როგორ მოქმედებს ნაწლავის ბაქტერიები კიბოს მკურნალობაზე?

მკვლევრებმა დაადგინეს, რომ ავთვისებიანი მელანომის (კანის აგრესიული კიბოს) მქონე პაციენტებში Opdivo და Keytruda-ს მსგავსი იმუნოთერაპიებით მკურნალობის შედეგები ნაწლავის მიკრობიოტასთან არის დაკავშირებული. ადრეც არსებობდა კვლევები, რომლებიც იმუნოთერაპიაზე პასუხს ნაწლავის მიკრობიოტას უკავშირებდა, თუმცა თანმიმდევრული შედეგები ვერ იქნა მიღებული.

შენიშვნა: მიკრობიომი აღნიშნავს კონკრეტულ გარემოში მიკროორგანიზმების მთელ გენეტიკურ ინფორმაციას (გენომებს). მიკრობიოტა კი მიკროორგანიზმთა ერთობლიობაა. ადამიანის კუჭ-ნაწლავის სისტემაში დაახლოებით 100 ტრილიონი მიკროორგანიზმია. მათი უმრავლესობა ბაქტერიები, ვირუსები, სოკოები და უმარტივესებია.

Nature Medicine ჟურნალში 2022 წლის 28 თებერვალს გამოქვეყნებული ახალი კვლევის მიხედვით, მკვლევრებმა მიკრობული სეკვენირების მონაცემების მეტაანალიზი ჩაატარეს. მონაცემები მიიღეს ახალი საკვლევი ჯგუფიდან (Pittsburg-ის კოჰორტა) და ადრე გამოქვეყნებული 4 საკვლევი ჯგუფიდან, რომლებშიც იმუნოთერაპიის მიმღები მელანომის მქონე პაციენტები შედიოდნენ.

მკურნალობამდე ფეკალური მიკრობიომით მკურნალობაზე პასუხის პროგნოზირება

Pittsburg-ის ჯგუფში, რომელიც 94 პაციენტს მოიცავდა, მკვლევრებმა განავლის ნიმუშები ჯამში 63 პაციენტისგან იმუნოთერაპიის დაწყებამდე ან დაწყებიდან 4 თვის განმავლობაში აიღეს (Pittsburgh-ის ადრეული ნიმუშების ჯგუფი, P-ESC). გუნდმა ნიმუშები ასევე აიღო 31 პაციენტისგან მკურნალობის დაწყებიდან 4 თვის შემდეგ (Pittsburg-ის გვიანი ნიმუშების ჯგუფი, P-LSC).

P-ESC ჯგუფში იმუნოთერაპიის მიმღები პაციენტების ფეკალური (განავლის) მიკრობიომი განსხვავდებოდა იმ პაციენტების მიკრობიომისგან, რომლებსაც მკურნალობა არ ჩაუტარებიათ. კვლევის ბოლოს აღმოჩნდა, რომ მკურნალობამდე არსებული მიკრობიოტის შემადგენლობა ბევრად უფრო მჭიდროდ უკავშირდებოდა პროგრესირების გარეშე სიცოცხლის ხანგრძლივობას, რომელიც შორს წასული კიბოს დროს პრეპარატის მიერ კიბოს კონტროლის უნარის უმნიშვნელოვანესი მაჩვენებელია. ამის საპირისპიროდ, გვიანი ნიმუშების ჯგუფში (P-LSC) ფეკალურ მიკრობიომსა და პროგრესირების გარეშე სიცოცხლის ხანგრძლივობას შორის კავშირი არ გამოვლინდა.

Pittsburg-ის საკვლევი ჯგუფისა და ადრე გამოქვეყნებული კოჰორტული კვლევების ერთობლივი ანალიზით მკვლევრებმა დაადგინეს ბაქტერიები, რომლებიც დაავადების პროგრესირებასა და არაპროგრესირებას უკავშირდებოდა.

შედეგები

Bacteroides-ის გვარისა და Probacteria-ს ტიპის ბაქტერიები დაავადების პროგრესირებას უკავშირდებოდა, ხოლო Actinobacteria-ს ტიპისა და Firmicutes-ის Lachnospiraceae/Ruminococcaceae-ს ოჯახის ბაქტერიები დაავადების არაპროგრესირებასთან აღმოჩნდა დაკავშირებული.

Lachnospiraceae spp.-ით მდიდარი მიკრობიოტა იმუნოთერაპიაზე დადებით პასუხს უკავშირდება, ხოლო Streptococcaceae spp.-ით მდიდარი მიკრობიოტა — უარყოფით პასუხსა და იმუნურ რეაქციებთან დაკავშირებულ სხვადასხვა გვერდით მოვლენას.

პაციენტებს, რომლებსაც Streptococcus spp.-ის მაღალი რაოდენობა ჰქონდათ, პროგრესირების გარეშე სიცოცხლის ხანგრძლივობა მნიშვნელოვნად უფრო მოკლე ჰქონდათ, ვიდრე დაბალი რაოდენობის მქონე პაციენტებს.

საბოლოოდ, ამ კვლევის შედეგები ნათელს ჰფენს ნაწლავის მიკრობიოტასა და კიბოს იმუნოთერაპიაზე პასუხს შორის რთულ ურთიერთობას და მომავალი კვლევებისა და კიბოს სხვა სახეობების შესასწავლად გზამკვლევს ქმნის.