Bir dəri xərçəngi hekayəsi: X-Men-in yaraları real həyatda asan sağalmır

Güclü, qorxmaz və girdiyi bütün döyüşlərdən aldığı yaraları sürətlə sağalan X-Men komiksinin Wolverine obrazını illərdir uğurla canlandıran Hollivud ulduzu Hugh Jackman bir vaxtlar evinin eyvanında eləcə oturan, içəri girməkdən qorxan uşaq idi. Bu, avstraliyalı aktyorun bəlkə də fərqində olmadığı ən faciəli tərəfi idi; cəsur rol oynamaqda olduqca yaxşı idi. Əslində güclü də idi, axı 5 dəfə xərçəngə qalib gəlmişdi. Təəssüf ki, hazırda 6. dəfə təkrarlayan dəri xərçəngi ilə mübarizə aparan Jackman çoxsaylı əməliyyatlar keçirmişdir.

Hollivudda olduğu qədər kənarda da hörmət və heyranlıq doğuran aktyorun xərçənginin təkrarlanması dostlarını və ətrafını da təbii olaraq çox kədərləndirmişdi.

Hugh Jackman anası onları tərk edəndə 8 yaşında idi; anası onu məktəbə yola salmış, lakin qayıdanda onu tapa bilməmişdi. Artıq atası və qardaşları ilə idi. “Evdə ilk dəfə tək qaldığım vaxtlar idi, çöldə eləcə gözləyirdim. Məyus olmuşdum və evimə təkbaşına girə bilmirdim.”

“Anam gedəndən bəri özünü gücsüz hiss edən qorxmuş uşaq idim. Qaranlıqdan qorxdum, hündürlükdən qorxdum və bunlar məni məhdudlaşdırdı. Bunlara nifrət etdim və əsəbi hala gəlməyimə səbəb oldular. Axı ən böyük nifrətlər qorxuya əsaslananlar deyilmi? Problemlər bir növ gücsüzlükdən yaranmışdı və bunu həqiqətən dərindən hiss etmişdim.”

Məşhur aktyorun hekayəsində illər belə keçərkən, həyata tutunmağa çalışan hər kəs kimi, həyatını yaxşılaşdıracaq vasitələr axtarmağa başlamışdı. Din onun üçün həmişə möhkəm dayaq nöqtəsi idi, mənəvi səyahətləri sağalma prosesində böyük rol oynayırdı. Onu həvəsləndirən və özünü gerçəkləşdirməsini təmin edən isə aktyorluq oldu. Səhnəyə çıxmaq ona ən yaxşı təsir edən şey idi. Bu o qədər təbii inkişaf etdi ki, Jackmanın bunu tam peşəyə çevirməsi uzun çəkmədi.

Wolverine obrazını canlandırdığı X-Men filmlərindən başqa, baş rollarda oynadığı Sehrli cütlük, Van Helsing, Prestij, Avstraliya, Polad yumruqlar, Səfillər və Əsir filmlərində superqəhrəmanları və tarixi şəxsiyyətləri oynayaraq dünya şöhrəti qazandı.

Daha sonra günəşin zərərli şüalarına qorunmadan məruz qalmaq nəticəsində yaranan və Avstraliyada olduqca geniş yayılmış melanoma olmayan dəri xərçənginə tutuldu. Əvvəllər 3 dəfə müalicə aldığı xəstəliyi 2013 ilində residiv verdi (təkrarlandı). Həyat yoldaşı Deborra-Lee Furnessin təkidi ilə burnundakı izi göstərmək üçün həkimə gedən Jackman bazal hüceyrəli karsinoma diaqnozu ilə müalicəyə alındı.

2015 ilində müsahibəsində bunları demişdi: “Xərçəng sözünü eşitmək həmişə sarsıdıcıdır. Mən heç vaxt günəş kremi istifadə etməmişdim, buna görə bu xəstəlik üçün böyük namizəd idim”

Hələ davam edən xərçəng müalicəsi barədə isə burnundakı sarğı ilə 2017 ilində Instagramda etdiyi paylaşımda: "Xahiş edirəm, mənim kimi axmaqlıq etməyin. Müntəzəm həkim müayinəsindən keçin və günəş kremi istifadə edin" dedi.

Nəhayət, anası ilə barışdı, anası onun həyatına qayıtdı. Mənə elə gəlir ki, belə çətinliklər olan dünyada bağışlamamaq və yaşananları unutmamaq üçün heç birimizin kifayət qədər vaxtı yoxdur.

Əlavə oxu

Dəri xərçənginin növləri hansılardır?

Dəri xərçəngləri bütün xərçəng növləri arasında ən geniş yayılanıdır; belə ki, bütün xərçəng hadisələrinin təxminən yarısını dəri xərçəngləri təşkil edir. Dəri xərçənglərinin çoxunun yayılma (metastaz) potensialı aşağıdır və çox vaxt erkən mərhələdə aşkar edilir. Mənşə aldıqları hüceyrələrə görə ümumən melanoma (dəriyə rəng verən melanosit adlı hüceyrələrdən yaranan) və qeyri-melanoma (melanoma olmayan) olmaqla ikiyə bölünür və dəri xərçənglərinin təxminən %98-i melanoma olmayan növdür. Melanoma olmayan dəri xərçənglərinin isə, bazal hüceyrəli xərçəng və yastı hüceyrəli xərçəng olmaqla geniş rast gəlinən 2 əsas növü vardır.

Bazal hüceyrəli karsinoma çox vaxt yastı, sərt, yerləşdiyi nahiyə solğun rəngli və ya kiçik zədədə belə asan qanaya bilən kiçik, qabarıq, çəhrayı və ya qırmızı, şəffaf, parlaq, mirvari ölçülü şişkinlikləri olan xərçəngdir. Ortası çökük və sahəsi mavi, qəhvəyi və ya qara rəngdədir. Böyük bazal hüceyrəli karsinomalar qabıqlı və ya yayılan sahəyə malikdir. Bazal hüceyrəli karsinoma çox nadir metastaz verir, yerləşdiyi nahiyədə təkrarlanmağa meyllidir.

Əlaqəli mövzular:

- İstidən qorunma yolları

- Günəş kremi barədə yanlış bilinənlər və doğruları

- Məşhurlar və onların xərçəngləri

- Ən çox rast gəlinən xərçəng növü olan dəri xərçənginin müalicəsində yeni dərman, yeni ümid: Sonidegib (Odomzo)