Şəkilli xərçəng gündəliyi necə hazırlanır?

Xərçəng gündəliyi müalicə prosesinizi və duyğularınızı ifadə edərək özünüzü yaxşı hiss etməyin ən gözəl yollarından biridir.

Xərçəng diaqnozu aldığınızda bu müalicə müddətindəki yolçuluq həyatın xüsusi bir hissəsinə çevrilir. Xəstəliyin ən çətin vaxtlarında albom xarakterli bu gündəlik özünüzü və bu prosesi anlatmağın çox rahatlaşdırıcı, terapevtik təsirli və yaradıcı yoludur. Xərçəng diaqnozu aldığınız ilk gündən etibarən yaşadığınız bu prosesin mühüm mərhələlərini sadə vizual dillə təmsil edir. Sizə məxsus bu xərçəng müalicəsi gündəliyi ilk gündən necə irəlilədiyinizi görə biləcəyiniz, özünəməxsus hekayəsi olan, daşına bilən şəxsi cib sərgisi yaradır.

Başlamaq üçün fikirlər

Xəstəxanaya qəbul səhifəsi

Diaqnoz aldığınız andakı duyğu və hisslərinizi yazaraq və ya çəkərək qeyd edin. Qalma səbəbinizi və xəstəxana qolbaqlarınızı ehtiva edən bir səhifə olsun. Əməliyyat və ya lazımi analizlərin aparılması planlaşdırılıbsa, bunları da qeyd edin.

Yeni görünüşə hazırlıq səhifəsi

Bu səhifə xərçəng albomunuzda hazırlanması ən əyləncəli səhifə ola bilər! Parik, bandana və ya yaylıq almağa çıxanda bəyəndiklərinizlə çoxlu şəkil çəkdirin. Adətən üslubunuza heç uyğun olmayan müxtəlif parik və ya bandana üslublarını da sınayıb şəkil çəkdirin. Bu fotoları çap edin və qayçı ilə yapışqanın köməyi ilə kollaj hazırlayın.

Əvvəl və sonra

Kimyaterapiyaya başlamısınızsa və saçlarınızı itirirsinizsə, əvvəlki və sonrakı görünüşünüzün şəkillərini əlavə edə və ya bu yeni görünüşünüzlə güzgü qarşısında öz portretinizi sadə və uşaqsayağı dillə çəkərək özünüzü ifadə edə bilərsiniz. Bu, xoşunuza gəlməyən vəziyyət olsa da, hisslərinizi xərçəng albomunuza əks etdirmək sizi bir qədər rahatlada bilər.

Tamamilə töküldükdə və ya qırxmağa qərar verdikdə bir tutamını yapışqanla birləşdirib yeni səhifəyə əlavə edə bilərsiniz. Həmçinin istəsəniz, saçınızı qırxdırarkən çəkdirdiyiniz şəkli də bu səhifəyə yapışdıra bilərsiniz.

Sevdiklərinizə səhifələr

Xərçəng xəstəsi olaraq "Mənə ehtiyacın olsa, buradayam" sözünü sizi sevən insanlardan tez-tez eşidirsiniz. Lakin həqiqətən ehtiyacınız olanda bunu deyə biləcəyiniz yalnız bir ovuc insan vardır. Ən çox ehtiyac duyduğunuz anlarda sizə kömək edən bu gözəl və xüsusi insanlar üçün bir neçə səhifə ayırmaq gələcəkdə xatırlayacağınız bu mühüm paylaşımların xatirələrini yaradır. Bunun üçün foto, rəsm, yazı, şeir və hətta bir mesaj da bu səhifələrdə yer ala bilər.

Əməliyyat izləri səhifəsi

Bu səhifədə bir və ya birdən çox əməliyyat keçirmisinizsə, yara izlərini simvolik şəkildə göstərə bilərsiniz. Burada əsas məsələ müalicə prosesinin ən çətin vaxtlarındakı duyğularınızın daxilinizdən çıxıb bir yerə axmasıdır. Məsələn, süd vəzi xərçəngi əməliyyatını və ardından aparılan rekonstruksiya əməliyyatını təsvir edə bilərsiniz. Yaxud bu izləri səhifəyə çəkib üzərində xəyal etdiyiniz naxışları çəkərək dəyişdirə bilərsiniz.

Xəstəxana dostları səhifəsi

Yəqin ki, xəstəxanada birlikdə müalicə aldığınız zaman qurduğunuz ünsiyyət və zamanla paylaşdıqlarınız çox xüsusi olacaq. Bu xatirələri yada salmaq və xüsusi dostluqlarınızı dəyərləndirmək üçün gülməli və ya canınızı ağrıdan hər cür hekayə və fotonu bu səhifəyə əks etdirin.

Kimyaterapiya vaxtını xatırlama səhifəsi

Bu səhifədə kimyaterapiya infuziyası zamanı baş verən maraqlı, gülməli, kədərli, ciddi və ya müxtəlif hadisələri tarixləri ilə qeyd edin. Otağınızın, tibb bacınızın fotolarını və müalicənizlə bağlı artıq lazım olmayan sənədləri kollaj edərək bu səhifədə toplayın. Eyni şəkildə radioterapiya üçün də qeydlər apara bilərsiniz. O günlərdə necə hiss etdiyiniz, zehni və ya fiziki olaraq necə təsirləndiyiniz barədə qısa qeydlər yazıb bu gündəliyə əlavə edin.

Ürəyinizi boşaltma səhifəsi

Bu səhifədə ağlınıza gələn bütün ifadə üsullarından istifadə edə bilərsiniz. Müxtəlif materiallarla ifadəni gücləndirə bilərsiniz. Ən sadə, amma faydalı nümunə: istədiyiniz rəngli qələmlərlə və ya boyalarla təsadüfi qaralamalar edin. Burada vacib olan nə qədər estetik görünüş yaradacağınız deyil, daxilinizdəki qarışıq duyğuları üzə çıxarmaqdır. Balaca dəcəl uşaq kimi sadəcə qaralamaq sizi rahatlada bilər. Unutmayın ki, istəsəniz bu dəftəri heç kimə göstərməyə bilərsiniz. Paylaşmaq istəmirsinizsə, yaxınlarınıza dəftərin sizə məxsus olduğunu bildirin.

Həkimlərinizə bir səhifə

Həkimlərinizə qarşı nə hiss etdiyinizi, müalicə prosesindəki xatirələrinizi, danışa bilmədiklərinizi, sıxıntılarınızı və ya özünüzü xoşbəxt hiss etdiyiniz bütün anları ehtiva edən bir səhifə yarada bilərsiniz. Həkimləriniz sizin üçün ən doğru müalicələri tətbiq etməyə çalışarkən davranışları xoşunuza gəlsə də, gəlməsə də, bunu ən açıq və rahat ifadə edə biləcəyiniz xüsusi səhifəniz olsun.

Daşına bilən cib sərginizi tamamladınız!

Aparılan tədqiqatlar bizə yaradıcı bədii fəaliyyətlərin xərçəng müalicəsi prosesində xəstələrin müsbət əhvalına töhfə verdiyini, koqnitiv funksiyalarını inkişaf etdirdiyini və stressi azaltdığını göstərir. Biz də daha rahat keçirəcəyiniz və duyğularınızı ifadə edə bildiyiniz müalicə prosesi üçün xatirələrinizi toplamağı tövsiyə edirik.