Pembrolizumab uşaqlıq boynu xərçənginin birinci xətt müalicəsi üçün FDA təsdiqi aldı

Şişləri PD-L1 baxımından müsbət (CPS ≥1) olan, müalicəyə davamlı, təkrarlayan və ya metastatik serviks (uşaqlıq boynu) xərçəngli pasiyentlərin birinci xətt müalicəsi üçün bevasizumablı və ya bevasizumabsız kimyaterapiya ilə birlikdə pembrolizumab (Keytruda, Merck) immunoterapiyası 13 oktyabr 2021-ci ildə FDA (ABŞ Qida və Dərman Administrasiyası) təsdiqi aldı.

PD-L1 ölçmək üçün IHC 22C3 pharmDx (Dako testi) istifadə edildi.

Eyni vaxtda 2018-ci ildə verilmiş sürətləndirilmiş təsdiq adi təsdiqə çevrildi: PD-L1 (CPS ≥1) ifadə edən, kimyaterapiya zamanı və ya sonra irəliləyən, təkrarlayan və ya metastatik serviks xərçəngində pembrolizumabın tək vasitə kimi istifadəsi.

KEYNOTE-826 tədqiqatı ilə gələn təsdiq

Çoxmərkəzli, randomizə, ikiqat kor, plasebo nəzarətli tədqiqat olan KEYNOTE-826, paklitaksel və sisplatin və ya paklitaksel və karboplatinlə pembrolizumabı bevasizumablı və ya bevasizumabsız araşdırıb.

Tədqiqata müalicəyə davamlı, təkrarlayan və ya metastatik xəstəlik üçün əvvəllər müalicə almamış serviks xərçəngli 617 pasiyent daxil edildi. Həm PD-L1 müsbət, həm mənfi pasiyentlər qəbul olundu və 1:1 nisbətində təsadüfi iki qoldan birinə ayrıldı.

Təcrübə qoluna pembrolizumab və kimyaterapiya (bevasizumablı və ya onsuz)

Nəzarət qoluna plasebo və kimyaterapiya (bevasizumablı və ya onsuz)

Pembrolizumab, qəbuledilməz toksiklik, xəstəlik irəliləməsi və ya 24 aya qədər davam etdirildi.

Əsas effektivlik nəticələri ümumi və proqressiyasız sağqalım idi. Əlavə göstəricilər ümumi cavab tezliyi və cavab müddəti idi.

Nəticələr

• PD-L1 ifadə edən (CPS ≥1) şişli 548 pasiyentdə pembrolizumab qolunda median ümumi sağqalım əldə olunmadı (%95 GA: 19.8, NR); plaseboda 16.3 ay idi (%95 GA: 14.5, 19.4).
• Pembrolizumab ölüm riskini %36 azaltdı (HR 0.64; %95 GA: 0.50, 0.81; 1-tərəfli p-dəyəri = 0.0001).
• Median proqressiyasız sağqalım pembrolizumabda 10,4 ay (%95 GA: 9,7, 12,3), plaseboda 8,2 ay idi (%95 GA: 6,3, 8,5).
• Pembrolizumab irəliləmə riskini %38 azaltdı (HR 0,62; %95 GA: 0,50, 0,77; birtərəfli p-dəyəri < 0.0001).
• Obyektiv cavab pembrolizumabda %68 (%95 GA: 62, 74), plaseboda %50 idi (%95 GA: 44, 56).
• Median cavab müddəti pembrolizumabda 18 ay, plaseboda 10 ay idi.

Pembrolizumab, kimyaterapiya və bevasizumabla müalicə edilən pasiyentlərdə ən çox görülən (≥ %20) yan təsirlər, periferik neyropatiya, alopesiya, anemiya, yorğunluq/asteniya, ürəkbulanma, neytropeniya, ishal, hipertoniya, trombositopeniya, qəbizlik, artralgiya, qusma, sidik yolu infeksiyası, səpgi, leykopeniya, hipotireoz və iştaha azalması idi.

Tövsiyə olunan pembrolizumab dozası, xəstəlik irəliləyənədək, qəbuledilməz toksikliyədək və ya 24 aya qədər hər 3 həftədə 200 mg və ya hər 6 həftədə 400 mg-dır.