შეუძლია თუ არა ფოლიუმის მჟავის დანამატს კუჭის კიბოსწინარე ცვლილებების უკუგანვითარება?

ახალი მეტაანალიზის თანახმად, ფოლიუმის მჟავის დანამატმა შეიძლება კუჭში კიბოსწინარე დაზიანებები, მათ შორის კუჭის ლორწოვანის ატროფია და ნაწლავური მეტაპლაზია, გააუმჯობესოს.

ფოლიუმის მჟავით კუჭის დაზიანებებზე ზემოქმედება

ჩინეთში ჩატარებული ამ კვლევის მთავარმა მკვლევარმა Jinhao Zeng-მა განაცხადა: „მიგვაჩნია, რომ ექიმებს შეუძლიათ სცადონ ფოლიუმის მჟავის გამოყენება კუჭის კიბოსწინარე ცვლილებების პროგრესირების შესაჩერებლად ან უკუგანსავითარებლად და ამით კუჭის კიბოს სიხშირე შეამცირონ.“.

კვლევა ონლაინ BMC Gastroenterology ჟურნალში გამოქვეყნდა.

თუმცა Zeng-მა გააფრთხილა, რომ მეტაანალიზისთვის შესაბამისი კვლევების რაოდენობა „შედარებით არასაკმარისი იყო და შედეგები ფრთხილად უნდა განიმარტოს“.

შედეგები, რომლებიც ფრთხილად უნდა განიმარტოს

მიიჩნევა, რომ ეს პირველი მეტაანალიზია, რომელიც კუჭის კიბოსწინარე დაზიანებების მქონე პაციენტებში ფოლიუმის მჟავის პრევენციულ და სამკურნალო ეფექტებს სწავლობს. ანალიზი მოიცავდა 13 რანდომიზებულ კონტროლირებულ კვლევას, ჯამში ჩინეთში მცხოვრებ 1252 ზრდასრულში კუჭის კიბოსწინარე დაზიანებებით.

შენიშვნა: კუჭის კიბოსწინარე დაზიანებები მოიცავს კუჭის დისპლაზიას, კუჭის ადენომას, კუჭის ატროფიას, ნაწლავურ მეტაპლაზიასა და დისპლაზიას. ეს ცვლილებები უმეტესად Helicobacter pylori-ის სახელით ცნობილი ბაქტერიის ქრონიკული ინფექციის გამო ვითარდება.

• დაკავშირებული თემა: კუჭის კიბოს პრევენცია Helicobacter pylori-ის ინფექციის მკურნალობით

Zeng-ისა და კოლეგების ცნობით, ხუთი კვლევის მეტაანალიზმა აჩვენა, რომ ფოლიუმის მჟავის დანამატს კუჭის ლორწოვანის ატროფიაზე სტატისტიკურად მნიშვნელოვანი დადებითი სამკურნალო ეფექტი ჰქონდა: ფარდობითი რისკის შემცირება 1,61-ჯერ; 95% GA: 1,07 – 2,41.

მათ ასევე დაადგინეს, რომ ორი კვლევის მეტაანალიზში ფოლიუმის მჟავამ ნაწლავური მეტაპლაზიის უკუგანვითარებაზე სტატისტიკურად მნიშვნელოვანი ეფექტი აჩვენა: რისკის შემცირება 1,77-ჯერ; 95% GA: 1,32 – 2,37.

მკვლევრები წერენ: „ჩვენი კვლევა აჩვენებს, რომ 3-6 თვის განმავლობაში ყოველდღიურად ფოლიუმის მჟავის 20-30 mg კუჭის კიბოსწინარე ცვლილებების მკურნალობაზე სასარგებლო ეფექტს ახდენს“.

თუმცა ფოლიუმის მჟავის დანამატი ამ ცვლილებებთან დაკავშირებული სიმპტომებისა და ჩივილების მოსახსნელად ეფექტური არ ჩანდა.

ავტორები ამბობენ, რომ ცალკეულ ანალიზში დაადასტურეს, რომ ფოლიუმის მჟავას გასტრინისა და პეპსინოგენის დონეებზე მოქმედებით კუჭის ლორწოვანში კარცინოგენეზის განვითარების შეფერხება შეუძლია.

საჭიროა მეტი კვლევა

ადრე სხვა კვლევებიც აფასებდა, უკავშირდებოდა თუ არა ფოლიუმის მჟავის დანამატი კუჭის კიბოს ნაკლებ რისკს, თუმცა შედეგები „შერეული და არადამაჯერებელი“ იყო.

მიუხედავად იმისა, რომ ფოლიუმის მჟავასა და კუჭის კიბოზე მეტაანალიზები ადრეც ჩატარდა, ეს კვლევა საყურადღებოა, რადგან აფასებს ფოლიუმის მჟავის ეფექტს კიბოსწინარე დაზიანებებზე, რომლებისთვისაც ამჟამად მედიკამენტური მკურნალობა არ არსებობს.

ამჟამად მკურნალობის გაიდლაინებში არ არის შესული რეკომენდაცია ფოლიუმის მჟავის დანამატის შესახებ კუჭის კიბოსწინარე ცვლილებებისა და კუჭის კიბოს მკურნალობის ან პრევენციისთვის. DNA-ის დაზიანებისგან შესაძლო დამცავი როლის გამო ფოლიუმის მჟავამ, როგორც ქემოპრევენციულმა, კიბოს პრევენციულმა აგენტმა, ინტერესი გამოიწვია, თუმცა რანდომიზებულმა კონტროლირებულმა კვლევებმა ეს სარგებელი ჯერ არ დაადასტურა.

კვლევის მცირე ზომისა და ჩინეთის მოსახლეობით შემოფარგვლის გათვალისწინებით, სადაც დასავლეთის ზოგად მოსახლეობასთან შედარებით კიბოსწინარე დაზიანებებისა და კუჭის კიბოს სიხშირე უფრო მაღალია, აგრეთვე შესაძლო გვერდითი მოვლენების გამო, ფოლიუმის მჟავის დანამატის გამოყენება მხოლოდ კუჭის კიბოსწინარე დაზიანებების პრევენციის მიზნით ამ ეტაპზე ვერ იქნება რეკომენდებული.

თუმცა ეს მეტაანალიზი ამ კავშირის უკეთ შესასწავლად უფრო დიდი რანდომიზებული კონტროლირებული კლინიკური კვლევების საჭიროებას ამყარებს.