Gənc yaşda xərçəng müalicəsi alanlar yaşıdlarından daha sosialdır

Yeniyetməlik və gənc yetkinlik dövründə xərçəng müalicəsi almış şəxslərin adətən xərçəngi olmayan yaşıdlarından daha güclü sosial münasibətləri olduğu müəyyən edildi. Xərçəng müalicəsi almış şəxslərin sağlam sosial münasibətlərini yaşıdları ilə müqayisə edən ilk tədqiqatın məlumatlarını sizinlə paylaşmaq istəyirik.

Bu tədqiqat xərçəng müalicəsindən sonrakı sosial bağları qiymətləndirmək üçün hazırlanmış və təsdiqlənmiş üsul təqdim edir.

Tədqiqatçılar funksional sosial şəbəkə indeksi adlandırdıqları üsulun xərçəng müalicəsi alanlarda sosial münasibətləri ölçmək üçün əvvəllər istifadə olunmuş iki ənənəvi üsuldan fərqli olaraq həyatın çətinliklərinin öhdəsindən gəlmək bacarıqlarını daha yaxşı ölçdüyünü ortaya qoydular.

Bu üsul ailə vəziyyəti və ya bir icmaya üzvlük kimi sosial bağ quruluşlarını ölçmək əvəzinə sosial şəbəkələri, dostlar və qohumlar kimi emosional dəstək mənbələrini, həmçinin çəkiyə nəzarət və fiziki fəallıqla bağlı yanaşmaları da ölçür.

Araşdırmada həmçinin xərçəng müalicəsi almış yeniyetmə və gənc yetkinlərin xərçəng diaqnozu almamış yaşıdları ilə müqayisədə hərəkətsiz həyata və piylənməyə daha meylli olduqları tapıldı.

Tədqiqatda 18 ilə 30 yaş arasındakı yeniyetmə və gənc yetkin 102 xərçəng xəstəsinin və xərçəng anamnezi olmayan 102 gənc yetkin qrupunun sosial münasibətləri araşdırıldı. İştirakçılar təxminən 25 dost və qohumla ətraflı sosial münasibətləri barədə məlumatlarını onlayn sorğuda bildirdilər. Xərçəng yaşamış şəxslər diaqnoz zamanı 15 ilə 30 yaş arasında idi. Əksəriyyətində müalicədən ən azı beş il keçmişdi. Xərçəng yaşamamış şəxslərlə müqayisədə diaqnoz qoyulmuş şəxslərin dostları, həkimləri və qohumları ilə daha güclü sosial bağlar qura bildiyi görüldü.

Lakin bu vəziyyət diaqnoza görə də fərqlənirdi. Limfoma müalicəsi almış şəxslər sosial münasibət qurmaqda ilk sırada olduğu halda, leykoz və solid (orqan) şişlər dərhal sonra gəlir. Beyin və mərkəzi sinir sistemi xərçəngi müalicəsi almış şəxslər də xərçəngi olmayan yaşıdlarından daha sıx sosial bağlar qura bilirlər.

• Qan xərçənginin əlamətləri hansılardır?

Güclü sosial şəbəkələr həyatda daha çox dəstək görmək, daha konstruktiv münasibətə malik olmaq, gələcəyə planlar qurmaq və emosional olaraq daha müsbət hiss etməklə əlaqələndirildi. Bu, sıxıntı və tənhalıq kimi problemlərin aradan qaldırılmasının əhəmiyyətini vurğulayır.

Bu arada tədqiqatçılar sosial əlaqələr və onları gücləndirən alternativlər tapmağa, sağlamlıq nəticələrinə təsirini daha yaxşı anlamağa çalışırlar. Dostlar və qohumlarla sosial əlaqələrin çatışmazlığının həyat keyfiyyətinin azalması, riskli sağlamlıq davranışları, xroniki sağlamlıq vəziyyətləri və erkən ölümlə əlaqəli ola biləcəyini düşünürlər. Sosial bağlar və sağlamlıq nəticələri arasındakı əlaqə həll edildikdən sonra xərçəng müalicəsindən sonrakı sağlamlığı yaxşılaşdırmaq üçün sosial şəbəkələrdən istifadəyə yönəlmiş müdaxilələrin hazırlanması planlaşdırılır.

Marağınızı çəkə bilər:

• Blue Zonesun kəşfindən sonra sosial inteqrasiyanın əhəmiyyətini təsdiqləyən araşdırma da nəşr olundu. Buna görə güclü sosial inteqrasiya ömür müddətinə ən müsbət təsir edən amildir