როგორ მოქმედებს ჩვენი საკვები ძუძუს კიბოს რისკზე?
ამ სტატიაში
კვლევები აჩვენებს, რომ ჩვენმა საკვებმა შეიძლება კიბოს რისკზე იმოქმედოს. თუმცა ყოველთვის ნათელი არ არის, რომელი პროდუქტები ან კვების რომელი ტიპია საუკეთესო ამ რისკის შესამცირებლად.
სანამ შაჰისა და მისი კოლეგების მიერ ამერიკის კვების საზოგადოების Nutrition 2022 Live Online შეხვედრაზე წარმოდგენილმა ახალმა კვლევამ აჩვენა, რომ კვების ხარისხი საერთო ჯანმრთელობის გასაღები შეიძლება იყოს.
კვლევამ, რომელიც 2 წელზე მეტი ხნის განმავლობაში დაკვირვების ქვეშ მყოფ 65 ათასზე მეტ პოსტმენოპაუზურ ქალს მოიცავდა, აჩვენა, რომ ჯანსაღი მცენარეული კვების მიმდევრებს ძუძუს კიბოს რისკი 14%-ით დაბალი ჰქონდათ. არაჯანსაღი მცენარეული კვება (განმარტებულია ქვემოთ) კი ძუძუს კიბოს რისკის 20%-ით მეტ ზრდასთან იყო დაკავშირებული და ეს მიგნებები ძუძუს კიბოს ყველა ქვეტიპისთვის მოქმედებდა.
კვლევითი ცენტრის დოქტორანტმა სანამ შაჰმა განაცხადა: „ეს მიგნებები ხაზს უსვამს, რომ ჯანსაღი მცენარეული პროდუქტების მოხმარების გაზრდამ და ცხოველური პროდუქტების შემცირებამ შეიძლება ძუძუს კიბოს ნებისმიერი სახეობის პრევენციას შეუწყოს ხელი“.
- დაკავშირებული თემა: როგორ უნდა იკვებონ ძუძუს კიბოს მქონე პაციენტებმა მკურნალობის დროს და შემდეგ?
კვლევის დეტალები
წინა კვლევები შეისწავლიდა კიბოს რისკს, რომელიც კვების სხვადასხვა მოდელს, მაგალითად, დასავლურ, ხმელთაშუაზღვისა და ვეგეტარიანულ კვებას უკავშირდებოდა. მართალია, ზოგიერთი კვლევა მიუთითებს, რომ ნაკლები ხორცის შემცველ ან უხორცო კვებას ჯანმრთელობისთვის სარგებელი მოაქვს, შედეგები გარკვეულწილად არაერთგვაროვანია. ამ კვლევაში მკვლევრებმა ყურადღება გაამახვილეს ჯანსაღი მცენარეული პროდუქტების (მთლიანი მარცვლეული, ხილი, ბოსტნეული, თხილეული, პარკოსნები და მცენარეული ზეთები) და ნაკლებად ჯანსაღი მცენარეული პროდუქტების (ხილის წვენები, რაფინირებული მარცვლეული, კარტოფილი, შაქრიანი სასმელები და ტკბილეული) კატეგორიებად დაყოფასა და მათ ერთმანეთისგან გამიჯვნაზე.
შაჰმა განაცხადა: „ჩვენი კვლევის განსხვავება ისაა, რომ შევძელით მცენარეული პროდუქტების ხარისხის გაანალიზება, რაც წინა კვლევების ყურადღების ცენტრში არ ყოფილა“.
მკვლევრებმა გააანალიზეს საფრანგეთში მცხოვრები 65574 პოსტმენოპაუზური ქალის მონაცემები. მათ კვების კითხვარები 1993 და 2005 წლებში შეავსეს და საშუალოდ 21 წლის განმავლობაში აკვირდებოდნენ. კვლევის პერიოდში 3968 მონაწილეს ძუძუს კიბო დაუდგინდა.
კვების სხვადასხვა ხარისხის მქონე ქალებში ძუძუს კიბოს მაჩვენებლების შედარებამ ჯანსაღად და არაჯანსაღად კვების მიმდევრებს შორის კიბოს რისკის მნიშვნელოვანი განსხვავებები გამოავლინა.
მკვლევრებმა 18 საკვები ჯგუფი გამოიყენეს, რათა დაეხარისხებინათ, რამდენად იცავდნენ მონაწილეები მცენარეულ ან ცხოველურ კვებას და რამდენად იღებდნენ ჯანსაღ ან ნაკლებად ჯანსაღ პროდუქტებს.
ეს მიგნებები ხაზს უსვამს, რომ ჯანსაღი მცენარეული პროდუქტების მოხმარების გაზრდამ და ნაკლებად ჯანსაღი მცენარეული და ცხოველური პროდუქტების მოხმარების შემცირებამ შეიძლება ძუძუს კიბოს ნებისმიერი სახეობის პრევენციას შეუწყოს ხელი.
დასკვნის სახით, ჯანსაღი მცენარეული პროდუქტების არჩევა კიბოს პრევენციისთვის სასარგებლო ჩანს, თუმცა მოსახლეობის სხვადასხვა ჯგუფში კვებასა და კიბოს რისკს შორის კავშირის შესაფასებლად მეტი კვლევაა საჭირო.
*
- დაკავშირებული თემა: რა არის ყველაზე ჯანსაღი კვება — ხმელთაშუაზღვის დიეტა და როგორ დავიცვათ იგი?
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.