FDA (Amerika Qida və Dərman İdarəsi) irəliləmiş mərhələli süd vəzi xərçəngli menopauzadan sonrakı qadın xəstələrdə Palbociclib istifadəsini təsdiq etdi

2 fevral 2015-ci ildə FDA irəliləmiş mərhələli (metastatik) süd vəzi xərçənginin müalicəsi üçün palbociclib adlı təsiredici maddəni (bazar adı Ibrance) təsdiq etdi. Palbociclib siklindən asılı kinaza fermentini inhibə edərək təsir göstərir; bu fermentin xərçəng hüceyrələrinin böyüməsinə təsir etdiyi məlumdur. Palbociclib adlı dərmanın menopauzadan sonrakı (postmenopauzal), metastatik süd vəzi xərçəngli qadınlarda estrogen reseptoru müsbət (ER-müsbət), insan epidermal böyümə amili 2 mənfi (HER2-mənfi) olduqda və əvvəllər hormonal müalicə almayıblarsa istifadəsi uyğun görülmüşdür. Yenə postmenopauzal süd vəzi xərçəngi olan bir qrup xəstənin müalicəsində istifadə olunan letrozolla birlikdə istifadəsi nəzərdə tutulmuşdur.

İstehsalçı şirkət ilkin klinik sübutlarla bu dərmanın hazırkı müalicələrdən üstünlüyünü göstərdikdən sonra FDA təsdiq vermişdir.

Mövcud məlumatlar əsasında FDA palbociclibi sürətləndirilmiş təsdiq proqramına daxil etmiş və klinik tədqiqatlarda xəstələrin erkən çıxışına razılıq vermişdir.

Dərmanın effektivliyi metastatik süd vəzi xərçəngi olan, ER-müsbət, HER2-mənfi və əvvəllər metastatik xəstəlik üçün müalicə almamış 165 postmenopauzal xəstədə göstərilmişdir. Klinik tədqiqat üçün xəstələr yalnız letrozol alanlar və letrozolla birlikdə palbociclib alanlar olmaqla 2 qrupa ayrılıb müqayisə edilmişdir. Palbociclib alanların orta proqressiyasız sağqalma müddəti (xəstəlikdə pisləşmə olmadan keçirilən müddət) 20,2 ay, yalnız letrozol alanlarda isə 10,2 ay tapılmışdır. Lakin ümumi sağqalma haqqında məlumat hazırda mövcud deyil.

Dərmanın ən çox görülən yan təsirləri ağ qan göstəricilərinin azalması (leykopeniya, neytropeniya), halsızlıq, qanazlığı (anemiya), yuxarı tənəffüs yolu infeksiyası, ürəkbulanma, ağızda yara, saç tökülməsi, ishal, trombositopeniya (qan lövhəciklərinin azalması), yuxululuq, periferik neyropatiya və burun qanaxması kimi bildirilmişdir. Digər bütün dərmanlarda olduğu kimi səhiyyə mütəxəssisləri mümkün yan təsirləri və yan təsir yaşandıqda nə edilməli olduğunu xəstələri ilə danışmalıdır.

Nəticə olaraq palbociclib postmenopauzal metastatik süd vəzi xərçəngli qadın xəstələrdə ömür müddətinin uzadılması baxımından ciddi ümid vəd edir. Bu müalicənin təsiri barədə daha aydın nəticələr əldə etmək üçün araşdırmalar davam etdirilir. Yenə də əldə edilən belə diqqətçəkən məlumatlar bu dərmanın gələcəkdə süd vəzi xərçəngi xəstələrinin standart müalicəsinin güclü hissəsi olacağını göstərir.