Osteoporoz dərmanı Denosumab aromataza inhibitoru alan süd vəzi xərçəngi xəstələrində irəliləmə və təkrarlanma riskini azaldır

Dekabr 2015-də San Antonio Süd Vəzi Xərçəngi Simpoziumunda təqdim edilən diqqətçəkən tədqiqata görə, menopauzadan sonrakı erkən mərhələli süd vəzi xərçəngi olan qadınlarda aromataza inhibitorları ilə istifadə edilən Denosumab sınıq riskini ciddi azaltmaqla yanaşı xərçəngin təkrarlanma riskini də azaltmışdır.

Hormonal müalicələr əsasən hormona həssas (ER və PR pozitivliyi ilə ifadə edilir) süd vəzi xərçəngində cərrahiyyə, kimyaterapiya və ya radioterapiya ilə ilkin müalicədən sonra təkrarlanma (residiv) riskini azaltmaq üçün istifadə edilir. Əlavə olaraq yüksək riskli qadınlarda və bəzi irəliləmiş süd vəzi xərçəngi xəstələrində də tətbiq edilə bilər. Menopauzadan sonra seçilən hormonal agentlər aromataza inhibitoru (Anastrozol, Exemestan kimi) adlanan, bədəndə estrogen istehsalını azaldan dərmanlardır. Lakin osteoporoza (sümük əriməsi) səbəb olması və sınıq riskini artırması ən mühüm yan təsirdir.

Denosumab sümük parçalanmasında iştirak edən hüceyrələrin yetişməsinə mane olaraq sümük itkisini yavaşıdan dərmandır. Amerika Qida və Dərman İdarəsi (FDA) aromataza inhibitoru alan süd vəzi xərçəngi qadınlarında istifadəsini təsdiqləmişdir. Yəni sümük yan təsirlərini azaltmaqda faydası göstərilmişdir. Lakin keçən ay dərc edilmiş tədqiqat bu xəstələrdə təsirinin bununla məhdud olmadığını, həm də təkrarlanma və irəliləmə riskini azaltdığını göstərmişdir.

Tədqiqatda aromataza inhibitoru alan, menopauzadan sonrakı erkən mərhələli süd vəzi xərçəngi olan təxminən 3,500 qadın 2 qrupa ayrılmışdır. Birinə 6 aydan bir Denosumab verilmiş, digərinə verilməyərək orta 4 il izlənmişdir. Nəticədə Denosumabın aromataza inhibitorunun yaratdığı sınıq riskini təxminən %50, xərçəngin təkrarlanma riskini isə %18 azaltdığı görülmüşdür.

Nəticə olaraq Denosumab aromataza inhibitoru alan süd vəzi xərçəngi qadınlarında sümük yan təsirlərinin qarşısının alınması və müalicəsində çox dəyərli dərmandır. Bu tədqiqat onun yalnız osteoporoz inkişaf edənlərdə deyil, aromataza inhibitoru verilən menopauzadan sonrakı hər qadında nəzərdən keçirilməli olduğunu yenidən göstərmişdir.