Sağlam qocalmağın və uzun həyatın təəccüblü sirri!

Sizin də bildiyiniz və bizim də hər fürsətdə xatırlatdığımız kimi sağlam həyat üçün aktiv olmaq və sağlam qidalanmaq onsuz da vacibdir. Lakin başqa bir şey də var: nikbinlik, müsbət münasibət!

Yaşlanmaq təbii olaraq bəzi dəyişikliklər gətirir. Fiziki baxımdan gənc yaşlardakı kimi sağlam qalmaq çox mümkün deyil. Həmçinin insanların düşüncəsində yaşlanmaqla bağlı, məsələn, varlıq baxımından daha az faydalı olmaq kimi bəzi qəlibləşmiş fikirlər vardır. Bəs niyə daha sağlam və məhsuldar şəkildə uzun yaşamayaq?! Artıq bu fikri elm də dəstəkləyir.

Yaşlanmaqla bağlı nikbin fikirlər və müsbət münasibət içində olmağın yaşam müddətini 7.5 ilə qədər uzada biləcəyi tapıldı.

İnsanların cinsindən, sərvətindən və ümumi sağlamlığından asılı olmayaraq nikbinliyin yaşam müddətinə belə töhfə verdiyi müəyyən edildi. Amerikanın Ohio ştatından ümumilikdə 660 qadın və kişi bu tədqiqata qatıldı və bu şəxslər 20 il izləndi.

Qan təzyiqi və xolesterol səviyyəsinin normal olması kimi amillərin yaşam müddətini təxminən 4 il uzatdığı düşünüldükdə nikbinliyin olduqca təsirli olduğu daha yaxşı görünür.

Yale Universitetinin bu tədqiqatına görə müsbət münasibət demək olar siqaret çəkməmək, aşağı xolesterol və ya ideal çəkidə olmaq qədər ömrü uzada, hətta daha təsirli ola bilər. Əvvəlki tədqiqatlarda da müsbət düşüncə və münasibətin yaddaş, stress və hətta riyazi məsələlərin həllində daha yaxşı nəticələr verdiyi tapılmışdı.

Stəkanın dolu tərəfini görməyin gücü

Əvvəl sağlamlığın, yoxsa nikbinliyin gəldiyini demək çətindir. Ehtimal ki, hər ikisi bir-birini dəstəkləyir. Bu, əslində bir-birinə təsir edən bütöv dövr kimidir, çünki fiziki məşq etsəniz və sağlam qidalansanız, özünüzü yaxşı hiss edərsiniz.

Nikbinlik uzun həyatla əlaqəlidir

800-dən çox insanın qatıldığı tədqiqatda iştirakçıların nikbin, bədbin və ya arada olduğunu müəyyən etmək üçün test aparıldı və 30 il sonra onların arasında kimin daha uzun yaşadığı yoxlanıldı. Bu diqqətçəkən tədqiqatın nəticəsində, nikbin (optimist) şəxslərin bədbin (pessimist) şəxslərə nisbətən %19 daha çox yaşamaq şansı olduğu tapıldı.

Xəstəlik riski daha aşağıdır

Nikbinliyin gücü əslində xəstələnmə riskini də azalda bilər. Məsələn, nikbinsinizsə, bu, hətta ürək döyüntülərinizə təsir edir. Qan təzyiqiniz üçün yaxşıdır və bu, ürək sağlamlığı üçün çox vacibdir.

Ümumilikdə 2.500-dən çox 65 yaş və yuxarı qadın və kişinin müsbət və ya mənfi münasibətlərini araşdıran tədqiqat aparıldı. Eyni zamanda alkoqol, siqaret və dərman istifadələri də araşdırıldı. Nəticələrə görə nikbinlərin daha mənfi münasibətdə olanlara nisbətən daha aşağı qan təzyiqinə malik olduğu ortaya çıxdı.

Yaddaş

Nikbin olmaq düşüncəyə və yaddaşa da müsbət təsir edir. Daha ümidli və gələcəyə müsbət baxan şəxslərin unutqanlığının daha az olduğu düşünülür. Bu yaxınlarda Avropada aparılan tədqiqatda 65 və yuxarı yaşlı 4.500-dən çox yetkin arasında nikbinlərin problemləri daha yaxşı həll etdiyi və daha sağlam qərarlar verdiyi tapıldı.

Xoşbəxt olmağı öyrənmək

Anadangəlmə bədbin / ümidsiz olduğunuzu düşünsəniz belə, nikbin / müsbət olmaq öyrənilə bilər. Sadəcə əksər şeylər kimi bir qədər məşq tələb edir.

Nikbin olmaq üçün edə biləcəkləriniz:

• Özünüzə nəzarət edin. Mənfi düşüncələr ağlınızdan keçməyə başlasa, dayandırın və sizin üçün daha yaxşı yol ola biləcəyini düşünün.
• Yumor və gülüş axtarın.
• Sevdiyiniz, zövq aldığınız işləri edin.
• Müsbət insanlarla vaxt keçirməyə çalışın.