Xərçəng xəstəsinin yaxını olmaq

Yaxınımız xərçəng olduqda ən çox maraqlandığımız məsələlərin başında ona ən yaxşı necə kömək edəcəyimiz və dəstək olacağımız gəlir.

Əvvəlcə nə deyəcəyimizdən və ya nə edəcəyimizdən əmin olmaya bilərik; onların necə hiss etdiklərinə açıq və həssas olmaq əksər insanların ehtiyac duyduğu şeydir. Onlar üçün orada olduğunuzu bilmək həqiqətən kömək edəcək.

Xərçəng xəstəsi yaxınlarının məsuliyyətini və qayğısını üzərinə götürənlər də xəstələrlə birlikdə çətin proseslər keçirirlər. Həm fiziki, həm də psixoloji yorğunluq yaradan bu prosesdə xəstələrə qulluq edən yaxınları üçün tövsiyələrimiz onların daha yaxşı hiss etməsinə və səmərəli olmasına kömək edə bilər.

Aşağıda xərçəng xəstələrinin qayğısı ilə məşğul olan yaxınları üçün 6 tövsiyə hazırladıq: 

Nail ola biləcəyiniz 3 hədəf müəyyən edin

Özünüzü yaxşı hiss etsəniz, başqalarına da yaxşı hiss etdirə bilərsiniz. Buna görə özünüzə qayğı göstərdikdə məsuliyyətinizdəki xəstə ilə də daha səmərəli məşğul ola bilərsiniz. Bir neçə kiçik hədəflə başlayın. Məsələn, özünüzə vaxt ayırıb gəzmək ola bilər. Hər gün müəyyən etdiyiniz uyğun vaxtda 15 dəqiqəlik gəzinti ilə başlaya bilərsiniz. Kiçik hədəflərinizə çatdıqca motivasiyanız artacaq, həm özünüzü, həm xəstənizi daha yaxşı hiss etdirəcəksiniz.

Kömək istəməkdən çəkinməyin

Kömək istəməkdən çəkinmək normaldır. Lakin hər işə çata bilməmək və ya bir mənada gücünüzün yetməməsi sizin bacarıqsız və ya uğursuz olduğunuz demək deyil. Dəstəyə ehtiyacınız olduqda uyğun şəxs və qurumlardan istəməkdən çəkinməyin.

Hələ vaxtınız varkən öz sərhədlərinizə hörmət edib istənilən mənada kömək istəyə bilərsiniz.

Vəzifələrdə prioritetə diqqət edin

Xəstəyə qulluq ciddi məsuliyyətlərin yerinə yetirilməsini tələb edir. Məsələn, dərman rejiminə nəzarət, yemək hazırlamaq, xəstəxana sənədlərinin işlənməsi, görüş təyin etmək, əlamətləri izləmək və daha çoxunu əhatə edir.

Bütün işlər arasında fikrinizin qarışmaması üçün daha planlı olmağı və prioritet olanlara ayrıca diqqət etməyi tövsiyə edirik. Hər şeyi bir anda etmək mümkün deyil. Lakin prioritet siyahınızı hazırladıqda bu işlərin öhdəsindən daha rahat gələ bilərsiniz.

Həmişə nəzarət edə bilməyəcəyinizi qəbul edin

Beynimiz nəzarət hissi barədə bizi yanılda bilər. Yəni; xəstə yaxınıma mükəmməl qulluq etsəm, sağalacaq. Bu tip cümlələr xəstələrin yaxınlarından tez-tez eşidilir. Yaxud müalicədən mənfi cavab alındıqda qulluq edən şəxs bunun yaxşı qulluq edə bilməməsinə görə olduğunu düşünüb özünü günahlandıra bilər. Lakin bu vəziyyət təəssüf ki, tamamilə qulluq edən şəxsin nəzarətində deyil və gələcəyi proqnozlaşdırmaq mümkün deyil. Əlinizdən gələnin ən yaxşısını edib hadisələri axarına buraxmağınız faydalıdır.

Google məsul ola bilməz

Sevdiyiniz şəxsin vəziyyətini həkim olmayan axtarış sistemi Google-dan soruşduqda adətən sizə narahatlıq və təşvişdən başqa cavab vermir. Milyonlarla mənbə çıxır və hansının doğru, xəstənizə uyğun məlumat olduğunu ayırmaq o qədər də mümkün deyil.

Üstəlik, heç vaxt şəxsə xas ola bilməyəcək bu nəticələr üçün özünüzü yormayın. Həkiminizdən soruşun və ikinci rəy almaqdan çəkinməyin.

Danışın

Xəstəyə qulluq edən şəxs kimi daim yüksək əhvalda olmağınız çətindir və problemsiz ola bilməzsiniz. Ailə üzvlərinizlə və ya dostlarınızla ünsiyyət qurun. Özünüzü təcrid etməyin. Sıxıntınız olduqda ailə üzvlərinizlə paylaşın. Susmaq gələcəkdə qəzəbli və hirsli hiss etməyinizə səbəb ola bilər. Üzərinizə götürdüyünüz iş asan deyil və onu həmişə sevgi ilə görmək bir qədər çətin ola bilər. Çətinlik çəkdiyinizi hiss etdikdə özünüzə qısa fasilə verin.