105 yaşına çatan yapon həkimin sirləri: Spartan pəhrizi, sənət, dinclik və fəallıq

Dünyada insanların doğuşdan gözlənən yaşam müddəti orta hesabla 71 il, Yaponiyada isə 83 ildir. Bu müddət Yaponiyanı ən uzunömürlü insanların yaşadığı 5 ölkədən birinə çevirir. Çoxsaylı kitabları olan Dr. Hinoharanın ən məşhur kitabı “Uzun yaşamaq, yaxşı yaşamaq” (Living Long, Living Good) kitabıdır.

Dr. Hinohara bu kitabda özünün də tətbiq etdiyi uzunömürlülük sirlərini açıqlayır. Ömrünün sonunadək çalışan həkim vəfat etdiyi 2017-ci ilədək Tokiodakı St. Luke’s International University-nin təqaüdçü prezidenti və St. Luke’s International Hospital-ın fəxri prezidenti idi.

Dr. Hinoharaya görə ömrü uzadan əsas amillər var idi. Özünün də tətbiq etdiyi bu amilləri kitabına köçürən həkimin uzunömürlülük tövsiyələrinə birlikdə baxaq:

Təqaüdə çıxmayın! Lazımdırsa bunu 65 yaşdan xeyli sonra edin

Bu fikri 2009-cu ildə “Japon Times” müsahibəsində deyən Dr. Hinohara ölümündən bir neçə ay əvvələ qədər xəstə qəbul edir, gündə 18 saat çalışırdı. O, insan ömrünün keçmişdən uzun olduğunu, buna görə adətən 65 olan təqaüd yaşının artırılmasını müdafiə edirdi.

Pilləkəndən istifadə edin və fəal qalın

Dr. Hinohara sağlam qalmaq və əzələləri gücləndirmək üçün müntəzəm məşqin, gün ərzində fəal olmağın əhəmiyyətini vurğulayırdı. İldə 150 dərs verən həkim oturaraq deyil, ayaqüstə dərs deyir, həmişə pilləkəndən istifadə edir, əşyalarını özü daşıyırdı.

Çəkinizi nəzarətdə saxlayın

Dr. Hinohara piylənmənin ölüm riski ilə birbaşa bağlı olduğunu və uzunömürlü insanlar araşdırılanda heç birinin artıq çəkili olmadığını vurğulayırdı.

Spartan adlı pəhrizlə qidalanan həkimin menyusunda əsasən balıq, meyvə, tərəvəz və zeytun yağı üstünlük təşkil edirdi.

Xərçəng, ürək-damar xəstəlikləri, diabet və ya Alzheimer kimi bir çox xəstəlik orqanizmdəki xroniki iltihab la əlaqəlidir. Spartan pəhrizinin əsas məqsədi immun sistemini gücləndirən, beləliklə iltihabı zəiflədən qida və ədviyyatlarla qidalanaraq xəstəlik riskinin azalmasına töhfə verməkdir.

Spartan pəhrizi əsasən

• Emal edilməmiş qidaları,
• Azyağlı qidalanmanı,
• Yağ ehtiyacını zeytun yağı ilə qarşılamağı,
• Süd və süd məhsulları istifadəsini,
• Tərəvəz və meyvənin üstünlük təşkil etdiyi qidalanmanı,
• Balıq və ət qəbulunu,
• Yeməklərə ədviyyat əlavə etməyi,
• Şəkər kimi sadə karbohidratlar əvəzinə taxıl kimi mürəkkəb karbohidratlarla qidalanmağı tövsiyə edir.

Dr. Hinohara daim məşğul olduğundan yeməyi unuda və bəzən günortanı ötürə bildiyini qeyd edirdi. Səhər qəhvə, süd və portağal şirəsi, günorta süd və peçenye, axşam tərəvəz, balıq və düyü ilə qidalandığını, əlavə olaraq həftədə iki dəfə 100 qram yağsız ət yediyini deyirdi.

Sizi məşğul saxlayan fəaliyyətlər tapın

Yalnız məşğul olmaq üçün deyil, məqsədə xidmət edən fəaliyyətlərlə günü doldurmağı tövsiyə edən Dr. Hinohara müsahibəsində insanların 60 yaşadək ailələri üçün çalışdığını, 60 yaşlarından sonra isə təqaüdə çıxmaq əvəzinə cəmiyyətə töhfə verən fəaliyyətlərlə məşğul olmalı olduqlarını vurğulamışdı. Həkim 65 yaşdan sonra həftənin 7 günü, gündə 18 saat könüllü işləyir və hər saniyəsindən zövq aldığını deyirdi.

Sərt qaydalar stres yarada bilər! Qaydaları yumşaltmağa çalışın

Dr. Hinohara sərt qaydalarla həyatın stres səviyyəsini və buna görə xəstəlik riskini artıra biləcəyini düşünürdü. Uşaqlıqda qaydasız oynayanda yeməyi və ya yatmağı unuda bildiyimizi, buna bənzər sərbəst davranışları yetkinlikdə də yaşamalı olduğumuzu müdafiə edirdi.

Şəfanı yalnız dərmanlarda axtarmayın. Həkimlərin hər şeyi sağalda bilmədiyini bilin

Dr. Hinohara elmin insanı təkbaşına müalicə edə bilməyəcəyində israrlı idi. Hər insanın bənzərsiz olduğunu və xəstəliklərin onun qəlbi ilə bağlılığını düşünürdü. Sağaltmaq üçün yalnız tibbi sənətə deyil, vizual sənətlərə də ehtiyac olduğuna inanırdı. Buna görə fəxri rəhbəri olduğu St. Luke’s International Hospital xəstələrinin bu ehtiyaclarının qarşılanmasını təmin etdi. Xəstəxanada tibbi müalicədən əlavə musiqi, heyvanlarla terapiya və sənət dərsləri də verilirdi. Həkim əyləncənin müalicədəki əhəmiyyətini “əzab çəkmək çətindir, onu unutmağın yeganə yolu əylənməkdir” cümləsi ilə izah edirdi.

Sənətdə ilham, sevinc və dinclik tapın

Ölümündən bir neçə ay əvvəl qida qəbul edə bilməməyə başlasa da Dr. Hinohara qidalanma borusundan imtina etdi. Xəstəxanadan çıxdı, bir neçə ay sonra evində vəfat etdi. Xəstəxanada ölümlə savaşmaq əvəzinə evində sənət vasitəsilə dinclik tapdı və sakit ölməyi seçdi.

Şərh və xülasə

Dr. Hinoharanın uzunömürlülük tövsiyələri sağlamlığa bütöv yanaşmanın vacibliyini bir daha göstərir. Təkcə sağlam qidalanma və ya fəal həyatla deyil, ruhu və zehni də qidalandıraraq sağlamlığı yaxşılaşdırmağın daha doğru və asan yol olduğunu deyə bilərik. Onun Spartan pəhrizini araşdıranda Aralıq dənizi pəhrizi ilə oxşarlığı görürük. Uzun və sağlam həyat üçün həkimin həyat tərzi tövsiyələrinə qulaq asmağı, Aralıq dənizi pəhrizi kimi bütün qida qruplarını tarazlı əhatə edən sağlam model ilə qidalanmağı tövsiyə edirik.

- Əlaqəli mövzu: Dünyanın ən uzunömürlü Mavi Zona insanlarının ortaq xüsusiyyətləri