2021 წლისთვის ჯანსაღი ცხოვრების 21 რჩევა

წელს პანდემიის გამო ახალი წლის ღამეს უმეტესობა სახლში გავატარებთ. კორონავირუსთან ჩვენი ბრძოლის რაც შეიძლება მალე დასრულებასა და 2021 წელს მთელი მსოფლიოსთვის ჯანმრთელობისა და ბედნიერების მოტანას ვუსურვებთ. იმედით ნანატრი 2021 წლის დადგომისას თქვენთვის მოვამზადეთ ცხოვრების წესის რჩევები, რომლებიც ფიზიკური და ფსიქიკური ჯანმრთელობის გაუმჯობესებაში დაგეხმარებათ. ჩვენი ადვილად შესასრულებელი, მდგრადი ცხოვრების წესის რეკომენდაციები 2021 წელს ფიზიკურ ჯანმრთელობასთან ერთად ფსიქიკურ და სოციალურ ჯანმრთელობასაც შეუწყობს ხელს.
ჯანსაღი ცხოვრების 21 რჩევა
გაზარდეთ დაუმუშავებელი საკვების მოხმარება
კვების გზით ჯანმრთელობის გაუმჯობესების ყველაზე ჯანსაღი და მდგრადი გზა დაუმუშავებელი საკვების არჩევაა. მაგალითად შეგვიძლია მოვიყვანოთ ბოსტნეული, ხილი, კაკლოვანი ნაყოფები, მთლიანი მარცვლეულიდა თევზი. ეს პროდუქტები ორგანიზმის ოპტიმალური მუშაობისთვის საჭირო მრავალ საკვებ ნივთიერებას შეიცავს.
სამეცნიერო კვლევები აჩვენებს, რომ დაუმუშავებელი საკვების მაღალი მოხმარების მქონე კვებითი მოდელები ტიპი-2 დიაბეტის, გულ-სისხლძარღვთა დაავადებების, სიმსუქნის მსგავსი ჯანმრთელობის სხვადასხვა პრობლემისგან დაცვას უწყობს ხელს.
კვებაში დაუმუშავებელი საკვების მოხმარების შეძლებისდაგვარად მაღალ დონეზე შენარჩუნება ყველაზე სწორი მიდგომაა. თუმცა თუ ასეთ კვებას მიჩვეული არ ხართ, ცვლილება შეგიძლიათ ყოველდღე საყვარელი ბოსტნეულის ერთი პორციის დამატებით დაიწყოთ. ასე ნელ, მაგრამ უფრო მდგრად გზას გაჰყვებით.
შეამცირეთ ჯდომაში გატარებული დრო
სამუშაოს გამო ბევრი ჩვენგანის დღე, სამწუხაროდ, მაგიდასთან გადის. თუმცა ამას ჯანმრთელობაზე უარყოფითი გავლენა შეიძლება ჰქონდეს. სადილის შესვენებაზე 15 წუთი სიარული ან ყოველ საათში მაგიდიდან ადგომა და 5 წუთით მოძრაობაც კი ჯანმრთელობას წაადგება.
ამოიღეთ შაქრიანი სასმელები თქვენი ცხოვრებიდან
შაქრიანმა სასმელებმა შეიძლება გაზარდოს სიმსუქნის, ცხიმოვანი ღვიძლის, ტიპი 2 დიაბეტის, გულ-სისხლძარღვთა დაავადებებისა და კბილის კარიესის რისკი. ამიტომ შაქრიანი სასმელების ცხოვრებიდან ამოღება ჯანმრთელობისთვის სასარგებლო გადაწყვეტილებაა. მათ ნაცვლად შეგიძლიათ სცადოთ უმარილო აირანი, კეფირი, ბუნებრივი მინერალური წყალი (თუ ჰიპერტენზია არ გაქვთ) და მსგავსი ჯანსაღი სასმელები.
ყურადღება მიაქციეთ ხარისხიან ძილს
ხარისხიანი ძილიზოგადი ჯანმრთელობის მნიშვნელოვანი ნაწილია. ძილის ნაკლებობამ შეიძლება კონცენტრაციის დარღვევა და შფოთვა გამოიწვიოს. მას სხვადასხვა მიზეზი აქვს, მაგალითად სტრესი ან ძილისთვის შეუფერებელი გარემო. ძილის ხარისხის გასაუმჯობესებლად ზოგადად გირჩევთ, დაძინებამდე ეკრანს არ უყუროთ, კოფეინი შეამციროთ, ოთახში განათება ჩააქროთ და ადრე დაწვეთ (ასევე იხილეთ კარგი ძილისთვის რეკომენდებული 9 საკვები).
იპოვეთ სასიამოვნო ფიზიკური აქტივობა
ახალი წლის დადგომისას ბევრი ადამიანი ჯანმრთელობისთვის ცვლილებების სურვილით ძვირადღირებულ სპორტდარბაზსა თუ ონლაინ ფიტნესპროგრამაში ეწერება. თუმცა მტკიცე დასაწყისის მიუხედავად, ეს მიდგომა ხშირად მდგრადი არ არის. ამიტომ კონკრეტულად რომელი სპორტი გაინტერესებთ, ამის აღმოჩენა მდგრად სპორტულ ცხოვრებაში დაგეხმარებათ. განსაკუთრებით თუ ახლახან იწყებთ, რეალისტური მიზნებით წინსვლა ბევრად მდგრადი იქნება. მაგალითად, თუ საერთოდ არ ვარჯიშობთ, ცხოვრების წესის ერთ ღამეში შეცვლისა და ყოველდღე სირბილის მიზნად დასახვის ნაცვლად, თავდაპირველად კვირაში 1-2-ჯერ სირბილი შეგიძლიათ სცადოთ.
მეტი დრო დაუთმეთ საკუთარ თავს
არ უნდა დაგავიწყდეთ, რომ მხოლოდ საკუთარი თავისთვის დროის დათმობა, სხვებსა და საქმეებზე ზრუნვის გარეშე, ეგოიზმი არ არის. დატვირთულმა სამუშაომ და დროის სიმცირემ შეიძლება საკუთარ თავს დაგვაშოროს და სულის საზრდოობა დაგვავიწყოს. ჯერ აღმოაჩინეთ, რა გაგრძნობინებთ თავს კარგად და საკუთარი თავისთვის დროის გამოყოფა ჩვევად აქციეთ. ეს დრო ხანგრძლივი არც უნდა იყოს. თბილ აბაზანაში ნახევარი საათი, ჯანსაღი კერძის მომზადება ან კვირაში რამდენჯერმე იოგის სესიაზე დასწრებაც შეიძლება საკმარისი იყოს.
სახლში უფრო ხშირად მოამზადეთ საკვები
მზა კერძები სახლში მომზადებულზე ბევრად მეტ კალორიას შეიძლება შეიცავდეს. 2017 წელს, International Journal of Behavioural Nutrition and Physical Activity ჟურნალში გამოქვეყნებულმა და 11.396 მონაწილით ჩატარებულმა კვლევამ;
- დაასკვნა, რომ კვირაში 5-ჯერ ან მეტჯერ სახლში მომზადებული კერძის მომხმარებლებს, 3-ჯერ ნაკლებ მომხმარებლებთან შედარებით, ჭარბწონიანობის ალბათობა %28 ნაკლები ჰქონდათ.
კერძების შეძლებისდაგვარად სახლში, ჯანსაღი პროდუქტებით მომზადება ჯანმრთელობის გაუმჯობესებასთან ერთად კვების ხარჯების შემცირებაშიც დაგეხმარებათ.
მეტი დრო გაატარეთ ღია ცის ქვეშ
პანდემიის პერიოდში ვართ, ამიტომ სოციალური დისტანცია უნდა დავიცვათ და დახურულ სივრცეებს შეძლებისდაგვარად მოვერიდოთ. სუფთა ჰაერზე დროის გატარება გადაცემის რისკსაც შეამცირებს და სტრესის დონის დაქვეითებით უფრო მხიარულად ყოფნაშიც დაგეხმარებათ.
შეზღუდეთ ეკრანთან გატარებული დრო
ბევრი ადამიანი დღის უმეტეს საათებს ტელეფონის, კომპიუტერის ან ტელევიზორის ეკრანთან ატარებს. თუმცა ელექტრონულ მოწყობილობებთან ხანგრძლივი დრო ფსიქიკურ და ფიზიკურ ჯანმრთელობას არ უხდება. ამიტომ გირჩევთ ეს დრო შეზღუდოთ და ცხოვრებაში თქვენთვის შესაფერის სხვა აქტივობებსაც დაუთმოთ ადგილი, მაგალითად კითხვას, ხატვას ან ფაზლების აწყობას.
- დაკავშირებული თემა: ნომოფობია – რა არის მობილური ტელეფონისგან შორს ყოფნის შიში?
სცადეთ მედიტაცია
მედიტაცია ფსიქიკური ჯანმრთელობის გაუმჯობესების მტკიცებულებებზე დაფუძნებული გზაა. ის განსაკუთრებით სასარგებლოა შფოთვისა თუ დეპრესიის მქონე პირებისთვის. სახლში მედიტაციის დაწყების მსურველებს შეუძლიათ წიგნები ან ინტერნეტაპლიკაციები გამოიყენონ.
შეზღუდეთ შეფუთული საკვების მიღება
მიუხედავად გემრიელობისა და მომზადების სიმარტივისა, ასეთ საკვებს შეძლებისდაგვარად უნდა მოერიდოთ. თუ ზედმეტად მოიხმართ შეფუთულ ჩიფსებს, ორცხობილებს, მზა გაყინულ კერძებს, გზას უხსნით სიმსუქნეს, გულ-სისხლძარღვთა დაავადებას, ტიპი 2 დიაბეტსა და ბევრ სხვა დაავადებას.
კვლავ სცადეთ ჯანსაღი კვების მოდელი
დიეტის მიმდევართა ძირითადი შეცდომა ხშირად შემზღუდველი და არამდგრადი კვებითი მოდელების დაცვაა, მაგალითად ძალიან დაბალნახშირწყლოვანი დიეტის. ეს მოდელები სწრაფი გახდომის დაპირების მიუხედავად, ჯანმრთელობაზე უარყოფითად შეიძლება მოქმედებდეს. რადგან მდგრადი არ არის, მოსალოდნელია დიეტის შუაში შეწყვეტა, ძველ ცხოვრების წესზე დაბრუნება და დაკლებულზე ბევრად მეტი წონის აღდგენა. ამიტომ შემზღუდველი დიეტების ნაცვლად გირჩევთ სცადოთ ცხოვრების წესად ქცევადი, მდგრადი კვებითი მოდელები, მაგალითად ხმელთაშუაზღვის დიეტა .
უფრო ხშირად მოიმარაგეთ სამზარეულოს პროდუქტები
სახლში ჯანსაღი პროდუქტების არსებობა სახლში მომზადების სურვილს გაზრდის და საქმეს გაგიადვილებთ. თქვენთვის მოსახერხებელ დღეს კვირაში 1-ჯერ პროდუქტების საყიდლად გასვლა ან სახლში შეკვეთა მომზადებისთვის საჭირო მოტივაციის ზრდას დაეხმარება.
გამოიყენეთ უფრო ჯანსაღი საყოფაცხოვრებო და პირადი მოვლის პროდუქტები
სარეცხი საშუალებიდან სხეულზე წასასმელ კრემამდე ყველა პროდუქტს მნიშვნელოვანი როლი აქვს ზოგად ჯანმრთელობაზე. წელს ცვლილება შეიტანეთ და უფრო ბუნებრივი შემადგენლობის პროდუქტების არჩევა დაიწყეთ.
- დაკავშირებული თემა: სილამაზისა და კოსმეტიკის რჩევები კიბოს პაციენტებისთვის
შეზღუდეთ ან შეწყვიტეთ ალკოჰოლის მიღება
კვირაში 1-2 ჭიქა წითელი ღვინო შეიძლება ჯანსაღი კვების ნაწილად ჩაითვალოს. თუმცა ალკოჰოლის ჭარბი მოხმარება ჯანმრთელობისთვის ძალიან საზიანო შეიძლება იყოს. ამიტომ გირჩევთ მიღება შეძლებისდაგვარად დაბალ დონეზე შეინარჩუნოთ ან საერთოდ ამოიღოთ. ალკოჰოლის მოხმარების გარემოში მოხვედრისას შეგიძლიათ უალკოჰოლო კოქტეილებისა და სხვა ალტერნატივების ცდით მიღების შეზღუდვა სცადოთ.
შეიძინეთ ახალი ჰობი
ყველას უნდა ჰქონდეს ჰობი!
ასაკის მატებასთან ერთად დატვირთული სამუშაოსა და მოტივაციის ნაკლებობის გამო ოდესღაც საყვარელი ჰობებისგან დაშორება ძალიან გავრცელებულია. წელს საკუთარი თავისთვის დროის გამოყოფითა და სიხარულის მომტანი ახალი ჰობების შეძენით ფსიქიკური ჯანმრთელობის გაუმჯობესებას შეუწყობთ ხელს.
არ გამოტოვოთ ექიმთან ვიზიტები
ექიმის მიერ რეგულარული გასინჯვა, სისხლის ანალიზები და გამოსახულებითი კვლევები ძალიან მნიშვნელოვანია. რეგულარულმა შემოწმებებმა პრობლემები ადრეულად შეიძლება აღმოაჩინოს და მძიმე, მუდმივი დაზიანება თავიდან აგვაცილოს.
იზრუნეთ კბილებისა და პირის ჯანმრთელობაზე
კბილების რეგულარული ხეხვა და ძაფის გამოყენება ღრძილების დაავადებისა და პირის უსიამოვნო სუნის მსგავსი პრობლემების თავიდან აცილებაში შეიძლება დაგეხმაროთ. ზოგი კვლევა აჩვენებს, რომ უმკურნალო ღრძილებისა თუ პირის დაავადებებმა უფრო მძიმე პრობლემები შეიძლება გამოიწვიოს.
წადით დასასვენებლად
პანდემიის გამო ახლა დასასვენებლად წასვლა დიდად შესაძლებელი არ არის. თუმცა ვიმედოვნებთ, პანდემია რაც შეიძლება მალე დასრულდება. მისი დასრულების შემდეგ პირველივე შესაძლებლობისას სასურველ ადგილას დასასვენებლად შეგიძლიათ გაემგზავროთ. ახლობლებთან რამდენიმე დღითაც კი სხვა გარემოსა და ქალაქში ყოფნა ფსიქიკური ჯანმრთელობის მხარდაჭერისთვის ძალიან სასარგებლოა.
- დაკავშირებული თემა: შეუძლიათ კიბოს პაციენტებს აბანოში, საუნასა და თერმულ წყლებზე დასვენება?
გათავისუფლდით უარყოფითი აზრებისგან
უარყოფითი აზრები როგორც საკუთარ სხეულზე, ისე გარშემო მოვლენებზე, ვერაფერს აუმჯობესებს და სტრესს კიდევ უფრო ზრდის. ამიტომ შეძლებისდაგვარად დადებითად ფიქრი და საკუთარი თავის მიმართ დაუნდობლობის თავიდან აცილება სტრესის შესამცირებლად სწორი მიდგომაა.
სცადეთ ბაღში ახალი ბოსტნეულისა და ხილის მოყვანა
ბოსტნეულსა და ხილს ვიტამინების, მინერალებისა და ფლავონოიდების შემცველობის გამო ჯანმრთელობაზე ბევრი დადებითი გავლენა აქვს. ამასთან, საკუთარ ბაღში მოყვანილი პროდუქტების ჭამა მაღაზიაში ნაყიდზე ბევრად უფრო ჯანსაღი და სახალისო იქნება.
დასკვნა
სტატიაში მოცემული 21 რეკომენდაციის დაცვა 2021 წელს ფიზიკური და ფსიქიკური ჯანმრთელობის გაუმჯობესებაში დაგეხმარებათ. როგორც ყოველთვის ვამბობთ, რეალისტური მიზნები უფრო მდგრადი იქნება. ამიტომ სასარგებლოა რჩევების ცხოვრებაში ნელ-ნელა ჩართვა და არა ყველას ერთ ღამეში შესრულება. ვუსურვებთ 2021 წელს მთელი მსოფლიოსთვის ჯანმრთელობისა და ბედნიერების მოტანას…
*
- როგორ შევარჩიოთ კიბოს პაციენტისთვის ყურადღებიანი და შესაფერისი საჩუქარი?
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.