Hər 10 səhiyyə işçisindən 4-ü xəstə ikən işləyir

Həkimlər xəstələrə istirahət üçün arayış verib evdə dincəlməyi məsləhət görərkən özləri bunu edə bilirmi? Amerika İnfeksiyaya Nəzarət Jurnalında 1 noyabr 2017-ci ildə dərc edilmiş tədqiqata görə 2014 – 2015 mövsümündə hər 10 səhiyyə işçisindən 4-ü qrip və oxşar xəstəliklə işləməyə davam etmişdir.

Tədqiqatda 2014 – 2015 mövsümi qrip dövründə 1914 səhiyyə işçisi onlayn sorğu doldurdu. Qrip və oxşar xəstəlik üçün qızdırma, öskürək, boğaz ağrısı və iş rejimi soruşuldu.

Əvvəlki tədqiqat göstərmişdir ki, xəstə səhiyyə işçisi ilə təmasda olan pasiyentlərdə tibbi xidmətlə əlaqəli infeksiya riski 5 dəfə yüksəkdir.

Qeyd: Qrip influenza viruslarının səbəb olduğu viral infeksiyadır. İnfluenza kimi də tanınan qrip soyuqdəymə və zökəmdən fərqli, daha ağır xəstəlikdir. Aşağıdakı cədvəldə fərqləri görə bilərsiniz.

Tədqiqatın nəticələrinə görə;

• 1914 iştirakçıdan 414-ü (% 21) qrip və ya oxşar xəstəlik keçirdiyini, onlardan 183-ü (% 41) xəstə ikən işlədiyini bildirdi. Bu 414 nəfərin %57-si həkimə getmiş, müayinə olunanların %25-i qrip diaqnozu almışdır.
• İş rejimləri də təhlil edildi. Xəstəxanada işləyənlər ambulator klinika işçilərindən xəstə halda işləməyə daha meylli idi.
• Hansı işçilərin daha çox belə işlədiyinə baxanda həkimlərin (% 63) və əczaçıların (% 67) öndə olduğu görüldü.
• Yaş, iş stajı və iş xüsusiyyətləri xəstə halda işləmə ehtimalına təsir etmədi.

İştirakçılar xəstə halda niyə işləməli olduqlarına dair bunlardan ən azı birini dedi:

• “Hələ işimi yerinə yetirə bilirdim.”
• “İşə getməyəcək qədər pis hiss etmirdim.”
• “Yoluxucu olduğumu və ya başqalarını xəstələndirə biləcəyimi düşünməmişdim.”
• “Həmkarlarıma qarşı peşə məsuliyyətim vardı.”
• “Yerimə adam tapmaq çətin idi.”

Xəstə ikən işləməməyin maliyyə itkisi barədə narahatlıq da amil idi.

Nəticə

Səhiyyə işçiləri bəlkə infeksiya yayma riskinin böyük mənzərəsini gözdən qaçırır. İşəgötürənlər də iş yerində infeksiyaya nəzarətin əhəmiyyətini nəzərdən keçirməlidir. Maliyyə itkisi olmayacağına təminat xəstəlik dövrünün daha rahat keçməsinə kömək edə bilər.