მსხვილი ნაწლავის — კოლორექტალური კიბოს სკრინინგი კოლონოსკოპიით
კოლონოსკოპია საუკეთესო მეთოდია როგორც მსხვილი ნაწლავის კიბოს ადრეული დიაგნოსტიკისთვის, ისე პოლიპების გამოსავლენად, ბიოფსიის ასაღებად და/ან პოლიპის სრულად მოსაშორებლად. მიუხედავად იმისა, რომ დადასტურებულია მისი უნარი, შეამციროს კოლორექტალური კიბოსა და ამ დაავადებით სიკვდილის სიხშირე, პროცედურასთან დაკავშირებული შფოთვის, ტკივილისა და დისკომფორტის, შემსრულებლის მუშაობისა და ეფექტიანობის შესახებ გარკვეული კითხვების გამო ბევრ ქვეყანაში იგი კიბოს სკრინინგის მეთოდად სასურველი მასშტაბით ჯერ კიდევ არ გამოიყენება.
23 მაისს, 2016 წელს, ერთ-ერთ მნიშვნელოვან სამეცნიერო გამოცემაში, Jama Internal Medicine-ში, გამოქვეყნებული კვლევა კოლორექტალური კიბოს სკრინინგისთვის კოლონოსკოპიის ეფექტიანობისა და უსაფრთხოების შემფასებელი დღემდე ჩატარებული ყველაზე ფართომასშტაბიანი კვლევა იყო (რანდომიზებული კლინიკური კვლევა).
კვლევა ევროპის სხვადასხვა ქვეყანაში ჩატარდა; შეფასდა სკრინინგული კოლონოსკოპიის მონაწილეობის მაჩვენებლები, ადენომის არსებობა, პროცედურის შესრულების ხარისხი და გვერდითი მოვლენები.
55 – 64 წლის 31 420 ადამიანიდან, რომლებსაც კოლონოსკოპია შესთავაზეს, 12 574-მა (%40) სკრინინგი ჩაიტარა. მონაწილეთა და სკრინინგის ჩატარების მაჩვენებლები ქვეყნების მიხედვით ასეთი იყო:
- ნორვეგიელი მონაწილეების %60 (8816 ადამიანს კოლონოსკოპია შესთავაზეს, 5354-მა ჩაიტარა),
- შვედების % 40 (1222 ადამიანიდან 486-მა),
- პოლონელების % 33 (18 188 ადამიანიდან 6004-მა) და
- ნიდერლანდელების % 23 (3194 ადამიანიდან 730-მა)
კოლონოსკოპიის დროს წვრილი და მსხვილი ნაწლავის შეერთების უბნის, ე.წ. ბრმა ნაწლავის, მიღწევის სიხშირე % 97 იყო, ადენომის გამოვლენისა — % 30 (მესამედი მაღალი რისკის ადენომა), კოლორექტალური კიბოსი — % 0,5. შეფასდა კოლონოსკოპიის შემსრულებლების (ენდოსკოპისტების) მუშაობა და აღმოჩნდა, რომ დაახლოებით ყოველი 5 ენდოსკოპისტიდან ერთი სასურველი ხარისხით ვერ აღწევდა ბრმა ნაწლავს ან ვერ ავლენდა ადენომებს.
გვერდითი მოვლენების შეფასებისას საშუალო ან ძლიერი მუცლის ტკივილის სიხშირე ჰაერის ინსუფლაციისას % 16 იყო, CO2-ის ინსუფლაციისას კი დაახლოებით %4 აღმოჩნდა.
დასკვნის სახით, კოლონოსკოპიით კიბოს სკრინინგს მთელ მსხვილ ნაწლავში დაზიანებების აღმოჩენის მაღალი უნარი აქვს. სკრინინგის ჩატარების სიხშირე და ენდოსკოპისტების მუშაობის ხარისხი ქვეყნების მიხედვით განსხვავდება. პროცედურის შემდეგ შესაძლო მუცლის ტკივილი ნახშირორჟანგის ინსუფლაციით შეიძლება მნიშვნელოვნად შემცირდეს.
დაკავშირებული თემა:
- როგორ დავიცვა თავი კოლონისა და სწორი ნაწლავის კიბოს განვითარებისგან?
წყაროები
Population-Based Colonoscopy Screening for Colorectal Cancer: A Randomized Clinical Trial.
JAMA Intern Med. 2016 May 23.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.