შეფასებით განისაზღვრა.

სურათი. პაციენტთა მთლიან ჯგუფში პათოლოგიური სრული პასუხის მაჩვენებლები ნეოადიუვანტური ნივოლუმაბისა და ქიმიოთერაპიის შედარებისას მხოლოდ ქიმიოთერაპიასთან

• pTY განისაზღვრა როგორც ნარჩენი ცოცხალი სიმსივნური უჯრედების 0% როგორც პირველად სიმსივნეში (ფილტვში), ისე ნიმუშად აღებულ ლიმფურ კვანძებში.
• პაციენტები, რომლებსაც ოპერაცია არ ჩაუტარდათ, პასუხის არმქონეებად ჩაითვალნენ.
• ნივოლუმაბისა და ქიმიოთერაპიის მიმღებ პაციენტებში მნიშვნელოვნად მაღალი იყო ასევე მეორეული საბოლოო წერტილების — მნიშვნელოვანი პათოლოგიური პასუხის (ძირითად სიმსივნეში ≤10% ნარჩენი ცოცხალი სიმსივნე) და ობიექტური პასუხის — მაჩვენებლები.

ქიმიოთერაპიაზე ნივოლუმაბის დამატებამ NADIM II კვლევაში გვერდითი მოვლენები მნიშვნელოვნად არ გაზარდა. კომბინირებული მკურნალობის ჯგუფის პაციენტთა 25%-სა და მხოლოდ ქიმიოთერაპიის ჯგუფის პაციენტთა 10,3%-ს 3/4 ხარისხის არასასურველი მოვლენა განუვითარდა. არცერთ ჯგუფში მკურნალობასთან დაკავშირებული 5 ხარისხის არასასურველი მოვლენა არ მომხდარა.

კომბინირებული მკურნალობის ჯგუფის პაციენტთა 93%-ს მკურნალობის შემდეგ ოპერაცია ჩაუტარდა, საკონტროლო ჯგუფში კი ეს მაჩვენებელი 69% იყო (OR 5,96, 95% GA [1,65; 21,56]; P = 0,00807).

აშკარაა, რომ იმუნოთერაპიის მიმღებ მეტ პაციენტს ჩაუტარდა ოპერაცია, რადგან ნივოლუმაბის დამატება, ბევრი გვერდითი მოვლენის დამატების გარეშე, სიმსივნის შემცირებაში უფრო ეფექტიანი ჩანს.

წინა NADIM I კვლევაში ჩართეს პაციენტები, რომლებიც იღებდნენ ნეოადიუვანტურ ნივოლუმაბსა და კარბოპლატინზე დაფუძნებულ ქიმიოთერაპიას, შემდეგ კი ადიუვანტური ნივოლუმაბით მონოთერაპიას; ისინი ოპერაბელური IIIA სტადიის KHDAK-ის მქონე 46 პაციენტი იყვნენ. ამ კვლევამ ახლახან, დაკვირვების მედიანური 38 თვის პირობებში, 81,9% საერთო გადარჩენადობა გამოაქვეყნა.

ესპანეთის ქალაქ მადრიდში მდებარე Puerta de Hierro ჰოსპიტლის წარმომადგენელმა და ესპანეთის ფილტვის კიბოს ჯგუფის პრეზიდენტმა დოქტორმა Mariano Provencio-მ უხელმძღვანელა NADIM I და II კვლევებს და NADIM II-ის შედეგები ASCO 2022-ზე წარადგინა.

"ამ ისტორიის პირველი ნაწილი კონცეფციის დადასტურება იყო — NADIM I, შემდეგ CheckMate-816-მა შედეგები დაადასტურა. ახლა NADIM II ადასტურებს CheckMate-816-ის შედეგებს. ვფიქრობ, წრე შევკარით," — თქვა დოქტორმა Provencio-მ.

CheckMate-816 და NADIM II პაციენტებზე დაკვირვებას აგრძელებენ საერთო გადარჩენადობის მედიანის დასადგენად.

კარბოპლატინი თუ ცისპლატინი?

NADIM II-ის ახალმა შედეგებმა წამოჭრა კითხვა, შეიძლება თუ არა კარბოპლატინზე დაფუძნებული ქიმიოთერაპია ნივოლუმაბთან კომბინაციაში უფრო ეფექტიანი იყოს, ვიდრე ცისპლატინზე დაფუძნებული ქიმიოთერაპია. CheckMate-816-მა ნივოლუმაბისა და კარბოპლატინზე დაფუძნებული ქიმიოთერაპიის მიმღებ პაციენტებში უფრო მაღალი pTY მაჩვენებლები გამოავლინა, ვიდრე ნივოლუმაბისა და ცისპლატინზე დაფუძნებული ქიმიოთერაპიის მიმღებებში (30,8%, 21,8%-თან შედარებით). NADIM II-ში, სადაც კარბოპლატინზე დაფუძნებული ქიმიოთერაპია გამოიყენეს, pTY მაჩვენებელი კიდევ უფრო მაღალი — 36,8% — იყო.

PD-L1-დადებით ქვეჯგუფებში პათოლოგიურმა სრულმა პასუხმა 60%-ს მიაღწია

CheckMate-816-ის მსგავსად, NADIM II კვლევამ დაადგინა, რომ PD-L1-ის სიმსივნური პროპორციის ქულის (TPS) ≥ %1-ის საფუძველზე PD-L1-ის მაღალი ექსპრესიის მქონე პაციენტებში ნივოლუმაბისა და ქიმიოთერაპიის შემდეგ pTY-ის მიღწევის ალბათობა უფრო მაღალი იყო.

პაციენტებში, რომელთა PD-L1-დადებითობა TPS-ის მიხედვით 1-49% და ≥ %50 იყო, pTY მაჩვენებლები, შესაბამისად, 41,7% და 61,1% იყო.

იმ პაციენტებში, რომელთა PD-L1 ექსპრესია TPS-ის მიხედვით < %1 იყო, pTY მაჩვენებელი 15% აღმოჩნდა. ეს მხოლოდ ქიმიოთერაპიასთან შედარებით კვლავ უფრო მაღალი მაჩვენებელია და PD-L1-ის დაბალი ექსპრესიის მქონე პაციენტებიც, სავარაუდოდ, ამ მკურნალობისთვის შესაფერისი არიან.