საშვილოსნოს ყელის კიბოს პირველი ხაზის მკურნალობისთვის Pembrolizumab-მა FDA-ის ნებართვა მიიღო

სიმსივნეში PD-L1 -დადებითი (CPS ≥1), მკურნალობისადმი მდგრადი, განმეორებითი ან მეტასტაზური საშვილოსნოს ყელის (ცერვიქსის) კიბოს მქონე პაციენტების პირველი ხაზის მკურნალობისთვის, bevasizumab-ით ან მის გარეშე ქიმიოთერაპიასთან კომბინაციაში pembrolizumab-ის (Keytruda, Merck) იმუნოთერაპიამ 2021 წლის 13 ოქტომბერს FDA-ის (აშშ-ის სურსათისა და მედიკამენტების ადმინისტრაციის) ნებართვა მიიღო.

ამ ნებართვისთვის PD-L1-ის გასაზომად IHC 22C3 pharmDx (Dako-ს ტესტი) გამოიყენეს.

ამავე ნებართვით, 2018 წელს გაცემული დაჩქარებული ნებართვაც რეგულარულად გარდაიქმნა: pembrolizumab-ის მონოთერაპია PD-L1-ის (CPS ≥1) ექსპრესიის მქონე განმეორებითი ან მეტასტაზური საშვილოსნოს ყელის კიბოს პაციენტებში, რომელთაც დაავადება ქიმიოთერაპიის დროს ან შემდეგ გაუპროგრესირდათ.

KEYNOTE-826-ის კვლევით მიღებული ნებართვა

მრავალცენტრიანმა, რანდომიზებულმა, ორმაგად ბრმა, პლაცებოკონტროლირებულმა კვლევამ  KEYNOTE-826 pembrolizumab paklitaksel-სა და sisplatin-თან ან paklitaksel-სა და karboplatin-თან კომბინაციაში, bevasizumab-ით ან მის გარეშე შეისწავლა.

კვლევაში მკურნალობისადმი მდგრადი, განმეორებითი ან მეტასტაზური დაავადებისთვის მანამდე ნამკურნალები არმყოფი საშვილოსნოს ყელის კიბოს 617 პაციენტი ჩაერთო. კვლევაში შევიდნენ როგორც PD-L1-დადებითი, ისე უარყოფითი პაციენტები და 1:1 თანაფარდობით შემთხვევითად ორ ჯგუფში განაწილდნენ.

ექსპერიმენტული ჯგუფის პაციენტები — pembrolizumab პლუს ქიმიოთერაპია (bevasizumab-ით ან მის გარეშე)

საკონტროლო ჯგუფი — პლაცებო პლუს ქიმიოთერაპია (bevasizumab-ით ან მის გარეშე)

Pembrolizumab მიუღებელ ტოქსიკურობამდე, დაავადების პროგრესირებამდე ან 24 თვემდე გრძელდებოდა.

მთავარი ეფექტიანობის მაჩვენებლები საერთო გადარჩენა და პროგრესირებისგან თავისუფალი გადარჩენა იყო. დამატებით აფასებდნენ საერთო პასუხის სიხშირესა და პასუხის ხანგრძლივობას.

შედეგები

• PD-L1-ის ექსპრესიის (CPS ≥1) მქონე სიმსივნეების 548 პაციენტში pembrolizumab-ის ჯგუფის საერთო გადარჩენის მედიანას ვერ მიაღწიეს (95% სანდოობის ინტერვალი: 19,8, NR); პლაცებოს ჯგუფში ეს 16,3 თვე იყო (95% სანდოობის ინტერვალი: 14,5, 19,4).
• Pembrolizumab-ის გამოყენებამ სიკვდილის რისკი 36%-ით შეამცირა (HR 0,64; 95% სანდოობის ინტერვალი: 0,50, 0,81; 1-მხრივი p-მნიშვნელობა = 0,0001).
• პროგრესირებისგან თავისუფალი გადარჩენის მედიანა pembrolizumab-ის ჯგუფში 10,4 თვე იყო (95% სანდოობის ინტერვალი: 9,7, 12,3), პლაცებოზე კი — 8,2 თვე (95% სანდოობის ინტერვალი: 6,3, 8,5).
• Pembrolizumab-ის გამოყენებამ კიბოს პროგრესირების რისკი 38%-ით შეამცირა (HR 0,62; 95% სანდოობის ინტერვალი: 0,50, 0,77; ცალმხრივი p-მნიშვნელობა < 0,0001).
• ობიექტური პასუხის სიხშირე pembrolizumab-ის ჯგუფში 68% იყო (95% სანდოობის ინტერვალი: 62, 74), პლაცებოს ჯგუფში კი — 50% (95% სანდოობის ინტერვალი: 44, 56).
• პასუხის მედიანური ხანგრძლივობა pembrolizumab-ის ჯგუფში 18 თვე იყო, პლაცებოზე კი — 10 თვე.

Pembrolizumab-ით, ქიმიოთერაპიითა და bevasizumab-ით ნამკურნალებ პაციენტებში  ყველაზე ხშირი (≥ 20%) გვერდითი მოვლენები იყო პერიფერიული ნეიროპათია, ალოპეცია, ანემია, დაღლილობა/ასთენია, გულისრევა, ნეიტროპენია, დიარეა, ჰიპერტენზია, თრომბოციტოპენია,  ყაბზობა, ართრალგია, ღებინება, საშარდე გზების ინფექცია, გამონაყარი, ლეიკოპენია, ჰიპოთირეოზი და მადის დაქვეითება.

რეკომენდებული pembrolizumab-ის დოზაა ყოველ 3 კვირაში 200 mg ან ყოველ 6 კვირაში 400 mg დაავადების პროგრესირებამდე, მიუღებელ ტოქსიკურობამდე ან 24 თვემდე.