Osteopatik tibb 1892 – Manipulyativ müalicə

Osteopatiya sağlamlıq problemlərinin qarşısının alınmasında və müalicəsində dayaq-hərəkət sisteminin rolunu vurğulayan bir səhiyyə sahəsidir. 

Vətəndaş müharibəsindən sonra ordu cərrahı Andrew Taylor Still uşaqlarının çoxunu yoluxucu xəstəliklərdən itirmişdi. Bunun ardınca 1892-ci ildə Missouri-nin Kirksville şəhərində ilk osteopatiya məktəbini qurdu. 

Still-in fəlsəfəsinə görə, xəstəliklərin əksəriyyəti sinirlərin və qan axınının tutulmasından qaynaqlanırdı. “Tarazlığı pozulmuş, yerindən çıxmış sümüklərin, sinirlərin və əzələlərin manipulyasiyası - yəni bütün maneələrin aradan qaldırılması - ilə insanın həyat mexanizmi hərəkətə gətirilə və insan sağlamlığına qovuşa bilərdi." 

Still öz avtobioqrafiyasında uşağı silkələməklə skarlatinanı və ya difteriyanı dayandıra biləcəyini irəli sürüb. Həmçinin insanın boynunu buraraq üç günə öskürək tutmasını müalicə edə biləcəyini də iddia edib. Bu kimi iddialar bugünkü standartlara görə şişirdilmiş görünsə də, üsulları ilə digər həkimlərə nisbətən daha çox xəstənin sağ qalmasını təmin etdiyi üçün ənənəvi tibbin uğuru ilə müqayisədə daha uğurlu sayıla bilərdi. O dövrün cərrahiyyəsi və dərmanları əsasən zərərli idi; buna görə də bir çox insan arsen və civə kimi maddələri toksik miqdarlarda ehtiva edən geniş yayılmış üsulların effektivliyini şübhə altına alırdı.

Bu gün Amerika Birləşmiş Ştatlarında, Amerikada təhsil almış D.O. (Osteopatik Tibb Doktoru) ənənəvi tibb həkiminə bənzər şəkildə təhsil alır. Əsas etibarilə tibb həkiminin (MD) hüquqi ekvivalentidir. Lakin Avropa və Millətlər Birliyi osteopatları həkim kimi qəbul etmir.

ABŞ-dakı müasir osteopat ənənəvi tibbi yanaşmalar və dərmanlardan istifadə ilə yanaşı, pəhriz, bədən duruşu və terapevtik müalicələri də praktikasında tətbiq edir. Lakin bu gün kəllə osteopatiyasının ağrını yüngülləşdirmək və ya digər xəstəlikləri müalicə etmək barədə şişirdilmiş iddiaları ətrafında ciddi mübahisələr gedir. Kəllə osteopatiyası kəllə sümüklərinin manipulyasiyasını əhatə edir və çox az osteopat tərəfindən istifadə olunur.

Məqalədə adı çəkilən tarixi şəxslər: Andrew Taylor Still (1828–1917)

• Əvvəlki mövzu: Virusların kəşfi 1892 – Canlı mikroblar
• Növbəti mövzu: Adrenalinin kəşfi 1893 – Orqanizmin funksiyalarında əhəmiyyəti