კიბოს მკურნალობის შემდეგ გასათვალისწინებელი 6 საკითხი

ხშირად ინტერესდებიან და იკვლევენ, რას უნდა მივაქციოთ ყურადღება კიბოსგან დასაცავად ან კიბოს დროს. თუმცა კიბოს გადატანის შემდეგ ჯანმრთელობის შესანარჩუნებლად სულ მცირე იმდენივე ძალისხმევაა საჭირო, რამდენიც მის პრევენციას სჭირდება. კიბოს განმეორების (რეციდივის) და სხვა დაავადების განვითარების ალბათობის შესამცირებლად რამდენიმე რჩევა გვაქვს. ამ სტატიაში გაეცნობით ცხოვრების წესის მნიშვნელოვან საკითხებს: ჯანსაღი წონის შენარჩუნებას, ფიზიკურ აქტივობასა და კვების ჩვევებს.

1- გააუმჯობესეთ სკრინინგი და ცხოვრების წესი

ჯანსაღი ცხოვრების დასაგეგმად საჭიროა პაციენტთა ინდივიდუალური შეფასება, კლასიფიკაცია და ამ მიმართულებით მუშაობა. გასათვალისწინებელია ადამიანის ფიზიკური მდგომარეობა, ჯანმრთელობის საჭიროებები და მიზნები. თქვენი დიაგნოზის შესაბამისად, ექიმის მიერ რეკომენდებული სიხშირით კიბოს სკრინინგი ჩაიტარეთ, საჭირო ანალიზები გაიკეთეთ და სხვა დაავადებების რისკების შესამოწმებელი კონტროლიც არ გამოტოვოთ. შეგიძლიათ წლიური შემოწმებების გეგმის სია შეადგინოთ.

2- იყავით უფრო აქტიური

საკვანძო სიტყვაა: ფიზიკური აქტიურობა!

მიღებული საკვების რაოდენობის რეგულირება წონის კონტროლში გეხმარებათ. აქტიურობა წონის მართვაში დახმარებით კიბოს რისკის შემცირებას უწყობს ხელს. ასევე შეიძლება ჰორმონების დონე გააუმჯობესოს და იმუნური სისტემის მუშაობას დაეხმაროს. მეორე მხრივ, ფიზიკური აქტივობა გულის დაავადებისა და დიაბეტის რისკის შემცირებასაც ეხმარება. ტელევიზორთან ან სახლში ჯდომის ნაცვლად აირჩიეთ თქვენთვის სასიამოვნო მოძრავი საქმიანობა, მაგალითად სეირნობა, ველოსიპედით სიარული ან ბაღის მოვლა.

- დაკავშირებული თემა: ამცირებს თუ არა მსხვილი ნაწლავის კიბოს პაციენტებში ტელევიზორთან ზედმეტი დროის გატარება სიცოცხლის ხანგრძლივობას?

3- ყურადღება მიაქციეთ წონის კონტროლს – დაფიქრდით კვების კონსულტაციაზე

ჯანმრთელობისთვის მიღებული მხარდაჭერა ყველგან და ყველა პირობას ერთნაირად ვერ შეესაბამება. მოქმედებს პირადი მიზნები, არჩევანი და რესურსები და შესაძლოა კიბოს სპეციფიკაზე მორგებული ინდივიდუალური პროგრამების შემუშავება გახდეს საჭირო. ჯანსაღი წონის შენარჩუნება მნიშვნელოვანია სხვა ქრონიკული დაავადებების, მაგალითად გულ-სისხლძარღვთა დაავადებებისა და დიაბეტის რისკის შესამცირებლად. ჭარბი წონა ან სიმსუქნე ზრდის ძუძუს, კოლონისა და სწორი ნაწლავის, ენდომეტრიუმის (საშვილოსნოს), ეზოფაგუსის (საყლაპავის), პანკრეასისა და თირკმლის კიბოს რისკს.

4- მიირთვით ჯანსაღი საკვები

ჯანსაღი კვება ჯანმრთელობისა და კიბოს რისკის შემცირების ერთ-ერთი მნიშვნელოვანი წესია. თუმცა გავრცელებულია მცდარი წარმოდგენა, თითქოს ჯანსაღი კვება მხოლოდ ორგანული საკვების მიღებას ნიშნავს. ჯანსაღ კვებას ერთი მარტივი წესი აქვს: ჭამეთ მცირე რაოდენობით და უპირატესად ბოსტნეული!

• მეტი გაიგეთ ულუფების ზომებისა და კალორიების შესახებ; წაიკითხეთ შეფუთული საკვების ეტიკეტები.
• მაღალკალორიული საკვების მიღებისას უფრო პატარა ულუფები მიირთვით.
• კარტოფილი ფრის, ჩიფსის, ნაყინის, ცომეულისა და სხვა ტკბილეულის მსგავსი კალორიული საკვების ნაცვლად აირჩიეთ ბოსტნეული, მთლიანი ხილი, პარკოსნები, როგორიცაა ბარდა და ლობიო, და სხვა დაბალკალორიული საკვები.
• შეზღუდეთ წითელი ხორცის, განსაკუთრებით დამუშავებული ხორცის რაოდენობა.
• უპირატესობა მიანიჭეთ მომზადების ჯანსაღ მეთოდებს.
• ყოველდღე მიირთვით სულ მცირე 2-3 ულუფა ბოსტნეული და ხილი.
• რაფინირებული პროდუქტების ნაცვლად მთლიანი მარცვლეული აირჩიეთ.

- დაკავშირებული თემა: საკვების ჯანსაღად მომზადების 7 მეთოდი

5- არ გამოიყენოთ თამბაქო და მისი ნაწარმი – შეზღუდეთ ალკოჰოლი

თამბაქო და მისი ნაწარმი უდავოდ კიბოს ყველაზე მნიშვნელოვანი თავიდან აცილებადი მიზეზია. უკვე უდავოდ ცნობილია ისიც, რომ ალკოჰოლი ზოგიერთი კიბოს რისკს ზრდის. მათთვის, ვინც ალკოჰოლს არ იღებს, მისი დაწყების რეკომენდაცია არ არსებობს. უკვე მომხმარებლებს შეწყვეტა ან მინიმუმამდე შემცირება (კვირაში მაქსიმუმ 2 ჭიქა) ეძლევათ რეკომენდაციად.

6- გაერთეთ და ჰობი გაიჩინეთ

გართობა საჭიროებაა. დაავადებების, პასუხისმგებლობებისა და საქმეების ფონზე ნუ დაივიწყებთ სასიამოვნო საქმიანობას. დრო დაუთმეთ საყვარელ აქტივობებს, შეიძინეთ ჰობი, რომელიც სტრესისგან გათავისუფლებასა და გართობაში დაგეხმარებათ. ჯანმრთელობა მთლიანობაში უნდა შეფასდეს და ფსიქიკური ჯანმრთელობა ფიზიკურზე არანაკლებ მნიშვნელოვანია. ეს შეიძლება მოიცავდეს კურსებზე ახალი უნარების შეძენას, ხელოვნების ჰობის ან საყვარელ ადამიანებთან პიკნიკის დაგეგმვას.

ზოგჯერ საკუთარი თავისა და ჯანმრთელობის შესახებ დასაფიქრებლად რთულ მდგომარეობაში აღმოჩენა გვჭირდება. თუმცა წინასწარი ზომები და გაცნობიერებული ცხოვრება საშუალებას გვაძლევს, საკუთარ თავსა და გარშემომყოფებს უფრო ბედნიერი ცხოვრება შევთავაზოთ. საკუთარი თავისა და ოჯახის გულისთვის ვეცადოთ ცოტა დავიკლოთ, მეტი ვიმოძრაოთ, ჯანსაღი საკვები ავირჩიოთ, მოწევა შევწყვიტოთ და ალკოჰოლი შევზღუდოთ; ვეძებოთ ბედნიერად ცხოვრების და უფრო ჯანსაღი ქმედებების გზები.