Aralıq dənizi pəhrizindən daha bir xəbər: Aqressiv prostat xərçəngindən qoruya bilər

Balıq, tərəvəz, meyvə, paxlalılar və zeytun yağı tərkibi ilə önə çıxan Aralıq dənizi pəhrizinə əməl edən kişilərdə aqressiv prostat xərçəngi riskinin daha aşağı olduğu müəyyən edildi. Digər tərəfdən Qərb pəhrizlərini tətbiq edən şəxslərdə aqressiv prostat xərçəngi riskinin daha yüksək olduğu ortaya çıxdı. The Journal of Urologyjurnalında dərc olunan bu yeni araşdırmaya görə, kişilərdə ən geniş yayılmış xərçəng növlərindən biri olan prostat xərçəngi riskini Aralıq dənizi pəhrizi ilə azaltmaq mümkündür.

Prostat xərçəngi ilə qidalanma formaları arasındakı əlaqəni araşdırmaq üçün İspaniyada 733 xəstə və yaşları 38 - 85 arasında dəyişən 1.229 sağlam nəzarət qrupu kişisini əhatə edən hal-nəzarət araşdırması aparıldı.

Qərb pəhrizində rafinə edilmiş taxıllar, emal edilmiş ətlər, şəkərli içkilər, fast-food və souslar çox istehlak olunur. Aralıq dənizi pəhrizi isə balıq, qaynadılmış kartof, bütöv meyvə-tərəvəzlər, paxlalılar və zeytun yağı istehlakını və az meyvə şirəsi qəbulunu əhatə edir.

• Sağlam həyat düşünüldüyündən çox yaxındır: Aralıq dənizi pəhrizi

Pəhrizlər arasında yalnız Aralıq dənizi pəhriz modelinə yüksək bağlılıq göstərən şəxslərdə aqressiv prostat xərçənginin aşağı riski ilə əlaqə müşahidə edilmişdir. Digər qidalanma formaları ilə müqayisədə Aralıq dənizi qidalanması aşağı və yüksək dərəcəli şişlərdə fərqli təsirlər göstərmişdir.

Prostat xərçəngində şişin aqressivlik dərəcəsi Gleason balına və şişin ölçüsünə görə müəyyən edilən mərhələsinə əsasən müəyyən olunur.

Gleason balıprostat xərçəngi hüceyrələrinin çoxalma və yayılma sürəti haqqında fikir verən və xərçəngli hüceyrələrin normal hüceyrələrdən fərqlənmə dərəcəsini qiymətləndirən bal sistemidir. Gleason balı 2-10 arasında dəyişir və bal artdıqca xərçəngin daha aqressiv, irəliləməsinin daha sürətli olması deməkdir.

• Prostat xərçəngində mərhələləmə və risk qrupları

Araşdırmada prostat xərçənginin aqressivlik dərəcəsi Gleason balına və klinik mərhələyə görə müəyyən edilmişdir. Gleason balının 6-dan aşağı dəyərləri adətən mülayim proqnozlu (xəstəliyin gedişi) şişi göstərir. Şişin klinik mərhələsi cT1 və ya cT2a olduqda da prostat toxuması ilə məhdudlaşan və yayılmamış şişi bildirir.

Araşdırmanın nəticəsində Aralıq dənizi pəhrizinə yüksək bağlılığın daha aqressiv və daha böyük şişlərə (Gleason > 6 və mərhələ cT2b-dən cT4-ə) qarşı qoruyucu təsiri olduğu görüldü.

Bütün digər qidalanma formaları və şiş xüsusiyyətləri ilə əhəmiyyətli əlaqə tapılmadı. Nəticə olaraq, müəyyən qidalanma vərdişinin prostat xərçəngi riskinə təsir edə biləcəyinə dair mühüm tapıntılar göstərən bu araşdırma Aralıq dənizi pəhrizinin əhəmiyyətinin bir daha vurğulanmasını təmin etdi.