ატეზოლიზუმაბის იმუნოთერაპიამ PD-L1-ის მაღალი დონის მქონე ფილტვის კიბოს პირველი ხაზის მკურნალობისთვის FDA-ს დამტკიცება მიიღო

18 მაისს 2020 წელს აშშ-ის სურსათისა და წამლის ადმინისტრაციამ (FDA) სიმსივნეში PD-L1-ის მაღალი დონის მქონე მეტასტაზური (4. სტადია) ფილტვის არაწვრილუჯრედოვანი კიბოს (KHDAK) მქონე მოზრდილთა პირველი ხაზის მკურნალობისთვის ატეზოლიზუმაბი(Tecentriq) დაამტკიცა. გამოყენების პირობაა, რომ PD-L1სიმსივნური უჯრედების ≥50%-ში იღებებოდეს [TC ≥ 50%], ან სიმსივნეში შეღწეული იმუნური სისტემის უჯრედები სიმსივნის უბნის ≥10%-ში PD-L1-ზე იღებებოდეს [IC ≥ 10%] და არ არსებობდეს EGFR და ALK გენეტიკური ცვლილებები.
ამავე დროს FDA-მ ატეზოლიზუმაბით მკურნალობისთვის KHDAK პაციენტების შესარჩევ თანმხლებ დიაგნოსტიკურ საშუალებად VENTANA PD-L1 (SP142) ტესტიც დაამტკიცა.
IMpower110 კვლევა
ატეზოლიზუმაბის ეფექტიანობა შეფასდა სიმსივნეში PD-L1-დადებითი (TC ≥ 1% ან IC ≥ 1%), 4. სტადიის KHDAK-ის მქონე პაციენტებში, მრავალცენტრულ, საერთაშორისო, რანდომიზებულ, ღია IMpower110 კვლევაში. პაციენტები დაავადების პროგრესირებამდე ან მიუღებელ გვერდით ეფექტამდე ყოველ 3 კვირაში 1200 mg ატეზოლიზუმაბის ან პლატინაზე დაფუძნებული ქიმიოთერაპიის მისაღებად შემთხვევითად 1:1 თანაფარდობით ორ ჯგუფად გაიყვნენ. ეფექტიანობის ძირითადი საბოლოო წერტილი საერთო გადარჩენა იყო.
შედეგები

- პლატინაზე დაფუძნებულ ქიმიოთერაპიასთან შედარებით, ატეზოლიზუმაბის მიმღებ, სიმსივნეში PD-L1-ის მაღალი დონის მქონე პაციენტებში საერთო გადარჩენა სტატისტიკურად მნიშვნელოვნად გაუმჯობესდა.
- მედიანური საერთო გადარჩენა ატეზოლიზუმაბის ჯგუფში 20.2 თვე იყო, ქიმიოთერაპიის ჯგუფში კი 13.1 თვე.
- ამ პაციენტებში საწყის მკურნალობად ატეზოლიზუმაბის გამოყენებამ ქიმიოთერაპიასთან შედარებით სიკვდილის რისკი 41%-ით შეამცირა.
- შუალედურ ან საბოლოო ანალიზებში PD-L1-ის დანარჩენი ორი ქვეჯგუფისთვის (TC ≥ 5% ან IC ≥ 5%; და TC ≥ 1% ან IC ≥ 1%) საერთო გადარჩენაში მნიშვნელოვანი განსხვავება არ იყო.
- მედიანური პროგრესირების გარეშე გადარჩენა (PFS)ატეზოლიზუმაბის ჯგუფში 8.1 თვე, პლატინაზე დაფუძნებული ქიმიოთერაპიის ჯგუფში კი 5 თვე იყო.
- საერთო პასუხის მაჩვენებელი იმუნოთერაპიისას 38%, ქიმიოთერაპიისას კი 29% იყო.
IMpower110-ში ატეზოლიზუმაბის მონოთერაპიის ყველაზე ხშირი (>20%) გვერდითი ეფექტი დაღლილობა / ასთენია იყო.
KHDAK-ის მკურნალობისთვის ატეზოლიზუმაბის რეკომენდებული დოზაა ყოველ 2 კვირაში 840 mg, ან ყოველ 3 კვირაში 1200 mg, ან ყოველ 4 კვირაში 1680 mg, 60-წუთიანი ინტრავენური ინფუზიით.
*
წყაროები
fda.gov - 18 May 2020
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.