2021-ci il üçün 21 sağlam həyat tövsiyəsi

Bu il pandemiya səbəbilə çoxumuz yeni ili evdə keçirəcəyik. Koronavirus ilə mübarizəmizin ən qısa zamanda bitməsini və 2021-ci ilin bütün dünyaya sağlamlıq və xoşbəxtlik gətirməsini arzulayırıq. Ümidlə gözlədiyimiz 2021-ci ilə girərkən fiziki və ruhi sağlamlığınızı yaxşılaşdırmağa kömək edəcək həyat tərzi tövsiyələrini sizin üçün hazırladıq. Tətbiq edərkən çətinlik çəkməyəcəyiniz, davamlı həyat tərzi tövsiyələrimiz 2021-ci ildə fiziki sağlamlığınızı yaxşılaşdırmaqla yanaşı, ruhi və sosial sağlamlığınızı da dəstəkləyəcək.
21 sağlam həyat tövsiyəsi
Emal edilməmiş qida istehlakınızı artırın
Sağlamlığı qidalanma ilə yaxşılaşdırmağın ən sağlam və davamlı yolu emal edilməmiş qidalara yönəlməkdir. Bu qidalara nümunə olaraq tərəvəz, meyvə, çərəzlər, tam taxıllar, balıq kimi qidaları göstərə bilərik. Bu qidalar bədəninizin optimal işləməsi üçün ehtiyac duyduğu çoxsaylı qida maddələrini ehtiva edir.
Elmi tədqiqatlar emal edilməmiş qida istehlakının yüksək olduğu pəhriz modellərinin, tip-2 diabet, ürək-damar xəstəlikləri, piylənmə kimi müxtəlif sağlamlıq problemlərindən qorunmağa kömək etdiyini göstərir.
Qidalanmanızda emal edilməmiş qida istehlakını mümkün qədər yüksək saxlamaq ən doğru yanaşma olacaq. Lakin belə qidaları yeməyə alışmamısınızsa, dəyişikliyə hər gün sevdiyiniz tərəvəzdən bir porsiya əlavə etməklə başlaya bilərsiniz. Beləcə yavaş, lakin daha davamlı yol izləmiş olacaqsınız.
Oturaq keçirdiyiniz vaxtı azaldın
Çoxumuzun günü işimizə görə təəssüf ki, masa arxasında keçir. Lakin bu vəziyyətin sağlamlığa mənfi təsirləri ola bilər. Nahar fasiləsində 15 dəqiqəlik gəzinti və ya hər saat masadan qalxıb hərəkət edəcəyiniz 5 dəqiqə belə sağlamlığınıza töhfə verəcək.
Şəkərli içkiləri həyatınızdan çıxarın
Şəkərli içkilər piylənmə, yağlı qaraciyər, tip 2 diabet, ürək-damar xəstəlikləri, diş çürükləri kimi xəstəliklərin riskini artıra bilər. Buna görə şəkərli içkiləri həyatınızdan çıxarmaq sağlamlığınız üçün faydalı qərar olacaq. Şəkərli içkilər əvəzinə duzsuz ayran, kefir, təbii mineral su (təzyiq xəstəsi deyilsinizsə) kimi sağlam içkilər içməyi sınaya bilərsiniz.
Keyfiyyətli yuxuya diqqət edin
Keyfiyyətli yuxu, ümumi sağlamlığın mühüm hissəsidir. Yuxusuzluq diqqət pozuntusu, narahatlıq kimi sağlamlıq problemləri yarada bilər. Yuxusuzluğun stress, mühitin yuxuya uyğun olmaması kimi müxtəlif səbəbləri ola bilər. Yuxu keyfiyyətinizi artırmaq üçün ümumi tövsiyələr versək, yatmazdan əvvəl ekrana baxmamağı, kofein qəbulunu azaltmağı, otağın işığını zəiflətməyi və erkən yatmağı məsləhət görə bilərik (həmçinin baxın yaxşı yuxu üçün qəbulu tövsiyə olunan 9 qida).
Zövq aldığınız fiziki fəaliyyət tapın
Yeni ilə girərkən bir çox insan sağlamlıq naminə həyatında dəyişiklik etmək istədiyi üçün bahalı idman zallarına, onlayn fitnes proqramlarına yazılır. Lakin qətiyyətli başlansa da, bu münasibət çox vaxt davamlı olmur. Buna görə məhz hansı idman növlərinə marağınız olduğunu kəşf etmək davamlı idman həyatına kömək edəcək. Xüsusilə idmana yeni başlayırsınızsa, real hədəflərlə irəliləmək daha davamlı olacaq. Məsələn, heç idman etmədiyiniz halda bir gecədə həyat tərzinizi dəyişib həftənin hər günü qaçmağı hədəfləmək əvəzinə, əvvəlcə həftədə 1-2 dəfə qaçmağı sınaya bilərsiniz.
Özünüzə daha çox vaxt ayırın
Heç kimlə və heç bir işlə məşğul olmadan yalnız özünüzə vaxt ayırmağın eqoistlik olmadığını unutmamalısınız. Gərgin iş tempi və vaxt çatışmazlığı özümüzdən uzaqlaşmağımıza, ruhumuzu qidalandırmağı unutmağımıza səbəb ola bilər. Əvvəlcə sizə nəyin yaxşı gəldiyini kəşf etməli və özünüzə vaxt ayırmağı vərdişə çevirməlisiniz. Bu vaxtın uzun olmasına da ehtiyac yoxdur. İsti vannada yarım saat, özünüzə sağlam yemək hazırlamaq və ya həftədə bir neçə dəfə yoqa seansına qatılmaq belə kifayət edə bilər.
Evdə daha çox yemək bişirin
Hazır alınan yeməklərdə evdə hazırlananlarla müqayisədə xeyli çox kalori ola bilər. 2017 -ci ildə, International Journal of Behavioural Nutrition and Physical Activity jurnalında dərc olunan və 11.396 iştirakçı ilə aparılan tədqiqat;
- Həftədə 5 dəfə və ya daha çox evdə hazırlanmış yemək yeyən iştirakçıların, 3 dəfədən az yeyənlərlə müqayisədə artıq çəkili olma ehtimalının %28 daha aşağı olduğu nəticəsinə gəldi.
Bacardığınız qədər yeməkləri evdə, sağlam qidalardan istifadə edərək hazırlamaq sağlamlığınızı yaxşılaşdırmaqla yanaşı, yemək xərclərinizin də azalmasına kömək edəcək.
Açıq havada daha çox vaxt keçirin
Pandemiya dövründəyik, buna görə sosial məsafəni qorumalı, qapalı mühitlərdən mümkün qədər uzaq durmalıyıq. Təmiz havada vaxt keçirmək həm yoluxma riskinizi azaldacaq, həm də stress səviyyənizi azaltmağa töhfə verərək özünüzü daha şən hiss etməyinizə kömək edəcək.
Ekrana baxdığınız müddəti məhdudlaşdırın
Bir çox insan günün əksər saatlarını telefon, kompüter və ya televizor ekranına baxaraq keçirir. Lakin elektron cihazlar qarşısında keçən uzun saatlar ruhi və fiziki sağlamlığımıza yaxşı təsir etmir. Buna görə bu müddəti məhdudlaşdırmağı, həyatınızda kitab oxumaq, rəsm çəkmək, pazl yığmaq kimi sizə uyğun digər fəaliyyətlərə də yer verməyi tövsiyə edirik.
- Əlaqəli mövzu: Nomofobiya – mobil telefondan uzaq qalmaq qorxusu nədir?
Meditasiya etməyi sınayın
Meditasiya zehni sağlamlığı yaxşılaşdırmağın sübutlara əsaslanan yoludur. Xüsusilə narahatlıq və ya depressiya yaşayanlara faydalı olacaq. Evdə meditasiyaya başlamaq istəyənlər kitablardan və ya internetdəki tətbiqlərdən yararlana bilərlər.
Qablaşdırılmış qida istehlakını məhdudlaşdırın
Dadlı və hazırlanması asan olsa da, bu qidalardan mümkün qədər uzaq durmalısınız. Qablaşdırılmış çips, peçenye, hazır dondurulmuş yeməklər kimi qidaları çox yesəniz, piylənmə, ürək-damar xəstəliyi, tip 2 diabet kimi bir çox başqa xəstəliyə zəmin yaratmış olarsınız.
Sağlam pəhriz modeli ilə qidalanmağı yenidən sınayın
Pəhriz saxlayanların adətən etdiyi əsas səhv çox aşağı karbohidratlı pəhrizlər kimi məhdudlaşdırıcı və davamlı olmayan modellərə uyğunlaşmağa çalışmaqdır. Bu modellər sürətli çəki itkisi vəd etsə də, sağlamlığınıza mənfi təsir göstərə bilər. Davamlı olmadıqları üçün pəhrizi yarımçıq qoyub əvvəlki həyat tərzinə qayıdaraq itirdiyinizdən xeyli çox çəki geri almağınız da mümkündür. Buna görə məhdudlaşdırıcı pəhrizlər əvəzinə həyat tərzinizə çevirə biləcəyiniz Aralıq dənizi pəhrizi kimi davamlı pəhriz modellərini sınamağı tövsiyə edirik.
Daha tez-tez ərzaq alış-verişi edin
Evdə sağlam qidaların olması yemək bişirmək istəyinizi artıracaq və işinizi asanlaşdıracaq. Sizə uyğun gündə həftədə 1 dəfə ərzaq alış-verişinə çıxmaq və ya evə sifariş etmək yemək bişirmək üçün lazım olan motivasiyanı artırmağa kömək edəcək.
Daha sağlam ev və şəxsi qulluq məhsullarından istifadə edin
Paltar yuduğunuz yuyucu vasitədən bədəninizə çəkdiyiniz kremə qədər bütün məhsullar ümumi sağlamlığınızda mühüm rol oynayır. Bu il dəyişiklik edin və daha təbii tərkibli məhsullara üstünlük verməyə başlayın.
- Əlaqəli mövzu: Xərçəng xəstələri üçün gözəllik-kosmetika tövsiyələri
Alkoqol istehlakını məhdudlaşdırın və ya dayandırın
Həftədə 1-2 qədəh qırmızı şərab içmək sağlam pəhrizin bir hissəsi sayıla bilər. Lakin həddindən artıq alkoqol istehlakı sağlamlıq üçün olduqca zərərli ola bilər. Buna görə alkoqol istehlakınızı mümkün qədər aşağı saxlamağı və ya həyatınızdan tam çıxarmağı tövsiyə edirik. Alkoqol içilən mühitə girdikdə alkoqolsuz kokteyl kimi alternativləri sınayaraq alkoqol qəbulunu məhdudlaşdırmağa çalışa bilərsiniz.
Yeni hobbi əldə edin
Hər kəsin hobbisi olmalıdır!
Yaş artdıqca gərgin iş tempi və motivasiya çatışmazlığı səbəbilə bir vaxtlar sevilən hobbilərdən uzaqlaşmaq geniş yayılmış davranışdır. Bu il özünüzə vaxt ayırıb sizə xoşbəxtlik gətirəcək yeni hobbilər əldə edərək ruhi sağlamlığınızı yaxşılaşdırmağa kömək edə bilərsiniz.
Həkim ziyarətlərinizi gecikdirməyin
Həkiminiz tərəfindən müntəzəm müayinə olunmaq, qan analizlərini və görüntüləmə müayinələrini etdirmək olduqca vacibdir. Müntəzəm yoxlamalar sağlamlıq problemlərini erkən aşkarlayaraq ciddi və qalıcı zədələr yaratmasının qarşısını ala bilər.
Diş və ağız sağlamlığınıza diqqət edin
Dişlərinizi müntəzəm fırçalamaq və diş sapından istifadə diş əti xəstəliyi, ağız qoxusu kimi problemlərin qarşısını almağa kömək edə bilər. Bəzi araşdırmalar isə müalicə edilməyən diş əti və ya ağız xəstəliklərinin daha ciddi problemlərə yol aça biləcəyini göstərir.
Tətilə çıxın
Pandemiya dövründə olduğumuz üçün hazırda tətilə çıxmağımız o qədər də mümkün deyil. Lakin pandemiyanın ən tez zamanda bitməsini arzulayırıq. Pandemiya bitəndə ilk fürsətdə istədiyiniz yerə tətilə yola düşə bilərsiniz. Sevdiklərinizlə bir neçə günlük belə olsa, fərqli mühitdə və şəhərdə vaxt keçirmək ruhi sağlamlığınızı dəstəkləmək üçün olduqca faydalı olacaq.
Mənfi düşüncələrdən qurtulun
Həm öz bədəniniz, həm də ətrafınızdakı hadisələr barədə mənfi düşüncələr heç bir vəziyyəti yaxşılaşdırmayacağı kimi, stress səviyyənizin daha da artmasına səbəb olacaq. Buna görə mümkün qədər müsbət düşünmək və özünüzə qarşı amansız olmamaq stress səviyyənizi azaltmaq üçün doğru yanaşma olacaq.
Bağınızda təzə tərəvəz və meyvə yetişdirməyi sınayın
Tərəvəz və meyvələrin vitamin, mineral və flavonoid tərkibinə görə sağlamlığa çoxsaylı müsbət təsirləri var. Həmçinin bağınızda yetişdirdiyiniz tərəvəz və meyvələri yemək marketdən aldıqlarınızdan daha sağlam və əyləncəli olacaq.
Nəticə
Yazımızda verdiyimiz 21 tövsiyəyə riayət etmək 2021-ci ildə fiziki və ruhi sağlamlığınızı yaxşılaşdırmağa kömək edəcək. Həmişə dediyimiz kimi, özünüzə real hədəflər qoymaq daha davamlı olacaq. Buna görə tövsiyələrimizin hamısını bir gecədə deyil, daha yavaş şəkildə həyatınıza əlavə etmək faydalı olacaq. 2021-ci ilin bütün dünyaya sağlamlıq və xoşbəxtlik gətirməsi diləyi ilə…
*
- Xərçəng xəstələri üçün qayğıkeş və uyğun HƏDİYYƏ necə seçilir?
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.