4-cü mərhələ baş və boyun xərçənglərinin müalicəsi üçün Nivolumab adlı immunoterapiya dərmanı FDA təsdiqi aldı

Amerika Dərman İdarəsi (FDA) 10 noyabrda 4-cü mərhələ və ya təkrarlayan yastıhüceyrəli baş və boyun xərçənglərinin müalicəsi üçün immunoterapiya dərmanı olan Nivolumab-ın (Opdivo) istifadəsini təsdiqlədi. Baş və boyun xərçənglərinin (BBK) ən çox görülən hüceyrə növü yastı (skvamoz) hüceyrəli karsinomadır və bu xərçənglərin ən çox yerləşdiyi yerlər hava ilə təmasda olan anatomik nahiyələrdir (ağız içi, udlaq, qırtlaq kimi). Nivolumab təkrarlamış və ya yayılmış (metastatik = 4-cü mərhələ), platin əsaslı kimyaterapiya zamanı və ya sonra xəstəliyi pisləşən yastıhüceyrəli BBK üçün təsdiqlənmişdir.

Tədqiqat

CheckMate 141 adlı faza-3 klinik tədqiqat Nivolumab-a BBK müalicəsində istifadə təsdiqi gətirmişdir. Tədqiqata bu xərçəng qrupunun standart kimyaterapiyası olan platin əsaslı dərmanlardan sonra xəstəliyi təkrarlayan və ya 4-cü mərhələ xəstəliyi olan 361 skvamoz hüceyrəli baş-boyun xərçəngi xəstəsi qatılmışdır. Onların bir hissəsinə şiş irəliləyənədək/yayılanadək yeni nəsil xərçəng immunoterapiyası dərmanı Nivolumab (3 mg/kg dozada hər 2 həftədən bir) verilmiş, bir hissəsinə isə klinisistin seçimi əsasında standart kimyaterapiya dərmanlarından biri (Setuksimab, Metotreksat və ya Dosetaksel) tətbiq edilmişdir.

Standart kimyaterapiya alan xəstələrlə müqayisədə Nivolumab alanlarda daha müsbət nəticələr əldə edildiyi görülmüşdür. Tədqiqatın ən mühüm nəticəsi kimi median ümumi sağqalım Nivolumab tətbiq olunanlarda 7,5 ay, kimyaterapiya alanlarda isə 5,1 ay müəyyən edilmişdir.