Hansı yaşda olursa-olsun, siqareti tərgitmək yaşam müddətinə müsbət töhfə verir

Tütün istifadəsinin xərçəng və erkən ölümün mühüm səbəbi olduğu hamımıza məlumdur. Siqaret və erkən ölüm əlaqəsi orta yaşlı əhali üzrə çoxsaylı araşdırmaların mövzusu olsa da, daha az tədqiqat siqaretin yaşlılarda xəstəlik və ölüm riskinə təsirini araşdırır.

Noyabr 2016-cı ildə American Journal of Preventive Medicine-də dərc olunan yeni araşdırmaya görə 70 yaş və yuxarı siqaret çəkənlərin heç çəkməyənlərlə müqayisədə ölüm riskinin üç dəfə çox olduğu, bununla yanaşı siqaret nə qədər erkən tərgidilərsə ölüm riskinin o qədər azaldığı müəyyən edilib.

ABŞ-da 2012 məlumatlarına görə əhalinin % 9,3-nü təşkil edən 70 yaş və yuxarı şəxslərin (29,2 milyon) 2050-ci ildə % 15,9-a, yəni 63,6 milyon nəfərə çatması gözlənilir. Cəmiyyətdə yüksək siqaret istifadəsi səbəbindən 70 yaş və yuxarı böyüklərin erkən yaşda siqareti tərgitməsinin faydaları araşdırılmağa çalışılıb.

Tədqiqatçılar araşdırmada 70 yaş və yuxarı 160.00-dən çox şəxsin məlumatını nəzərdən keçiriblər. 2004-2005-ci illərdə siqaret istifadəsini ətraflı təsvir edən sorğu doldurulub və bildirilən ölüm halları 2011-ci ilədək izlənib. 70 yaş və yuxarı şəxslər üçün 2014-2016-cı illərdə aparılan analizlərə görə siqaretə başlama və tərgitmə yaşının, istifadə miqdarının ölüm nisbəti ilə əlaqəli olduğu müşahidə edilib.

2004-2005 sorğusunda şəxslərdən 9 illik dövrlər üzrə gündəlik nə qədər siqaret çəkdikləri öyrənilib. 70-li yaşlardakı siqaret çəkənlərin cari istifadəçi adlandırıldığı tədqiqatda keçmiş istifadəçilər 10 illik təsnifatlarla qruplaşdırılıb. Həmçinin məlumatlar yaş, cinsiyyət, təhsil və alkoqol istifadəsinə görə təsnif edilib.

Araşdırmanın əvvəlində, yəni 2004-2005-ci illərdə iştirakçıların orta yaşı 75 olub, təxminən %56-sı keçmiş, %6-sı aktiv siqaret istifadəçisi idi. Orta hesabla 6.4 illik izləmədə iştirakçıların təxminən % 16-sı ölüb. Heç siqaret çəkməyənlərin % 12,1-i, 30-39, 40-49, 50-59 və 60-69 yaşlarında siqaret çəkən keçmiş istifadəçilərin isə müvafiq olaraq %16.2-si, %19.7-si, %23.9-u və %27.9-u ölüb. Aktiv siqaret çəkənlərin isə % 33.1-i həyatını itirib. Qadınlarda ölüm nisbəti bütün siqaret çəkmə səviyyələrində kişilərdən aşağı olub.

Nəticə olaraq bu məlumatlara əsasən siqareti tərgitmə prosesinin xüsusilə 70 yaş və yuxarı böyüklərdə ölüm riskini azaltmaqda mühüm yer tutduğunu deyə bilərik. Tədqiqatın tapıntıları siqareti tərgitmək üçün hər yaşın vacib olduğunu göstərdiyindən bütün siqaret istifadəçilərinin bunu nəzərə almalı olduğunu bildirməliyik.