Xərçəng xəstələri yeni tanış olduqları şəxslərlə vəziyyətlərini paylaşmalıdırmı?

Xərçəng müalicəsi almaq və ya almış olmaq insanların yeni tanış olduqları şəxslərlə ünsiyyət qurmaqdan çəkinməsinə səbəb ola bilər. Qarşı cinslə ünsiyyətdə bu, daha aydın ola bilər. Belə vəziyyət yaşayırsınızsa, özünəinamınızı dəstəkləyə, gözləntilərinizi nəzərdən keçirməyə kömək edə biləcək və xəstəliyiniz haqqında nə vaxt danışmalı olduğunuz kimi mövzularda bəzi tövsiyələrimiz olacaq.

Yeni insanlarla tanış olmaq, maraq duyulan qarşı cinsdən biri ilə ünsiyyət qurmaq və ya yeni mühitə daxil olmaq həyəcanvericidir. Lakin xərçəngli şəxssinizsə və ya müalicə almısınızsa, yeni münasibətlər qurmaq üçün özünüzü cəsarətsiz hiss edə bilərsiniz. Hazır olub-olmadığınız barədə fikriniz qarışa bilər. Sağlamlıq vəziyyətiniz haqqında məlumatı paylaşmalısınızmı və ya nə vaxt paylaşmalısınız kimi suallar ağlınızı məşğul edə bilər. Qarşınızdakı şəxs və ya şəxslərin buna necə cavab verəcəyindən əmin ola bilməzsiniz. Mütəxəssislərə görə, əslində xərçəng diaqnozundan əvvəl də yeni biri ilə tanış olmaq, qarşı cinsdən biri ilə ilk görüş və ya yeni qrupla sosial mühitdə olmaq onsuz da həyəcanlı vəziyyətdir və bəzi çəkinmələr ola bilərdi. Lakin xərçəng təcrübəsini yaşadıqdan sonra oxşar hisslərin səbəbi kimi xəstəlik görülə bilər. Xəstəlik prosesi bir qədər qorxuducu və güvənsiz hiss etdirdiyi üçün sosial mühitdəki çəkingənlik də daha güclü hisslər yarada bilər. Əlbəttə, fiziki görünüşdəki dəyişikliklər də insanların özünəinamına təsir edə bilər.

Əksər xərçəng xəstələrinin oxşar narahatlıq və sualları var. Hələ evlənmək və ya övlad sahibi olmaq planı olan daha gənc şəxslərin yeni mühitə daxil olmaq və ya qarşı cinslə tanışlıq təcrübələri daha yaşlı, evli və uşaqlı şəxslərdən fərqlənir. Şəxsə və xəstəliyin miqyasına görə də narahatlıqlar dəyişə bilər. Bəzi tövsiyələrin bu mövzularda sizə kömək edə biləcəyini düşünürük.

Əvvəlcə özünüzü sevin

Xərçəng diaqnozu və müalicəsi şəxsin özünəinamını sarsıda bilər. Məsələn, fiziki görünüşün dəyişməsi özünəinama əhəmiyyətli təsir edə və bu da yeni münasibət qurmağı daha çox çətinləşdirə bilər.

Özünəinamınızı yenidən qurmaqla başlayın. Siz olduğunuz kimi dəyərlisiniz və hər halda sevilməyə layiqsiniz. Bunu özünüzə xatırladaraq xəstəlikdən əvvəl etdiyiniz fəaliyyətləri edin və ya əvvəllər etmək istədiyiniz şeyləri sınayın. Bu, özünüz kimi hiss etməyə kömək edir.

Münasibətdən nə gözlədiyinizi düşünün

Tutaq ki, bəyəndiyiniz biri ilə görüşdünüz və onun sizə maraq duyub-duymadığından əmin deyilsiniz. Bu, olduqca normaldır. Xəstə olmayanda da bunu yaşaya bilərdiniz. Lakin ən azı bunun qədər mühüm olan sizin qarşınızdakı şəxsin xarakterini və sizinlə dostluğa uyğun olub-olmadığını düşünməyinizdir. Xəstəlikdən əvvəlki gözləntiləriniz eyni davam edə və prioritetləriniz dəyişməyə bilər. Gözləntilərinizi düşünün və münasibətinizə buna görə istiqamət verin.

İlk addımı özünüz üçün atın

İnternetdə tanışlıq saytlarına daxil olmaq və ya şənlik dəvətlərini qəbul etmək üçün uyğun vaxt olmaya bilər. Sosiallaşmaq və ya çölə çıxmaq əvvəlcə özünüz üçün, xoş vaxt keçirmək üçün atacağınız addımdır. Özünüzə prioritet versəniz, daha xoşbəxt hiss edə bilərsiniz.

Fiziki görünüşü qəbul etmək

Xərçəng müalicələri fiziki iz buraxa, əhvala təsir edə, cinsi istəyi azalda və fiziki narahatlıq hissinə səbəb ola bilər. Belə şikayətləriniz olarsa və emosional çətinlik yaşadığınızı düşünürsünüzsə, psixoloji məsləhət, urologiya, plastik cərrahiyyə və ya ginekologiya mütəxəssislərindən dəstək almağınızı tövsiyə edirik.

• Cinsəllik haqqında xərçəng xəstəsi və həyat yoldaşının bilməli olduğu 5 şey

Nə vaxt danışacağınızı planlaşdırın

Xəstəliyinizi qarşınızdakı şəxsə nə vaxt danışacağınıza tamamilə fərdi olaraq özünüz qərar verməlisiniz. Bəzi şəxslər 2-ci və ya 3-cü görüşdə dərhal xərçəng diaqnozu aldıqlarından və müalicə keçdiklərindən danışmağa üstünlük verirlər. Bəziləri isə bir neçə ay danışmaqdan çəkinə bilərlər. Xərçəng xəstəsi olduqlarını gizlətmək istəməsələr də, bunun özləri haqqında bilinən ilk mövzu olmasını da istəmirlər.

Birlikdə xoş vaxt keçirdiyiniz şəxslərə xəstəliyiniz haqqında məlumat verməyiniz başqa bir insana çevriləcəyiniz demək deyil. Xəstəliyiniz barədə ilk söhbətdən əvvəl necə ifadə edəcəyinizi düşünsəniz, söhbət zamanı özünüzü daha rahat hiss edə bilərsiniz.

• Zamanın dayandığı an: XƏRÇƏNG DİAQNOZU ALMAQ!