როტავირუსის ვაქცინა კიბოს იმუნოთერაპიის მიმართ რეზისტენტობის დასაძლევად

კიბოს კვლევის ამერიკული ასოციაციის 2018 წლის ყოველწლიურ შეხვედრაზეწარდგენილი კვლევის მიხედვით, როტავირუსის ვაქცინამ შესაძლოა დაძლიოს რეზისტენტობა, რომელსაც კიბოს უჯრედები ავითარებენ ახალი თაობის იმუნოთერაპიის, ე.წ. იმუნური საკონტროლო წერტილების ინჰიბიტორების მიმართ.
იმუნური საკონტროლო წერტილების ინჰიბიტორების კლასის იმუნოთერაპიული პრეპარატებიისეთი წამლებია, რომლებსაც შეუძლიათ კიბოს უჯრედების მიმართ იმუნური სისტემის სიბრმავის აღმოფხვრა. ისინი კიბოს მკურნალობის წამყვან ახალ მეთოდებს მიეკუთვნება და მრავალი სახის კიბოს დროს სხვადასხვა ხარისხით ეფექტიანია, ზოგიერთის შემთხვევაში კი უფრო გამოხატულად. სულ ცოტა ხნის წინ, 2012 წლამდე, კიბოს მკურნალობის ხსენებისას გვახსენდებოდა მხოლოდ ონკოლოგიური ოპერაციები, ქიმიოთერაპია, რადიოთერაპია, ინტერვენციული რადიოლოგიის პროცედურები, მოლეკულური მკურნალობა და მიზანმიმართული „ჭკვიანი“ პრეპარატები , დღეს კი ამ სიას იმუნოთერაპიაც დაემატა. იმუნოთერაპიამ აქამდე FDA -ს დამტკიცება მიიღო შემდეგი კიბოების დროს: კანის ავთვისებიანი მელანომა, არაწვრილუჯრედოვანი ფილტვის კიბო, ჰოჯკინის ლიმფომა, შარდის ბუშტის კიბო, თავისა და კისრის კიბოები, მერკელის უჯრედოვანი კანის კიბო, მსხვილი ნაწლავის კიბოები, კუჭისა და ღვიძლის კიბო. გარდა ამისა, ორგანოსგან დამოუკიდებლად, დამტკიცებულია მაღალი მიკროსატელიტური არასტაბილურობის მქონე (MSI-H) შორსწასული კიბოებისთვისაც.
იმუნოთერაპიამ, როგორც კიბოს მკურნალობის ახალმა ვარიანტმა, ჩვენი შესაძლებლობები ნამდვილად გააძლიერა, თუმცა ისიც არ არის სასწაულმოქმედი წამალი; იმ კიბოებშიც კი, რომლებშიც დამტკიცებულია, ყველა პაციენტში ვერ მიიღწევა ობიექტური პასუხის მაღალი მაჩვენებელი, ან კიბოს უჯრედებს დროთა განმავლობაში იმუნოთერაპიის მიმართ რეზისტენტობის განვითარება შეუძლიათ. ამიტომ ტარდება მრავალი კვლევა, რომლებიც იმუნოთერაპიისადმი რეზისტენტობის მექანიზმების დაძლევის გზებს ეძებს.
პატერნის ამომცნობი რეცეპტორები (pattern recognition receptors, PRR)მიიჩნევა პოტენციურ საშუალებად კიბოს უჯრედების იმუნოგენურობის, ანუ იმუნური სისტემის მიერ მათი ამოცნობადობის გასაზრდელად და მკურნალობისადმი რეზისტენტობის დასაძლევად. ამ სტატიის თემად ქცეულ კვლევაში მეცნიერებმა კიბოს უჯრედების სხვადასხვა ხაზი როტავირუსის ვაქცინით დააინფიცირეს ისე, რომ პატერნის ამომცნობი რეცეპტორები სტიმულირებულიყო.
კვლევამ აჩვენა, რომ როტავირუსის ვაქცინა არა მხოლოდ პატერნის ამომცნობ რეცეპტორებს ასტიმულირებდა, არამედ ონკოლიზურ თვისებასაც ავლენდა. სამკურნალო მიზნით შექმნილი კიბოს ვაქცინებისნაწილში ვირუსები გამოიყენება. ამ ვაქცინების შექმნისას გამოყენებულ ვირუსებს ონკოლიზური ვირუსი ეწოდება. სიტყვა „ონკოლიზური“ ნიშნავს „სიმსივნის გამანადგურებელს“.
როტავირუსის ვაქცინამ კიბოს უჯრედულ ხაზებში იმუნოგენური უჯრედული სიკვდილი გამოიწვია ისე, რომ ჯანმრთელ ფიბრობლასტებზე უარყოფითი გავლენა არ მოუხდენია. ეს ლაბორატორიული კვლევა თაგვებზეც ადაპტირდა და სიმსივნეში შეყვანილმა როტავირუსის ვაქცინამ იმუნური სისტემით განპირობებული სიმსივნის საწინააღმდეგო ეფექტი გამოავლინა.
ნეირობლასტომისა და ლიმფომის თაგვის მოდელებში აჩვენეს, რომ სიმსივნეში როტავირუსის ვაქცინით თერაპიას შეუძლია განსაკუთრებით ipilimumab (Yervoy)-ის მსგავსი anti-CTLA-4 იმუნური საკონტროლო წერტილების ინჰიბიტორების მიმართ განვითარებული რეზისტენტობის დაძლევა. ამ ექსპერიმენტული კიბოს ვაქცინის შემდეგ სიმსივნის მიკროგარემოშიგააქტიურებული T-უჯრედების ზრდა დაფიქსირდა.
მკვლევრებმა დაასკვნეს, რომ შესუსტებული როტავირუსის ვაქცინის სიმსივნეში შეყვანის სტრატეგიები შეიძლება სწრაფად დაინერგოს კლინიკაში, მათ შორის პედიატრიულ (ბავშვთა) კიბოებშიც. როტავირუსის ვაქცინის ონკოლიზური და იმუნომასტიმულირებელი თვისებები შესაძლოა შესაფერისი სტრატეგია იყოს კიბოს პაციენტებში anti-PD-1 / anti-CTLA-4 მკურნალობისადმი რეზისტენტობის დასაძლევად. იმუნოთერაპიისა და სხვა ონკოლიზური ვირუსული ვაქცინების შესახებაც მიმდინარეობს კვლევები; კლინიკურ კვლევებს ჩვენც დავაკვირდებით და შედეგებს გაგიზიარებთ.
წყაროები
Immunostimulatory and oncolytic properties of rotavirus can overcome resistance to immune checkpoint blockade therapy.
Oral presentation at: 2018 American Association for Cancer Research Annual Meeting; April 14-18, 2018
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.