ქიმიოთერაპიაზე ჰიპერთერმიის დამატებამ სარკომისას სიცოცხლის ხანგრძლივობა გაზარდა

ოპერაციამდელ შემამცირებელ (ნეოადიუვანტურ) ქიმიოთერაპიასთან რეგიონული ჰიპერთერმიის დამატებამ რბილი ქსოვილის სარკომის პაციენტთა სიცოცხლე გაახანგრძლივა, როგორც JAMA Oncologyჟურნალში 2018 წლის თებერვალში გამოქვეყნებულ კვლევაში იუწყებიან.

რა არის სარკომა?

სარკომები კუნთის, ცხიმის, მყესებისა და სისხლძარღვების მსგავსი რბილი ქსოვილებიდან წარმოქმნილი იშვიათი კიბოებიადა ყველა კიბოს % 1-ზე ნაკლებს შეადგენს. მრავალი ქვეტიპის სარკომებისთვის ეფექტიანი წამლები ცოტაა და შედეგები ხშირად სასურველზე ნაკლებად დამაიმედებელია. ამიტომ ახალი ეფექტიანი მეთოდების ინტენსიური ძიება დიდი ხანია გრძელდება. სხვა ორგანოებში მეტასტაზები თუ არ არის და სიმსივნე ადგილობრივადაა შემოსაზღვრული, ოპერაციამდელი ან ოპერაციისშემდგომი რადიოთერაპიის ქირურგიასთან კომბინაცია სტანდარტად ითვლება. ოპერაციამდელი ან შემდგომი ქიმიოთერაპია საერთაშორისო რეკომენდაციებით ერთ-ერთი ვარიანტია მაღალი რისკისას — დიდი ზომის, მაღალი ხარისხის ან არასასურველი მდებარეობის სიმსივნეებში.

• ჰიპერთერმია — რა არის სითბოთი მკურნალობა და აქვს მას ადგილი ონკოლოგიაში?

სამიზნე სიმსივნის 40 – 43 გრადუსამდე გათბობისკენ მიმართული, თერმოთერაპიად წოდებული ჰიპერთერმია ზოგ კიბოში ქიმიოთერაპიისა და რადიოთერაპიის ეფექტს აძლიერებს და იმუნური სისტემის სტიმულირებით ერთგვარი იმუნოთერაპიის მსგავსად მოქმედებს — ეს მრავალმა წინა კვლევამ აჩვენა.

რბილი ქსოვილის სარკომაში ეფექტიანობის შესაფასებელ ამ ღია, 3 ფაზის კლინიკურ კვლევაშიჩართეს მაღალი რისკის 341 პაციენტი, რომელთა ადრეული სტადიის სიმსივნეც ადგილობრივი გავრცელების გამო დაუყოვნებლივ საოპერაციო არ იყო.

პაციენტები 2 ჯგუფად დაყვეს: ერთს სტანდარტული ნეოადიუვანტური მკურნალობის 4 კურსი ქიმიოთერაპია (დოქსორუბიცინი, იფოსფამიდი და ეტოპოზიდი) მისცეს, მეორეს კი ქიმიოთერაპიასთან ერთად რეგიონული ჰიპერთერმია ჩაუტარეს.

კვლევის შედეგებით:

• დაკვირვების მედიანა 11.3 წელი იყო.
• % 67-ს (220 პაციენტს) რეციდივი ჰქონდა, % 57 გარდაიცვალა (188 პაციენტი).
• კომბინაციის ჯგუფში ადგილობრივი კონტროლი, ანუ ადგილობრივი პროგრესირების გარეშე გადარჩენა, მხოლოდ ქიმიოთერაპიასთან შედარებით % 35-ით უკეთესი იყო.
• უმთავრესი შედეგი: ჰიპერთერმიამ ქიმიოთერაპიასთან ერთად პაციენტთა % 27-ში საერთო სიცოცხლის ხანგრძლივობა მნიშვნელოვნად გაზარდა.
• კომბინაციის ჯგუფში 5-წლიანი გადარჩენა % 63 იყო, მხოლოდ ქიმიოთერაპიაში — % 51; 10-წლიანი გადარჩენა — % 53 და % 43.

მხოლოდ ქიმიოთერაპიის მიერ სიცოცხლის მნიშვნელოვანი გახანგრძლივება ვერ აჩვენეს და კვლევა შეწყდა.

დასკვნის სახით,რბილი ქსოვილის სარკომისას, როცა ნეოადიუვანტური მკურნალობა საჭიროა, რეგიონული ჰიპერთერმიის დამატება ეფექტიან ვარიანტად ჩანს.