კიდევ ერთი ამბავი ხმელთაშუაზღვის დიეტაზე: შეიძლება აგრესიული პროსტატის კიბოსგან დაგვიცვას

თევზით, ბოსტნეულით, ხილით, პარკოსნებითა და ზეითუნის ზეთით გამორჩეული ხმელთაშუაზღვის დიეტის მიმდევარ კაცებში აგრესიული პროსტატის კიბოს რისკი უფრო დაბალი აღმოჩნდა. ხოლო დასავლური დიეტის მიმდევრებში ეს რისკი უფრო მაღალი იყო. The Journal of Urology-ში გამოქვეყნებული ახალი კვლევის მიხედვით, კაცებში ერთ-ერთი ყველაზე გავრცელებული კიბოს, პროსტატის კიბოს, რისკის შემცირება ხმელთაშუაზღვის დიეტით შეიძლება.

პროსტატის კიბოსა და კვების კავშირის გამოსაკვლევად ესპანეთში შემთხვევა-კონტროლის კვლევა ჩატარდა, რომელიც 733 პაციენტსა და 38 - 85 წლის 1.229 ჯანმრთელ საკონტროლო კაცს მოიცავდა.

დასავლურ დიეტაში უხვად მოიხმარენ რაფინირებულ მარცვლეულს, გადამუშავებულ ხორცს, შაქრიან სასმელებს, სწრაფ საკვებსა და სოუსებს. ხმელთაშუაზღვის დიეტა კი თევზს, მოხარშულ კარტოფილს, მთლიან ხილ-ბოსტნეულს, პარკოსნებსა და ზეითუნის ზეთს, ასევე ხილის წვენის მცირე მოხმარებას მოიცავს.

• ჯანსაღი ცხოვრება მოსალოდნელზე ბევრად ახლოსაა: ხმელთაშუაზღვის დიეტა

დიეტებს შორის მხოლოდ ხმელთაშუაზღვის მოდელის მკაცრი დაცვა დაუკავშირდა აგრესიული პროსტატის კიბოს დაბალ რისკს. სხვა კვებით მოდელებთან შედარებით მას დაბალი და მაღალი ხარისხის სიმსივნეებზე განსხვავებული ეფექტი ჰქონდა.

პროსტატის კიბოს სიმსივნის აგრესიულობის ხარისხი, გლისონის ქულის და ზომის მიხედვით განსაზღვრული სიმსივნის სტადიის მიხედვით დგინდება.

გლისონის ქულაარის შეფასება, რომელიც პროსტატის კიბოს უჯრედების გამრავლებისა და გავრცელების სიჩქარეზე წარმოდგენას გვაძლევს და ნორმალური უჯრედებისგან განსხვავების ხარისხს აფასებს. გლისონის ქულა 2-10-ის ფარგლებშია; რაც უფრო მაღალია, მით უფრო აგრესიულია კიბო და სწრაფია მისი პროგრესირება.

• პროსტატის კიბოს სტადირება და რისკჯგუფები

კვლევაში აგრესიულობის ხარისხი გლისონის ქულითა და კლინიკური სტადიით შეფასდა. გლისონის 6-ზე დაბალი ქულა ჩვეულებრივ მსუბუქი პროგნოზის (მიმდინარეობის) მქონე სიმსივნეს აღნიშნავს. სიმსივნის კლინიკური სტადია cT1 ან cT2a-ც პროსტატის ქსოვილში შეზღუდულ, გაუვრცელებელ სიმსივნეს აღნიშნავს.

კვლევამ აჩვენა, რომ ხმელთაშუაზღვის დიეტის მკაცრ დაცვას უფრო აგრესიული და დიდი სიმსივნეების (Gleason > 6 და სტადია cT2b-დან cT4-მდე) წინააღმდეგ დამცავი ეფექტი აქვს.

სხვა კვების მოდელებსა და სიმსივნის მახასიათებლებს შორის მნიშვნელოვანი კავშირი არ გამოვლენილა. შედეგად, კონკრეტული კვებითი ჩვევის მიერ პროსტატის კიბოს რისკზე შესაძლო გავლენის მნიშვნელოვანი მიგნებებით, ამ კვლევამ ხმელთაშუაზღვის დიეტის მნიშვნელობას კვლავ გაუსვა ხაზი.