Urotelial xərçəngin birinci xətt müalicəsində enfortumab vedotin və pembrolizumab FDA təsdiqi aldı

Yerli irəliləmiş və ya metastatik urotelial xərçəngi olan xəstələr üçün enfortumab vedotin-ejfv (Padcev) və pembrolizumab (Keytruda) kombinasiyası 15 dekabr 2023-cü ildə FDA-nın (ABŞ Qida və Dərman İdarəsi) təsdiqini aldı.

FDA əvvəllər bu kombinasiyaya sisplatin tərkibli kimyaterapiyaya uyğun olmayan, yerli irəliləmiş və ya metastatik urotelial xərçəngli xəstələr üçün sürətləndirilmiş təsdiq vermişdi.

EV-302/KN-A39 tədqiqatı ilə əldə edilən FDA təsdiqi

Enfortumab vedotin (Padcev) və pembrolizumab (Keytruda) kombinasiyasının irəliləmiş urotelial xərçəngin birinci xətt müalicəsində yeni standarta çevrildiyini göstərən EV-302/KEYNOTE-A39 adlı faza-3 tədqiqatı idi.

Bu kombinasiya 442 iştirakçı üzərində aparılan sınaqda 31,5 aylıq median ümumi sağqalım ilə mövcud standart olan platin əsaslı kimyaterapiyanı nəzərəçarpacaq dərəcədə geridə qoydu. Bu, gemsitabin ilə sisplatin və ya karboplatin alan 444 iştirakçıda qeydə alınmış 16,1 aylıq median ümumi sağqalım ilə müqayisədə ölüm riskinin 53% azalması deməkdir (P < 0,00001). 

Kimyaterapiyanın çıxarılması yeni kombinasiyanın 3-cü və ya daha yüksək dərəcəli əlavə təsirləri əhəmiyyətli dərəcədə azaltmasına imkan verdi.

Bu, birinci xətt müalicədə ümumi sağqalım müddətini kimyaterapiyanın verdiyi nəticədən daha da artıra bildiyimiz ilk nümunədir. Enfortumab vedotin və pembrolizumab kombinasiyası 4-cü mərhələli solid (toxuma/orqan mənşəli) xərçəngdə əvvəllər heç rast gəlinməyən 30% remissiya göstəricisi verdi (remissiya xəstəliyin əlamətlərinin aradan qalxdığı və irəliləməsinin dayandığı dövrü bildirir).

EV-302/KEYNOTE-A39 tədqiqatı ESMO 2023 Konqresində təqdim edilmiş və konqresin ən çox diqqət çəkən tədqiqatı olmuşdu. Konqresdə EV-302/KEYNOTE-A39-dan dərhal sonra təqdim edilən və standart platin əsaslı kimyaterapiya ilə müqayisədə ümumi sağqalımda yaxşılaşma göstərən digər tədqiqatı — CheckMate 901-i geridə qoydu.

CheckMate 901 tədqiqatında kimyaterapiyanı tam çıxarmaq əvəzinə nivolumab əlavə edildi. Hər qola randomizə edilmiş 304 xəstədə nivolumabın əlavə olunması gemsitabin/sisplatin ilə əldə edilmiş 18,9 aylıq median ümumi sağqalım ilə müqayisədə 21,7 aylıq median ümumi sağqalım təmin etdi; bu da ölüm riskinin 22% azalması deməkdir (P = 0,0171).

Beləliklə, immunoterapiyanın birinci xətt kimyaterapiyaya əlavə edilməsinin metastatik urotelial xərçəngdə sağqalımı yaxşılaşdırdığı ilk dəfə göstərildi.

İrəliləmiş sidik kisəsi xərçənginin birinci xətt müalicələrində illərlə davam edən durğunluqdan sonra bu tədqiqatlar çox qiymətli irəliləyişi təmsil edir; çünki hər ikisi ilkin müalicədə kimyaterapiyanın nəticələrini üstələyə bildi.

Lakin enfortumab vedotin / pembrolizumab kombinasiyası ilə əldə edilən daha yaxşı sağqalım göstəriciləri bu kombinasiyanın artıq “irəliləmiş urotelial xərçənglər üçün ən yaxşı birinci xətt müalicə rejimi” olması deməkdir.

Əlavə təsirlər və dozalanma məlumatları

Enfortumab vedotin və pembrolizumab alan xəstələrdə ən çox rast gəlinən (20% və yuxarı) əlavə təsirlər və laborator anormallıqlar bunlardır: aspartat aminotransferazanın artması, kreatininin artması, səpgi, qlükozanın artması, periferik neyropatiya, lipazanın artması, limfositlərin azalması, alanin aminotransferazanın artması, hemoqlobinin azalması, yorğunluq, natriumun azalması, fosfatın azalması, albuminin azalması, qaşınma, ishal, alopesiya, çəkinin azalması, iştahanın azalması, uratın artması, neytrofillərin azalması, kaliumun azalması, göz quruluğu, ürəkbulanma, qəbizlik, kaliumun artması, dadbilmə pozğunluğu, sidik yolu infeksiyası və trombositlərin azalması.

Enfortumab vedotinin pembrolizumab ilə birlikdə tövsiyə edilən dozası xəstəlik irəliləyənədək və ya qəbuledilməz toksiklik yarananadək 21 günlük siklin 1-ci və 8-ci günlərində 30 dəqiqəlik venadaxili infuziya ilə verilən 1,25 mg/kg-dır (≥ 100 kg olan xəstələrdə maksimum 125 mg). Pembrolizumabın enfortumab vedotin-ejfv ilə birlikdə tövsiyə edilən dozası xəstəlik irəliləyənədək, qəbuledilməz toksiklik yarananadək və ya 2 illik müalicəyədək hər 3 həftədən bir venadaxili infuziya ilə 200 mg və ya hər 6 həftədən bir 400 mg-dır.

Layihələr və əməkdaşlıqlar

Bu qiymətləndirmə FDA Onkologiya Mükəmməllik Mərkəzinin onkoloji dərmanlar barədə beynəlxalq tərəfdaşlar arasında eyni vaxtda müraciət və qiymətləndirmə aparılması üçün çərçivə yaradan Project Orbis təşəbbüsü daxilində həyata keçirildi. FDA bu qiymətləndirmədə Avstraliya Terapevtik Məhsullar İdarəsi və Health Canada ilə əməkdaşlıq etdi.

Bundan əlavə, qiymətləndirmədə tam klinik müraciətin təqdim edilməsindən əvvəl məlumat göndərilməsini sürətləndirən Real Vaxtda Onkoloji Qiymətləndirmə pilot proqramından və FDA-nın qiymətləndirməsini asanlaşdırmaq üçün müraciət sahibinin könüllü təqdim etdiyi Assessment Aid sənədindən istifadə olundu. FDA müraciəti hədəf tarixindən 5 ay əvvəl təsdiqlədi. Müraciət Prioritet Qiymətləndirmə və İrəliləmiş Müalicə statusları aldı.