Tatu mürəkkəbi limfa düyünlərinə yayılaraq görüntüləmə üsullarında xərçəng metastazı kimi görünə bilərmi?

Ötən günlərdə ‘Obstetrics and Gynecology’ jurnalında tatu mürəkkəbinin limfa düyünlərinə yayılaraq PET/BT görüntüləməsində xərçəng metastazı kimi görünməsi nəticəsində lazımsız yerə limfa düyünləri çıxarılan klinik hal təqdim edilmişdir.

PET/BT (kompüter tomoqrafiyası ilə birləşdirilmiş pozitron emissiya tomoqrafiyası) xərçəng şübhəsi olan lezyonların müəyyən edilməsi, xərçəng diaqnozundan sonra yayılmasının aşkarlanması və müalicəyə cavabın müəyyən edilməsi üçün tez-tez istifadə olunan görüntüləmə üsuludur. PET/BT texnologiyası xərçəng diaqnozu qoyulan xəstədə ilk mərhələdə xəstəliyin yayılmasını qiymətləndirmək üçün bir çox xərçəng növündə uğurla istifadə olunur. Bu üsulda şəkər törəməsi qlükozanın radioaktiv maddə ilə işarələnmiş molekulu (18F-FDG) xəstəyə venadaxili verilir və bu molekullar yüksək aktivlik göstərən hüceyrələr (xüsusilə xərçəng hüceyrələri) tərəfindən tutulub görüntü verir. Lakin ötən günlərdə təqdim olunan klinik halda tatu mürəkkəbi oxşar görüntüyə səbəb olaraq yanılma yaratmışdır.

Şişin yayılması uşaqlıq boynu (serviks) xərçəngində uyğun müalicə seçimində ən əsas amildir. Belə ki, çox erkən mərhələli uşaqlıq boynu xərçəngində cərrahiyyəyə üstünlük verildiyi halda, şiş yerli olaraq və/və ya limfa düyünlərinə yayılıbsa, cərrahiyyə əvəzinə radioterapiya və kimyaterapiya birlikdə tətbiq olunur. Buna görə şişin yayılmasının düzgün müəyyən edilməsi bu xəstələr üçün həyati əhəmiyyət daşıyır.

Tədqiqatda ayaqlarında geniş yayılmış 14 ayrı tatu olan 32 yaşlı uşaqlıq boynu xərçəngi xəstəsi təqdim edilmişdir. Şişi uşaqlıq boynu ilə məhdud xəstəyə əməliyyat planlaşdırılmış və əməliyyatdan əvvəl şişin yayılmasını qiymətləndirmək üçün çəkilən bütün bədən PET/BT-də xərçəngin sağ və sol qasıq limfa düyünlərinə (qarın daxilində uşaqlıq və yumurtalıq ətrafında yerləşən limfa düyünləri) yayıldığı görülmüşdür. Bundan sonra aparılan əməliyyatda xəstənin uşaqlığı və boruları (yumurtalıq boruları) ilə yanaşı bölgədəki 40 limfa düyünü də çıxarılmışdır. Lakin çıxarılan limfa düyünləri laboratoriyada araşdırıldıqda xərçəng əlamətləri əvəzinə tatu mürəkkəbinə rast gəlinməsi ilə PET/BT-dəki görüntünün tatu mürəkkəbindən qaynaqlandığı anlaşılmışdır.

Nəticə etibarilə, bu tədqiqat uşaqlıq boynu xərçəngində tatu mürəkkəbinin limfa düyünlərinə keçdiyinin müəyyən edildiyi ilk klinik hal təqdimatıdır. Lakin süd vəzi xərçəngi və dəri xərçəngi kimi başqa növlərdə təqdim edilmiş hallar mövcuddur. Klinik hal təqdimatları tədqiqat növləri arasında sübut səviyyəsi və elmi dəyəri ən yüksək növlərdən deyil. Lakin diqqətçəkən halların təqdimatı məlumatlılıq yaratmaq üçün bəzən olduqca faydalıdır. Bu tədqiqat tatu mürəkkəbinin xərçəng sanki limfa düyünlərinə yayılmış kimi yanlış nəticəyə yönləndirə biləcəyini vurğulayır. Həkimlərin dərisində tatu olan xərçəngli xəstələri qiymətləndirərkən bu ehtimalı nəzərə almalı olduqlarını göstərir.